HARURUAR 11 - BIBEL JAMITA NA DENGGAN

Dipalumba si Musa hamamate ni anak siangkaan

¹ Didok Tuhan ma tu si Musa, “DabuonKu dope sada nari uhum tu raja Mesir dohot tu rayatnia. Dung i paloasonnia ma hamu kehe. Olo! Angkon paorotonnia ma sude hamu sian on.

² Hara ni i dokkon ma tu halak Israel; suru ma halahi mangido angka barang sere, dohot perak sian hombar bagas ni halahi.”

³ Dibaen Tuhan ma halak Mesir i mabiar mida halak Israel. Si Musa pe gabe halak na sangap situtu ma diida angka menteri dohot sude rayat i.

⁴ Jadi didok si Musa ma tu raja i, “Songon on pandok ni Tuhan, ‘Hira-hira tonga borngin, bolusonKu ma sude tano Mesir,

⁵ jana mate ma sude anak halaklahi siangkaan ni raja i, lalu tu anak siangkaan ni hatoban dadaboru siduda eme. Anak ni pahan-pahanan na parjolo sorang pe marmatean ma.

⁶ Di sude tano Mesir tarbege ma angguk-angguk na gogo na so unjung masa jana na so masa be.

⁷ Tapi anggo di halak Israel, bope jolma bope pahan-pahanan nada adong na mahua. Jadi gabe botoonmu ma, Au do Tuhan na mambaen marasing halak Mesir sian halak Israel.’ ”

⁸ Dung i didok si Musa ma muse, “Sude angka menterimu, angkon unduk di jolongku mangido, anso kehe au maroban sude bangsongki. Dung i pe anso kehe hami.” Mardongan muruk situtu, ditinggalkon si Musa ma raja i.

⁹ Didok Tuhan ma tu si Musa, “Nada ditangihon raja i hatamu, anso umbahat dope baenonKu tanda hahomangan di Mesir on.”

¹⁰ Dipatupa si Musa dohot si Harun do sude tanda hahomangan i di jolo ni raja i tapi dipatangkang Debata do roha ni raja i, nada dipaloas ia tinggalkonon ni halak Israel luatnia i.