HAMALIMON 20 - BIBEL JAMITA NA DENGGAN

Uhum tu angka na so mangoloi

¹ Disuru Tuhan ma si Musa

² mandok hata on tu bangso Israel, “Sanga ise sian tonga-tongamunu, sanga halak na leban na tinggal rap dohot hamu, mangalehen anakna gabe pangoloi di Debata Molok, angkon dangguran ni halak na bahat do i dohot batu lopus mate.

³ Muda adong sahalak na mangalehen anakna tu Debata Molok jabat gabe ramun Bandar Na Badia i jana palayas goarKu na badia i, Au ma alona jana nada etongon be i sada sian halakKu.

⁴ Muda paula-ula so diida halak na bahat do pambaenannia i jana nada dibaen halahi uhum hamatean tusi,

⁵ Au sandiri ma mangalo halakna i dohot sude na sakeluarga i bope sude halak na rap dohot ia maninggalkon Au gabe kehe manyomba Debata Molok. Nada Huetong be halak na songon i gabe sada sian halakKu hian.

⁶ Muda kehe sahalak mangido partolongan tu halak na mambaen pardomuan dohot angka tondi ni na mate angkon aloonKu do i jana nada etongonKu be ia halakKu.

⁷ Jago ma hamu anso tongtong badia hamu, angke Au do Tuhan Debatamu.

⁸ Patulus ma aturan na sian Au angke Au do Tuhan, na papunjungkon hamu baen di Au.”

⁹ Dilehen Tuhan dope deba nari angka aturan na mangihut muse, “Sanga ise na mamurai amana sanga inana, angkon mate uhumon. Hamamatenia i, i ma hara ni salania sandiri.

¹⁰ Muda markarosuan halak Israel dohot dadaboru ni donganna sabangso, halahi na dua, halaklahi dohot dadaboru i angkon rap mate uhumon.

¹¹ Sada halaklahi na marcampur dohot dadaboru ni amangna, gabe parohon tilako tu amangna. Halaklahi bope dadaboru i angkon mate uhumon. Hamamate ni halahi hara ni hasalaan ni halahi sandiri.

¹² Muda marcampur sada halak dohot parumaenna, halahi na dua angkon mate uhumon. Mangalaosi adat do halahi jadi hamatean ni halahi hara ni hasalaan ni halahi sandiri.

¹³ Muda adong sada halaklahi mambaen donganna halaklahi rap modom songon dadaboruna, halahi na dua rap mambaen karejo sihagigian, jadi halahi na dua angkon rap mate uhumon. Hamamate ni halahi, i ma hara ni sala ni halahi sandiri.

¹⁴ Muda adong sada halaklahi mardadaboruhon sada dadaboru dohot inang ni dadaboru i angkon mate tutungon halahi na tolu. Angke mangkarejohon karejo na so patut do halahi. Pangalaho na songon i nada tola adong ditonga-tongamunu.

¹⁵ Muda adong sada halaklahi markarosuan dohot binatang, angkon uhumon do ia dohot pahan-pahanan i.

¹⁶ Sanga ise dadaboru na markarosuan dohot binatang, angkon uhumon do ia dohot binatang i. Hamamate ni halahi, i ma hara ni sala ni halahi sandiri.

¹⁷ Sada halaklahi mambuat ibotona sanga iboto donganna saama sanga saina, angkon pailaon do halahi ditonga-tonga ni na bahat, dung i dipakehe sian halak na bahat. Hara ni na dung markarosuan ia dohot ibotona, hara ni i angkon manaon ia patundana.

¹⁸ Muda adong sada halaklahi na markarosuan dohot sada dadaboru na hatiha ro bulanna, angkon pakeheon halahi na dua sian halak na bahat, angke madung dilaosi halahi taringot tu haiason.

¹⁹ Muda adong sada halaklahi markarosuan dohot bujingna angkon rap manaon halahi na dua hara ni na mangalaosi aturan ni adat.

²⁰ Muda adong sada halak laho markarosuan dohot dadaboru ni kahanggi ni amangna na pailahon kahanggi ni amangnia i do i. Halaklahi i dohot dadaboru i angkon rap hona uhum, mate so dapotan anak halahi na dua.

²¹ Muda dipardadaboru sada halak dadaboru ni angkangna, angkon mate halahi taran so mardakdanak. Madung dikarejohon ia karejo na so patut jana palayas angkangna.”

²² Didok Tuhan ma: “Ihutkon hamu ma sude aturan dohot parentangKu anso ulang Huusir hamu sian tano Kanaan, i ma inganan na giot tusi obanonKu hamu.

²³ Ulang tiru hamu adat ni halak na tinggal disi. Magigi do Au mida pangalaho ni halak parbegu i, angke na jahat do karejo ni halahi. Hara ni i do dibaen na Huusir halahi saonnari, anso tarbaen hamu masuk tu luat i.

²⁴ Madung Hujanjihon bahaso tano na mora jana na napu i gabe hamu ma nampuna i, jadi lehenonKu ma i di hamu. Au do Tuhan Debatamu jana madung Hupaasing hamu sian angka bangso na asing i.

²⁵ Antong hara ni i angkon diboto hamu tangkas, angka binatang dia do na haram, jana dia do na so haram. Ulang pangan hamu binatang sanga unggas na haram. Madung Hudok na haram binatang i, jadi muda dipangan hamu i gabe ramun ma hamu.

²⁶ Madung Hupaasing hamu sian angka bangso na asing, anso gabe hum Au sajo nampuna hamu. Angkon badia do hamu angke Au do Tuhan, jana na badia do Au.

²⁷ Ganop halaklahi sanga dadaboru na mambaen pardomuan dohot tondi ni angka na mate, angkon dangguran dohot batu lopus mate. Hamamate ni halak na mambaen songon i, hara ni hasalaan ni halahi sandiri do i.”