HAMALIMON 5 - BIBEL JAMITA NA DENGGAN

Angka pangalaho na mardomu tu haul hasesaan ni dosa

¹ Sada-sada halak madung tontu marsala jana angkon tanggungonnia sandiri hara ni karejonia, muda dipangido hatorangan na tangkas di jolo ni pangadilan, hape nada ra ia patorangkon taringot tu angka na niida dohot na nibegenia.

² Muda gabe hodar do sada halak hara ni na dais ia tu na hodar, umpamana bangke ni binatang, tapi nada diboto ia karejonia i, halak na hodar do ia, jana marsala.

³ Muda adong sada halak dais tu na ramun na marasal sian pamatang ni jolma, sanga aha pe i, ramun ma ia jana marsala dung tarboto pambaenannia i.

⁴ Muda adong sahalak na marsala hara ni na marsumpa sembarangan taringot tu na mangkarejohon bagi aha pe, dung i diboto ia pambaenannia i dipudi, marsala ma ia disi.

⁵ Di bagasan angka pangalaho na nigoaran i, angkon akuon ni halahi do hasalaanna.

⁶ Jana songon uhuman hara ni dosania i, angkon obanonna di Tuhan sada biri-biri sanga sada hambeng boru-boru. Sombahonon ni malim i ma haul i, anso dapot hasesaan ni dosa ni halakna i.

⁷ Tapi muda suada tarlehen ia biri-biri sanga hambeng baen tobus ni dosana, angkon obanonnia do sarongkap unggas hatutu sanga darapati, sada ma i gabe haul hasesaan ni dosa, na sada nari gabe haul situtungon.

⁸ Dung i dipasahat ma unggas i tu malim. Na parjolo angkon sombahonon ni malim i ma unggas na dung nitontuhon gabe haul hasesaan ni dosa. Dipulos ma rungkung ni unggas i, tapi ulang jabat marsirang sian uluna.

⁹ Mudar ni unggas i angkon dipispiskon tu topi ni langgatan, dung i lobina i diusehon tu ojahan ni langgatan i. I ma haul na gabe hasesaan ni dosa.

¹⁰ Dung i sombahonon ni malim i ma unggas na paduahon na gabe haul situtungon songon na dung diaturkon. Songon i ma pangalahona baenon ni malim pasahatkon haul hara ni dosa ni halahi, dung i sesaon ni Tuhan i ma dosana.

¹¹ Tapi muda suada tarlehen halak na marsala i sarongkap unggas hatutu sanga darapati gabe hasesaan ni dosana, angkon obanonnia ma topung dua liter. Nada tola nibaen tu topung i miak zetun sanga hamonyan, dibaen haul hasesaan ni dosa do i, nada haul gandum.

¹² Nioban ma topung i tu malim. Buaton ni malim i ma sanggolom sian topung i, songon tanda ma i bahaso na dung nihaulkon do topung i tu Tuhan. Topung na sanggolom i angkon nitutung do di ginjang ni langgatan na gabe haul sipanganon. I ma haul na gabe hasesaan ni dosa.

¹³ Songon i ma pangalahona baenon ni malim i pasahatkon haul hara ni dosa ni halahi, gabe sesaon ni Tuhan i ma dosana. Lobi ni gandum i, i ma bagian ni malim, sarupa tu haul gandum.

Haul tobus ni hasalaan

¹⁴ Dilehen Tuhan dope angka aturan on tu si Musa.

¹⁵ Muda adong sada halak na mardosa so hara ni na niuntilna, hara ni na lalap ia pasahat silehen-lehen na patut tu Tuhan, angkon obanon ni halahi ma haul tobus ni hasalaan. Ia haul i, i ma sada biri-biri sanga hambeng jantan na so martihas. Diasam ma argana mangihutkon arga markite ukuran na marlaku di inganan na badia i.

¹⁶ Angkon gararon ni halahi ma halalapannia i, ditamba dope duapulu porsenna i. Pasahatonnia ma pahan-pahanan i tu malim, dung i sombahonon ni malim i ma gabe haul hara ni dosa ni halahi, gabe sesaon ni Tuhan ma dosana.

¹⁷ Muda adong sada halak na mardosa so hara ni na niuntilnia, gabe dilaosi ia sada sian parenta ni Tuhan, madung marsala ia.

¹⁸ Angkon obanonnia ma tu malim sada biri-biri sanga sada hambeng jantan na so martihas. Niasam ma argana mangihutkon arga na dung ditontuhon. Sombahonon ni malim ma haul i hara ni dosa ni halahi, gabe sesaon ni Tuhan ma dosana.

¹⁹ I ma haul tobus ni hasalaan hara ni na mardosa halahi tu Tuhan.