HARURUAR 16 - BIBEL JAMITA NA DENGGAN

Manna dohot leto

¹ Dung i kehe ma sude halak Israel maninggalkon Elim, jana di ari lima bolas bulan paduahon dung ditadingkon halahi tano Mesir, lalu ma halahi tu Parhorsihan Sin, di antara ni Elim dohot Sinai.

² Mungut-ungut ma halahi sudena tu si Musa dohot tu si Harun.

³ Ninna halahi ma, “Dumenggan ma sugari di tano Mesir hami dibunu Tuhan. Na ummotikna ma disi tarbaen hami juguk jana mangan juhut dohot na asing lopus puas. Hape dioban ho do hami tuson anso mate tangkuraparon hami sude.”

⁴ Didok Tuhan ma, “Giot paroonKu ma saonnari sipanganon marlobi-lobi songon udan di hamu sudena. Ganop ari angkon papunguonmunu do sipanganon tuk balanjo sadari. Songon i ma baenonKu manguji bangsongKu anso tarboto sanga na ra do halahi mangoloi angka na Huparentahon.

⁵ Di ari paonomkon angkon sude halak Israel papunguhon jana pasingkop panganon i dua lompit bahatna.”

⁶ Gabe didok si Musa dohot si Harun ma tu sude halak Israel, “Potang on botoonmunu ma, bahaso Tuhan do na maroban hamu haruar sian Mesir.

⁷ Manyogot idaonmunu ma sumirlak sinondang sian hamuliaan ni Tuhan. Madung dibege Tuhan angka ungut-ungutmunu tuSia, olo tutu, maradopkon Tuhan. Angke anggo hami, hum patulus na niparentahonNia do.”

⁸ Dung i ninna si Musa ma, “Lehenon ni Tuhan ma di hamu juhut panganonmunu di potang ni ari, dohot roti sanga sadia giotmunu manyogot, angke madung dibege Tuhan ungut-ungutmunu tuSia. Muda marungut-ungut hamu tu hami, satutuna tu Tuhan do hamu na marungut-ungut i.”

⁹ Didok si Musa ma tu si Harun, “Suruhon ma ro sude bangso i tu adopan ni Tuhan, angke madung dibege Ia ungut-ungut ni halahi.”

¹⁰ Hatiha mangkobari dope si Harun tu bangso i sude, humusor ma halahi adop parhorsihan, jana tompu ma diida halahi sumirlak sinondang ni Tuhan di bagasan ombun i.

¹¹ Didok Tuhan ma tu si Musa,

¹² “Madung Hubege ungut-ungut ni halak Israel. Dok ma di halahi, muda andospotang dapotan juhut ma halahi baen panganon, jana manyogotna i dapotan roti ma halahi sanga sadia giotna. Gabe botoon ni halahi ma, bahaso Au do Tuhan, Debata ni halahi.”

¹³ Andospotang i ro ma sahulanan na godang unggas leto, hara ni bahatna jabat ditutupi sude inganan parbandaran i, jana manyogotna i adong ma ombun humaliang parbandaran i.

¹⁴ Dung manguap ombun i tarida ma na nipis jana marlampis-lampis payak di parhorsihan i. Halus do tompana songon ombun na himpal.

¹⁵ Di na diida ni halak Israel i, nada diboto halahi sanga aha i, jana marsisapaan ma halahi sama halahi, “Aha do i?” Dung i didok si Musa ma tu halahi, “On ma da roti sipanganon na nilehen ni Tuhan di hamu.

¹⁶ Madung diparentahon Tuhan anso ganop hamu palagutkon marguru tu haporluanna, dua liter ma di sada halak ganop ripe.”

¹⁷ Dibaen halak Israel ma songon i, adong ma na palagutkon lobi sian dua liter jana adong muse na hurang.

¹⁸ Hatiha marsuhat halahi, hapengani halak na papungu umbahat panganon i nada adong lobina, jana na papunguhon hurang bahat, nada hahurangan. Ganop halahi palagutkon sabahat ni haporluanna.

¹⁹ Didok si Musa ma tu halahi, “Sahalak pe nada tola manyimpan sipanganon saotik pe baen ancogotna.”

²⁰ Hape adong do deba sian halahi na so manangihon hata ni si Musa i. Disimpan halahi do deba sian roti i. Hape ancogotna i gabe ulohon ma roti i jana bau, jana gabe muruk ma si Musa tu halahi.

²¹ Muda manyogot dipapungu halak Israel ma panganon i sabahat ni na hasaya di halahi, jana muda mamungka milas ari i, malala ma sipanganon na tinggal di tano i.

²² Di ari paonomkon, dipapungu halahi ma sipanganon dua lompit, opat liter di sahalak. Marroan ma sude pamimpin ni bangso i tu si Musa jana dicaritohon halahi ma taringot tusi.

²³ Gabe didok si Musa ma tu halahi, “Madung ditontuhon Tuhan, ancogot i ma ari na badia laho maradian, ari na nihaulkon tu Tuhan. Sanga aha na giot tutungonmunu sadari on, tutung hamu ma. Lobina i dipaasing jana disimpan ma i tu ancogot.”

²⁴ Jadi disimpan halahi ma na lobi sian sipanganon i tu ancogot songon na niparentahon ni si Musa; nada pola bari roti i sanga ulohon.

²⁵ Didok si Musa ma, “On ma panganonmunu sadari on, angke Ari Sabat do sadari on, ari paradianan laho pasangap Tuhan, jana hamu pe nada dapot hamu saotik pe sipanganon di balian ni parbandaran on.

²⁶ Onom ari ma lolotna hamu palagutkon sipanganon, tapi anggo ari papituhon, ari paradianan do i, jadi nada adong sipanganon disi.”

²⁷ Di ari papituhon i, adong do deba sian halak Israel na giot papungu sipanganon, hape umpe bagi aha dapot halahi.

²⁸ Dung i didok Tuhan ma tu si Musa, “Sadia honok nari hamu manulak mangoloi parentangKu?

²⁹ Ingot ma, Au, Tuhan, madung Hulehen di hamu sada ari anso maradian. Hara ni i ma da dibaen na Hulehen di ari paonomkon i sipanganon tu dua ari. Di ari papituhon i sude jolma angkon tinggal di bagas, ulang haruar.

³⁰ Jadi di ari papituhon i nada markarejo be halak.”

³¹ Dung i digoari halak Israel ma panganon i “manna”. Pangalahona songon parbatu na menek, tompana bontar, daina songon roti mardongan aer ni loba.

³² Ninna si Musa ma, “Diparentahon Tuhan do anso tapaasing saotik manna i simpanonta di pomparanta, anso dohot halahi marnida panganon na nilehen ni Tuhan tu hita di parhorsihan hatiha dioban Ia hita haruar sian tano Mesir.”

³³ Didokkon si Musa ma tu si Harun, “Buat jolo sada gunci, pamasuk ma dua liter manna i tu bagasan, jana payakkon ma i di inganan parmianan ni Tuhan simpanonta di angka pomparanta.”

³⁴ Dung i dipayakkon si Harun ma gunci i di jolo ni Poti Parjanjian anso disimpan songon na niparentahon ni Tuhan tu si Musa.

³⁵ Manna i ma gabe panganon ni halak Israel, opat pulu taon honokna, lopus bolkas halahi tu Kanaan, inganan na hot di halahi. (

³⁶ Suhat-suhat ni barang na pir na somal dipake halak hatiha i dos dohot dua pulu liter.)