HARURUAR 14 - BIBEL JAMITA NA DENGGAN

Manaripari Laut Rara

¹ Dung i didokkon Tuhan ma tu si Musa,

² “Suru ma halak Israel i mulak jana marbandar di jolo ni kota Pi Hahirot, antara ni kota Migdol dohot Laut Rara donok tu kota Baal Zefon.

³ Gabe diambang raja Mesir ma na madang-adang halak Israel di luat on, jana tarhurung dibaen parhorsihan i.

⁴ Jogal do baenonKu rohania anso gabe diayak-ayak ia hamu. Hamonanganmunu maradopkon raja ni Mesir dohot tentarania i ma mambaen halak pagodangkon Au. Gabe botoon ni halak Mesir i ma, Au do Tuhan.” Dipatulus halak Israel do songon na nidok ni Tuhan tu halahi.

⁵ Dung dibege raja ni Mesir na dung maporus halak Israel i, manyosal ma ia rap dohot menterinia i, ninna halahi ma, “Mambaen bia dehe hita? Tapadiar do halak Israel i kehe, gabe mago ma hatobanta di na kehe halahi?”

⁶ Dung i dipasingkop raja i ma kareta porang dohot tentarania.

⁷ Mardalan ma ia dohot sude karetania, adong ma onom ratus kareta na jumeges sipakeon ni angka perwirania.

⁸ Dipatangkang Tuhan do roha ni raja i, gabe diayak-ayak ia halak Israel na mardalan maninggalkon luat i di bagasan na niondihon ni Tuhan i.

⁹ Mangkojar ma tentara Mesir i, dohot sude kudo maradu sude na markudo, tu halak Israel lopus tu inganan parbandaran ni halahi donok tu Laut Rara, di lambung ni Pi Hahirot dohot Baal Zefon.

¹⁰ Dung diida halak Israel mur donok raja Mesir dohot tentarania i, sun ma biar ni halahi, jana pio-pio ma halahi tu Tuhan mangido pangurupion.

¹¹ Ninna halahi ma tu si Musa, “Aha do na nibaenmu tu hami? Na so adong dehe lakna kuburan di tano Mesir? Angkon obanonmu ma he hami, anso mate di inganan on? Ligi ma, patunda ni na niobanmon hami ruar sian Mesir!

¹² Nada he na dung hami dokkon hian do na salpu i, na angkon masa na songon on? Hami suru hian do anso kehe ho maninggalkon hami jana padiaronmu hami diparhatoban di Mesir. Gumonan dope gabe hatoban disi, ulang pado mate di parhorsihan on!”

¹³ Dialusi si Musa ma, “Ulang hamu mabiar! Martahan ma hamu, idaonmunu ma sanga aha sibaenon ni Tuhan laho paluahon hamu sadari on; nada idaonmunu be halak Mesir i.

¹⁴ Tuhan do marporang humopkop hamu, jana nada porlu sanga aha baenonmunu.”

¹⁵ Didok Debata ma tu si Musa, “Biasi pio-pio ho mangido tolong? Suru ma halak Israel i torus mardalan.

¹⁶ Buat ma tungkotmu, pahortang ma tu ginjang ni laut i. Gabe mabola ma aek i, jana tarbaen halak Israel ma manaripari laut i mardalan di tano na mahiang.

¹⁷ PatangkangonKu ma roha ni halak Mesir i, anso dikojar halahi halak Israel, anso diida raja Mesir dohot angka paranganna, kareta dohot parkaretana i hagodanganKu na manaluhon halahi.

¹⁸ Di na Hutaluhon halahi disi ma tandaon ni halahi bahaso Au do Tuhan.”

¹⁹ Dung i humusor ma surusuruan ni Debata, di jolo ni parangan ni Israel hian kehe tu pudi. Humusor muse ma tiang ombun na jongjong

²⁰ di antara ni halak Mesir dohot halak Israel. Gabe golapan ma sude halak Mesir i hara ni ombun i, hape anggo di halak Israel torang do, jabat nada tarbaen padonok-donok parangan na dua i.

²¹ Dung i dipahortang si Musa ma tangannia tu ginjang ni laut i, jana diparo Tuhan ma haba-haba na gogo situtu na mangombus sian Habincaran pola sumurut aek i. Manyipat saborngin i sai mangombus haba-haba na gogo i mambaen laut i marbola dua jana maruba gabe tano na mahiang.

²² Mabola ma aek i, taripar ma halak Israel di laut i, mardalan di tano na mahiang na marpanembok aek di siamun siambirang.

²³ Diayak-ayak halak Mesir ma halahi lalu mangihut masuk tu laut i dohot sude kudo, kareta dohot na maroban kareta i.

²⁴ Marayak andostorang, ditatap Tuhan ma sian tiang api dohot tiang ombun i tu tentara ni Mesir jana dipasarsar Ia ma halahi.

²⁵ Marsangkotan ma dibaen Ia angka roda ni kareta i, jadi gabe maol ma mardalan. Ninna halak Mesir i ma, “Tuhan do marporang di halak Israel mangalo hita. Beta ma hita morot sian on!”

²⁶ Didok Tuhan ma tu si Musa, “Pahortang ma tanganmu tu ginjang ni laut i, dung i mulak ma mardomu aek i mangogap halak Mesir i, bope angka kareta dohot angka na juguk di kareta i.”

²⁷ Dung i dipahortang si Musa ma tangannia tu ginjang laut i, jana marayak andostorang, mulak ma mardomu aek i songon na somal bagasna. Digogo halak Mesir i ma paluahon dirina, hape diparambungkon Tuhan halahi tu bagasan aek i.

²⁸ Mardomu ma aek i jana dilingkupi ma sude kareta dohot halak na di kareta i maradu sude tentara Mesir na mangayak halak Israel i tu bagasan laut; umpe sahalak na mangolu sian halahi.

²⁹ Hape di na taripar halak Israel di laut i, mardalan di tano na mahiang do halahi, martembok aek di siamun siambirangna.

³⁰ Di ari i ma dipalua Tuhan bangso Israel sian halak Mesir, jana diida halak Israel do angka bangke ni halak Mesir i marpayahan di topi ni laut i.

³¹ Dung diida halak Israel ditaluhon Tuhan halak Mesir i markite-hite kuaso na godang, tarhalomong ma halahi tu Tuhan. Porsaya ma halahi tuSia dohot tu si Musa naposoNa i.