HARURUAR 18 - BIBEL JAMITA NA DENGGAN

Ro si Jetro manopot si Musa

¹ Tarbege ma tu si Jetro tulang ni si Musa, malim na di Midian i na nibaen ni Debata di si Musa bope di bangso Israel di na nipimpinNia halahi ruar sian Mesir.

² Jadi dioban si Jetro, tulang ni si Musa i ma si Zipora, i ma dadaboru ni si Musa – na dung disuru ni si Musa do i mulak –

³ rap dohot si Gersom dohot si Elieser anaknia na dua i. Anakna siangkaan i digoari ia si Gersom, harana didok si Musa, “Halak ro do au di luat na asing,”

⁴ anaknia na paduahon i dibaen ia goarna si Elieser, harana didok si Musa, “Madung diurupi Debata ni daompung au jana dipalua Ia au, gabe nada dibunu raja ni Mesir au.”

⁵ Rap dohot ripe ni si Musa bope dohot anaknia na dua i ma ro si Jetro manopot si Musa di parhorsihan inganan ni si Musa i marbandar, di lambung ni dolok na badia i.

⁶ Jolo ditonahon ia hian do, “Ro do hami, tulangmu, dadaborumu dohot anakmu na dua i.”

⁷ Jadi kehe ma si Musa mangalo-alo halahi. Manungkap ma ia di jolo ni si Jetro, jana diumma ia ma. Marsisapaan ma halahi sanga na horas torkis be do halahi sude, jadi dung i, masuk ma halahi tu bagasan bandar ni si Musa i.

⁸ Dicaritohon si Musa ma sude tu si Jetro sanga na aha na nibaen ni Tuhan maradopkon raja Mesir dohot bangsona i laho paluahon halak Mesir. Laing dicaritohon ia ma dohot hamaolon na niadopan ni bangso i di tonga dalan, jana songon dia dibaen Tuhan paluahon halahi.

⁹ Moga ma dilala si Jetro dung dibege denggan basa ni Tuhan tu halak Israel, na dipalua Ia halahi sian tangan ni halak Mesir.

¹⁰ Jana ning ia ma, “Nipuji ma da Tuhan i na dung paluahon hamu sian tangan ni raja dohot bangso Mesir i! Nipuji ma da Tuhan na paluahon bangso Israel sian parhatobanon i!

¹¹ Saonnari madung huboto, gumodang do hape Tuhan i sian sandok debata, harana di hatiha di hasombongan ni halak Mesir maradopkon halak Israel do dibaen Tuhan sudena on.”

¹² Dung i dioban si Jetro ma sanga na piga haul situtungon dohot haul sisambolon songon somba-sombania tu Debata. Ro do si Harun rap dohot sude pamimpin ni halak Israel i tu parjamuan i lalu mangankon panganon na badia i dohot si Jetro di jolo ni Debata.

Mangangkat angka hakim

¹³ Ancogotna i juguk ma si Musa giot manguhumi bangso i, jana jongjong ma bangso i di adopan ni si Musa, mamungka sian manyogot lalu tu potang.

¹⁴ Dung diida si Jetro sudena sikarejohonon ni si Musa di tonga-tonga ni bangso i, disapai ia ma, “Angka aha dehe lakna na angkon sikarejohononmu di bangso on? Angkon sada ho sajo dehe lakna mangkarejohon i sudena, jabat do angkon jongjong dison sian manyogot lalu tu borngin sanga ise na giot mangido sipaingot sian ho.”

¹⁵ Dialusi si Musa ma, “Angkon songon i do baenonku, harana tu au do marroan angka halak na giot umboto lomo ni roha ni Debata.

¹⁶ Muda adong hagaoran di halahi, mangadop ma i tu au anso huputuskon sanga ise na tigor, jana hupaboa ma tu halahi angka parenta dohot aturan-aturan ni Debata.”

¹⁷ Jadi didok si Jetro ma, “Nanggo denggan songon na binaenmi.

¹⁸ Paloja-loja dirimu do na songon on, songon i muse halak na asing. Mabahattu do karejo na songon on tiopon ni sada halak sajo.

¹⁹ Antong, ihutkon ma sipaingotkon, gabe donganan ni Debata do ho. Tutu nian, na denggan do mangwakili bangso on di jolo ni Debata dohot na pasahatkon parsoalan ni halahi tusia.

²⁰ Angkon ajarkononmu do tu halahi angka na niparentahon ni Debata jana angkon patorangonmu muse pardalan ni ngolu na denggan maradu tu na patut angkon baenon ni halahi.

²¹ Tapi tamba ni i muse, angkon laing pilionmu do piga-piga halak na malo jana na bisa dihaposi gabe pamimpin ni bangso i: Pamimpin ni saribu halak, saratus, lima pulu dohot sampulu halak. Dumenggan muda angka halak na mabiar mida Tuhan halahi, haposan jana na so ra manjagit hepeng suruk.

²² Suru ma halahi anso ra mangalehen dirina mangoloi bangso on, gabe hakim ma halahi lopus mate. Angke parkaro na penting ma sipalaluon ni halahi tu ho, tapi anggo angka parsoalan na menek-menek, halahi pe, tarpasidung halahi do i. Panayangkon do i tu ho hara ni na dohot i halahi markarejo.

²³ Muda tulus dibaen ho na songon i jana diparentahon Debata na songon i tu ho, tarkarejohon ho ma sude angka karejomu, jana halahi pe sonang be ma rohana mulak.”

²⁴ Jadi laing dipatulus si Musa ma sipaingot na nidok ni si Jetro i,

²⁵ dipili ia ma halak na malo marroha sian bangso Israel. Ditontuhon ia ma sian halahi na gabe pamimpin ni na saribu halak, deba tu saratus halak, deba tu lima pulu halak, jana adong tu na sampulu halak.

²⁶ Gabe hakim ma halahi di bangso i lopus tu ujung ni ngolu ni halahi. Angka parkaro-parkaro na penting, tu si Musa ma dipasahat halahi, tapi anggo angka soal na menek-menek do, laing halahi noma pasidungkonsa.

²⁷ Dung i dipatola si Musa ma si Jetro laho kehe jana mulak ma si Jetro tu kotania.