HAMALIMON 4 - BIBEL JAMITA NA DENGGAN

Haul hara ni angka dosa na so niuntil

¹ Disuru Tuhan ma si Musa,

² paboahon tu bangso Israel songon on: “Muda adong sanga ise na mardosa, na so niuntilnia, gabe dilaosi ia sada sian angka parenta ni Tuhan, angkon ihutkononnia ma angka aturan on.

³ Muda Malim Godang do na mardosa i, pola dohot bangso i nisalahon hara ni i, angkon haulkononnia ma sada lombu jantan na poso na so martihas, anso disesa Tuhan dosania i.

⁴ Angkon obanonnia ma lombu i tu pintu ni Bandar Parmianan Ni Tuhan i. Payakkonon ni Malim Godang i ma tangannia tu ginjang ni ulu ni binatang i, lalu disambol ia di Bandar Na Badia.

⁵ Deba sian mudar ni lombu i, angkon obanonnia tu bagasan Bandar Parmianan.

⁶ Dung i disornopkon ia ma jari-jarinia tu mudar i lalu dipispiskon ia pitu noli adop tire na di jolo ni Poti Parjanjian i.

⁷ Angkon niapuskon muse ma saotik sian mudar i tu angka tanduk na di suhi-suhi ni langgatan i mardongan hamonyan na huskus na di bagasan Bandar Parmianan. Lobi ni mudar i angkon niusehon tu ojahan ni langgatan ni haul situtungon di balian ni Bandar Parmianan di jolo ni pintuna i.

⁸ Sian sude tabo-tabo ni lombu jantan i angkon paasingon ni malim i do tabo-tabo na mamaluti isi ni butuhana,

⁹ tabo-tabo na di piana, dohot pia na dua i dohot na jumeges sian ate-atena.

¹⁰ Angkon tutungon ni malim i ma sudena i di ginjang ni langgatan inganan ni haul situtungon, dos pambaenna songon na tu haul haluaan.

¹¹ Tapi sude bobakna dohot juhutna, uluna, patna, isi ni butuhana, masuk ma disi butuhana,

¹² sudena i angkon nioban tu balian ni parbandaran i dung i nitutung ma i di ginjang soban di inganan pangambungan ni abuan, i ma inganan na dung ias mangihutkon ugamo.

¹³ Muda sude do halak Israel mardosa, tapi dosa na so niuntil ni halahi gabe dilaosi sada sian parenta ni Tuhan,

¹⁴ jadi dung habotoan na mardosa halahi, angkon obanon ni bangso i ma sada lombu jantan na poso tu Bandar Parmianan Ni Tuhan. Disombahon ma binatang i gabe haul hasesaan ni dosa.

¹⁵ Angkon payakkonon ni angka hatobangon ni bangso i ma tanganna tu ginjang ni ulu ni pahan-pahanan i, dung i disambol ma di inganan i.

¹⁶ Dung i obanon ni Malim Godang i ma sabagian sian mudar i tu bagasan Bandar Parmianan.

¹⁷ Sornopkononnia ma disi jari-jarinia tu mudar i, lalu dipispiskon ia pitu noli adop jolo ni tire na di Poti Parjanjian i.

¹⁸ Saotik sian mudar i angkon diapuskon tu angka tanduk na di suhi-suhi ni langgatan hamonyan di Bandar Parmianan. Lobina i diduruskon tu ojahan ni langgatan inganan ni haul situtungon na di ruar ni Bandar Parmianan di jolo ni pintuna i.

¹⁹ Tabo-tabo ni pahan-pahanan i angkon diharuarkon do sude lalu ditutung di ginjang ni langgatan i.

²⁰ Pambaenna dos dohot na pasahat lombu jantan gabe haul hasesaan ni dosa. Songon i ma baenon ni Malim Godang i pasahat haul hara ni dosa ni bangso i, dung i sesaon ni Tuhan ma dosa ni halahi.

²¹ Dung i dioban ma lombu jantan i tu ruar anso ditutung di balian ni Bandar Parmianan. Pambaenna dos dohot na pasahat lombu jantan na gabe haul hasesaan ni dosa ni Malim Godang i sandiri. Songon i ma pambaenna laho pasahat haul hasesaan ni dosa ni bangso i.

²² Muda halak na mardosa i umpamana sahalak parpangkat, mardosa ia hara ni na mangalaosi sada sian parenta ni Tuhan so hara ni na niuntilnia.

^23-24 Disi tarboto dosania i tusia, angkon sigop ma haulkononnia sada hambeng jantan na so martihas. Payakkononnia ma tangannia tu ginjang ni ulu ni hambeng i, lalu disambol di topi ni langgatan sabola sian Utara, inganan panyambolan ni angka pahan-pahanan na gabe haul situtungon.

²⁵ Angkon disornopkon malim i ma jari-jarina tu bagasan mudar ni pahan-pahanan i jana diapuskon tu angka tanduk na di suhi-suhi ni langgatan i. Lobi ni mudar i diusehon ma tu ojahan ni langgatan.

²⁶ Dung i tutungon ni malim i ma sude tabo-tabo ni pahan-pahanan i di ginjang ni langgatan i. Pambaenna dos dohot pambaen ni haul haluaan. Songon i ma pangalahona laho pasahat haul hara ni dosa ni sahalak parpangkat, dung i sesaon ni Tuhan ma dosana i.

²⁷ Muda sahalak rayat na somal do umpamana mardosa, mangalaosi sada sian parenta ni Tuhan so hara ni na niuntilnia.

²⁸ Dung tarboto dosania i tusia, sigop ma haulkononnia sada hambeng boru-boru na so martihas.

²⁹ Angkon payakkononnia ma tangannia tu ginjang ni ulu ni hambeng i, lalu disambol ia ma i di topi sabola sian Utara ni langgatan haul situtungon, inganan panyambolan ni angka pahan-pahanan na gabe haul situtungon.

³⁰ Sornopkonon ni malim i ma jari-jarina tu bagasan mudar ni pahan-pahanan i lalu didaiskon ia tu angka tanduk na di suhi-suhi ni langgatan i, lalu diusehon ia mudar na lobi i tu ojahan ni langgatan i.

³¹ Tabo-tabo ni pahan-pahanan i angkon niharuarkon sude, songon na binaen tu haul haluaan i. Angkon tutungon ni malim i do tabo-tabo na di ginjang ni langgatan, anso jop roha ni Tuhan manganggo uapna i. Songon i ma pangalahona baenon ni malim i pasahat haul hara ni dosa ni sada rayat na somal, gabe sesaon ni Tuhan i ma dosana i.

³² Muda giot haulkonon ni sada halak sada biri-biri anso disesa dosana, angkon biri-biri boru-boru na so martihas do haulkononna.

³³ Angkon payakkononnia ma tangannia tu ulu ni pahan-pahanan i, lalu disambol ia ma i sabola sian Utara ni langgatan inganan ni haul situtungon, inganan panyambolan ni angka binatang na gabe haul situtungon.

³⁴ Sornopkonon ni malim i ma jari-jarina tu bagasan ni mudar i lalu didaiskon tu angka tanduk na di suhi-suhi ni langgatan i, jana mudar na lobi i disaburkon ma i tu ojahan ni langgatan i.

³⁵ Angkon diharuarkon do sude tabo-tabo ni pahan-pahanan i, songon na dibaen tu haul haluaan. Ditutung ma sude tabo-tabo i di ginjang ni langgatan i rap dohot haul sipanganon sisombahonon tu Tuhan. Songon i ma baenon ni Malim i pasahatkon haul hara ni dosa ni sada halak, dung i sesaon ni Tuhan ma dosana i.”