HAMALIMON 24 - BIBEL JAMITA NA DENGGAN

Mangurus lampu

¹ Didok Tuhan ma tu si Musa:

² “Parentahon ma tu bangso Israel, anso dioban halahi miak zetun na polin jana na dumenggan tu angka lampu na di Bandar Parmianan, anso denggan dipagara.

³ Ganop andospotang pagaraon ni si Harun ma lampu i jana padiaron do i gara lopus manyogot di Bandar Parmianan Ni Tuhan di balian ni tire donok tu Poti Parjanjian na di Bilik Na Sun Badia i. Paraturan on angkon patuluson tongtong lopus tu angka ari na ro.

⁴ Angkon pauli-ulion ni si Harun ma lampu i na di tiang lampu na sian sere na polin i. Angkon jagoonnia anso denggan taratur gara lampu i di bagasan Bandar Parmianan Ni Tuhan.”

Roti silehenon tu Debata

⁵ “Buat ma dua bolas kilogram topung, dung i pohul ma i gabe dua bolas.

⁶ Payakkon ma roti i susun dua baris, onom roti sabaris, di ginjang ni meja na nilampis dohot sere na polin na di adopan ni Bandar Parmianan Ni Tuhan.

⁷ Ganop baris roti i dibaen hamonyan na polin. Hamonyan i ma gonti ni roti, sanga tanda bahaso na dung dilehen roti i tu Tuhan gabe haul sipanganon.

⁸ Ganop Ari Sabat di sude hatiha na giot ro angkon baenon roti i di Bandar Parmianan Ni Tuhan. Angkon baenon ni bangso Israel songon i ro di salolotna.

⁹ Ia roti i di si Harun do i dohot di pomparannia. Angkon panganon ni halahi do i di inganan na badia. Angke roti i sabagian sian na sun badia sian sipanganon na nilehen tu Tuhan do i na gabe bagian ni malim.”

Debata dohot uhum pamaloson

^10-11 Di Bandar ni halak Israel adong ma sada halaklahi. Amangnia halak Mesir do, tapi inangnia halak Israel na margoar si Selomit, boru ni si Dibri sian Marga Dan. Di sada ari martangkang ma bayo i dohot sada halak Israel. Hatiha na martangkangi i diburai ia ma Debata. Hara ni i gabe dioban halak Israel ma ia tu jolo ni si Musa.

¹² Ditahan halahi ma ia painte ro haputusan sian Tuhan sanga aha na angkon baenon ni halahi tusia.

¹³ Didok Tuhan ma tu si Musa,

¹⁴ “Oban ma bayo i tu balian ni parbandaran. Ganop halak na dung umbege ibana mamurai, dipayakkon ia ma tanganna tu ulu ni bayo i manyaksihon na dung marsala bayo i. Dung i dangguran ni halak na bahat i ma ia dohot batu lopus mate.

¹⁵ Dung i paboa ma tu bangso Israel, sanga ise na mamurai Debata angkon taononnia parangenia i

¹⁶ jana mate uhumon. Sanga ise, halak Israel pe sanga halak na leban na tinggal rap dohot Israel, muda diburai ia Tuhan, angkon dangguran ni halak na bahat i ma ia dohot batu lopus mate.

¹⁷ Sanga ise mamunu halak na asing, angkon mate hona uhum.

¹⁸ Sanga ise mamunu pahan-pahanan ni halak na asing, angkon gontionnia. Ukuranna, i ma ‘hosa gonti ni hosa’.

¹⁹ Muda jabat margasa halak na asing dibaen sada halak, sanga songon dia dibaen ia, laing songon i ma baenon tusia.

²⁰ Muda mamonggolkon holi-holi ia, holi-holinia pe angkon niponggolkon muse. Muda mapitung ma sabariba mata ni halak dibaen ia, matania i pe angkon dipitungkon sabariba. Muda dipukul ia halak gabe taldus iponna, iponnia i pe angkon dipukul lopus taldus. Sanga aha pe bugang na binaennia tu halak na asing, angkon songon i baenon tusia balosna.

²¹ Sanga ise mamunu pahan-pahanan angkon digonti ia, tapi muda na mamunu jolma, angkon mate uhumon.

²² Mangonai do uhum on tu sude halak Israel, bope tu halak na leban na rap dohot hamu, angke Au do Tuhan Debatamu.”

²³ Dung didok si Musa songon i tu halak Israel, dioban halahi ma halak na mamurai Debata tu balian ni parbandaran lalu didangguri halahi dohot batu lopus mate. Songon i ma dibaen halak Israel patuluskon na dung didok Tuhan i tu si Musa.