HARURUAR 13 - BIBEL JAMITA NA DENGGAN

Manyombahon anak siangkaan

¹ Didokkon Tuhan ma tu si Musa,

² “Haulkon ma tu Au sude anak halaklahi siangkaan. Ganop anak halaklahi siangkaan di halak Israel dohot sandok pahan-pahanan jantan na parjolo sorang, Au do nampunasa.”

Ari Pesta Roti Na So Marragi

³ Didok si Musa ma tu halak Israel, “Ingot hamu ma ari on ari haruruarmunu sian Mesir inganan parhatobanonmunu. On ma arina Tuhan paluahon hamu marhite kuasoNia na godang i. Ulang pangan hamu roti na marragi.

⁴ Sadari on, ari sada bulan Abib, ditinggalkon hamu tano Mesir.

⁵ Mardongan sumpa dijanjihon Tuhan tu ompumunu laho pasahatkon tu luat ni halak Kanaan, Het, Amori, Hewi dohot Jebus. Dung dioban Tuhan hamu tu luat na mora bope na napu i, ganop taon di bulan parjolo angkon hagodangkononmunu do pesta on.

⁶ Pitu ari lolotna angkon panganonmunu roti na so marragi, jana di ari papituhon angkon pamasaonmunu ma pesta laho pasangapkon Tuhan.

⁷ Pitu ari lolotna nada tola panganonmunu roti na marragi jana di sude luatmunu nada tola adong ragi sanga roti na marragi.

⁸ Di parmulaan ni pesta i, angkon baritahononmunu do tu angka dakdanakmunu, dibaen hamu pe sudena i, i ma hara ni sasude na dung dibaen Tuhan tu hamu di na laho maninggalkon tano Mesir hamu.

⁹ Pesta on ma songon singot-singot di hamu tudos tu na nitambatkon di tangan sanga di bohimu. Marhite pesta on, gabe dipaingot hamu anso diapil jana diparsiajari hamu angka Uhum Ni Tuhan, harana madung diparuar Tuhan hamu sian Mesir marhite kuasoNa na godang i.

¹⁰ Pestahon hamu ma pesta on ganup taon di hatiha na dung ditontuhon.”

Anak siangkaan

¹¹ Didok si Musa ma tu bangso Israel, “Obanon ni Tuhan ma hamu tu tano Kanaan na dung dijanjihonNa i mardongan sumpa tu hamu dohot tu ompumunu. Dung dipasahat tano i tu hamu,

¹² angkon pasahatonmunu do sude anak siangkaan tu Tuhan. Sandok pahan-pahanan jantan na parjolo sorang, Tuhan do nampunasa.

¹³ Tapi sandok halode jantan na parjolo sorang angkon ditobus do sian Tuhan marhite na manghaulkon sada anak ni biri-biri songon gontina. Muda nada ra hamu manobus halode i, angkon ponggolkononkon do rungkungna i. Ganop anakmu halaklahi na parjolo sorang, angkon tobusonmunu.

¹⁴ Muda disapai anakmu di pudian ni ari sanga aha astuan ni pesta on, angkon alusanmunu songon on, ‘Marhite hagodangan ni kuaso ni Tuhan do, na maroban hita ruar sian Mesir inganan parhatobananta i.

¹⁵ Di na manangkang roha ni raja Mesir jana nada diloas ia hita kehe, dibunu Tuhan ma sude halaklahi anak siangkaan ni halak Mesir, bope anak siangkaan ni jolma dohot pahan-pahanan. I ma da dalanna tahaulkon tu Tuhan ganop pahan-pahanan jantan na parjolo sorang, tapi tatobus ma anggo anak siangkaan di hita.’

¹⁶ Pesta on ma na paingotkon hita gabe songon sada tanda na ditambatkon di tangan sanga di bohinta. Marhite pesta on, dipaingot hita, bahaso na dung diparuar Tuhan hita sian Mesir marhite kuasoNa na godang i.”

Tiang ombun dohot tiang api

¹⁷ Di na nipaloas ni raja Mesir kehe bangso Israel, nada dioban Debata halahi manopi-nopi laut laho tu Luat Pilistin, haru pe nian dalan i do na dumonok. Didok roha ni Debata, “Nada por rohangKu muda manyolsoli halahi gabe mulak tu Mesir dung diida halahi na angkon marporang halahi.”

¹⁸ Balikna do, dioban Debata halahi marhaliang mamolus parhorsihan torus tu Laut Rara. Marsinjata be do halak Israel i songon na giot marporang.

¹⁹ Dioban si Musa do holi-holi ni si Josep, angke dompak di ngolunia madung dibaen halak Israel marsumpa laho patuluskon songon i. Didok si Josep do, “Muda dung dipalua Tuhan hamu, angkon obanonmunu do bangkengku sian inganan on rap dohot hamu.”

²⁰ Ditinggalkon halak Israel ma Sukot, jana marbandar ma halahi di Etam, di topi ni parhorsihan.

²¹ Muda hatiha arian, mardalan ma Tuhan di jolo ni halahi di bagasan tiang ombun, jana hatiha borngin dijoloi Ia ma halahi di bagasan tiang api laho patidahon dalan. Dung songon i, tarbaen halahi ma mardalan arian dohot borngin.

²² Salolot arian tongtong do di jolo ni bangso i tiang ombun i, jana salolot borngin rap do tiang api i dohot halahi.