HAMALIMON 8 - BIBEL JAMITA NA DENGGAN

Mangojakkon si Harun dohot angka anakna

¹ Didok Tuhan ma tu si Musa,

² “Oban ma si Harun dohot angka anakna i, tu Pintu Ni Bandar ParmiananKi. Oban muse pakean malim, miak upacara, lombu jantan na poso baen haul hasesaan ni dosa, dua biri-biri jantan dohot roti na so marragi sabakul.

³ Dung i suruhon ma marlagut halak Israel di inganan i.”

⁴ Dung i dipatulus si Musa ma sude na nidok ni Tuhan i. Di hatiha na marlagut i sude bangso i,

⁵ didok ia ma tu halahi, “Giot patulusonku ma saonnari parenta ni Tuhan i.”

⁶ Disuru si Musa ma si Harun dohot angka anakna i tu jolo, jana disuru ia halahi mamasu diri ni halahi mangihutkon ugamo.

⁷ Dung i dipapakehon ia ma tu si Harun kameja dohot juba dohot bobat. Dung i dipapakehon ia muse efod jana dirahutkon ia bobat ni baju efod na nitonun halus tu gonting ni si Harun.

⁸ Dibaen ia muse tutup ni andora tu si Harun, jana dibaen ia ma Urim dohot Tumim di bagasan tutup andora i.

⁹ Dung i dibaen ia muse saroben tu ulu ni si Harun jana dibaen ia sere sabola sian jolo ni saroben i, i ma tandana na dung Debata nampuna si Harun. Sudena i dipatulus si Musa mangihutkon parenta ni Debata tusia.

¹⁰ Dibuat si Musa ma miak upacara i, jana didaiskon ia ma tu Bandar Parmianan Ni Tuhan dohot tu sude parkokas na adong di bagasan Bandar Parmianan. Songon i ma dibaen ia pasahatkon sudena i tu Tuhan.

¹¹ Dung i dibuat si Musa ma deba sian miak i, jana dipispiskon ia pitu noli tu ginjang ni langgatan i, bope tu sude parkokas na adong disi dohot tu ginjang ni huali dohot payahanna. Songon i ma dibaen ia pasahatkon sudena i tu Tuhan.

¹² Dung salpu i diojakkon ia ma si Harun marhite na mangusehon miak upacara i saotik tu ginjang ulu ni si Harun.

¹³ Disuru si Musa muse ma angka anak ni si Harun tu jolo. Dipapakehon ia ma tu halahi kameja, dohot mangholtingkon basaen tu gonting ni halahi, dibaen ia muse kupia hamalimon tu ulu ni halahi songon na dung didok Tuhan i hian tusia.

¹⁴ Dung i dibuat si Musa ma sada lombu jantan jara-jara baen haul hasesaan ni dosa, lalu dipayakkon si Harun bope angka anaknia i ma tangan ni halahi tu ginjang ulu ni lombu i.

¹⁵ Disambol si Musa ma lombu i, dibuat ia deba mudarna, didaiskon ia ma mudar ni lombu i dohot jari-jari ni tangannia tu angka tanduk na di suhi-suhi ni langgatan i, anso gabe Debata nampuna langgatan i. Disaburkon ia ma mudar na lobi i tu ojahan ni langgatan i. Songon i ma pangalahona paias langgatan i mangihutkon ugamo sipasahaton tu Tuhan.

¹⁶ Dung i dibuat si Musa ma sude tabo-tabo na mamaluti butuha ni lombu na dung disambol i. Dibuat ia muse angka na jumeges sian ate-ate dohot pia rap dohot tabo-tabo ni lombu i, sudena i ditutung di ginjang ni langgatan i.

¹⁷ Na lobi sian juhut ni lombu i dibuat ia, i ma: Juhutna, bobak dohot butuhana, sudena i ditutung di balian ni Bandar Parmianan songon na nitontuhon ni Tuhan.

¹⁸ Dung i dibuat si Musa muse ma biri-biri jantan baen haul situtungon, dipayakkon si Harun bope anaknia i ma tangan ni halahi tu ginjang ulu ni biri-biri i.

¹⁹ Disambol si Musa ma biri-biri i, jana disiramkon si Musa ma mudarna tu na opat topi ni langgatan i.

^20-21 Dung i ditanggoi si Musa ma biri-biri jantan i, lalu dibasu ia butuha dohot pat pudi ni biri-biri i dohot aek. Ulu, tabo-tabo dohot lobi ni biri-biri jantan i ditutung ia di ginjang ni langgatan songon na dung didok Tuhan tusia. Haul situtungon i gabe haul sipanganon ma i, angke uap ni haul i do na pajop roha ni Tuhan.

²² Dung i dibuat si Musa ma biri-biri jantan na paduahon na hasaya di na mangangkat malim. Dipayakkon si Harun bope angka anaknia i ma tangan ni halahi tu ulu ni pahan-pahanan i.

²³ Dung i disambol si Musa ma biri-biri i. Dung i dibuat ia ma deba sian mudar ni biri-biri i, lalu didaiskon ia tu pinggol siamun ni si Harun tu ina ni jari tangan siamun bope tu ina ni jari ni pat siamunna.

²⁴ Dung i disuru ia ma tu jolo angka anak ni si Harun i, lalu didaiskon ia ma saotik mudar i tu pinggol siamun ni halahi, tu ina ni jari tangan siamun bope tu ina ni jari ni pat siamun ni halahi. Lobi ni mudar i disiramkon si Musa ma humaliang topi ni langgatan i.

²⁵ Dibuat si Musa ma tabo-tabo ni pahan-pahanan i, lalaina na martabo-tabo dohot sude tabo-tabo na mamalut butuhana, dohot angka na dumenggan sian ate-atena, pia dohot tabo-tabona bope patna pudi parsiamun.

²⁶ Dung i dibuat si Musa muse ma roti na so marragi sian bakul, lalu dipasahat ia tu Tuhan, sada roti na hapal na nibaen dohot miak dohot sada roti na nipis. Dipayakkon ia ma roti i tu ginjang tabo-tabo dohot pat siamun ni biri-biri haul i.

²⁷ Sude angka sipanganon i dibaen tu tangan ni si Harun dohot angka anakna, lalu dipasahat halahi ma i songon silehen-lehen na mardohonan tu Tuhan.

²⁸ Dung i dijagit si Musa ma sipanganon i sian halahi lalu ditutung ia di langgatan i, di ginjang ni haul situtungon i, gabe haul pangangkaton i ma haul sipanganon, uapna i ma pajop roha ni Tuhan.

²⁹ Dung i dibuat si Musa ma andora ni biri-biri i jana disombahon ia ma i gabe haul na mardohonan di Tuhan, i ma bagian ni si Musa sian biri-biri jantan na dihaulkon di hatiha mangangkat malim. Dipatulus si Musa do sudena i mangihutkon na nidok ni Tuhan tusia.

³⁰ Dibuat si Musa ma deba sian miak upacara dohot deba sian mudar na adong di ginjang langgatan i, dung i dipispiskon ia ma tu si Harun bope tu angka anakna i bope tu pakean ni halahi tu Tuhan.

³¹ Dung i didok si Musa ma tu si Harun dohot tu angka anakna i, “Oban ma juhut haul i tu pintu ni Bandar Parmianan Ni Tuhan lalu lompa disi. Dung i songon na dung diparentahon ni Tuhan i, angkon panganonmunu do disi roti na di bagasan bakul i na dung marisi haul pangangkaton.

³² Juhut dohot roti na lobi i angkon tutungon lopus abis.

³³ Pitu ari honokna nada tola tinggalkononmunu pintu ni Bandar Parmianan Ni Tuhan. Dung salpu pe pangangkatanmunu i, anso tola hamu kehe.

³⁴ Diparentahon Tuhan do tu hita laho mangkarejohon sanga aha na angkon karejohononta sadari on, anso disesa dosamunu i.

³⁵ Angkon donok tu pintu ni Bandar Parmianan Ni Tuhan i do hamu arian dohot borngin pitu ari honokna, laho mangkarejohon sanga aha na nidok ni Tuhan. Muda nada dibaen hamu songon i, mate ma hamu. Songon i do didok Tuhan i tu au.”

³⁶ Dung i dipatulus si Harun dohot angka anaknia ma sude na nidok ni Tuhan i marhite si Musa.