HAMALIMON 15 - BIBEL JAMITA NA DENGGAN

Ramun na di pamatang ni jolma

¹ Dilehen Tuhan dope angka aturan tu si Musa dohot tu si Harun songon on

² di halak Israel: Aek na haruar sian hailaan ni halaklahi, ramun do i

³ bope na padiarkon manetehi sanga na nitahan di bagasan pamatang i.

⁴ Podoman na nijuguhan sanga na nipodoman ni halahi, ramun do.

^5-8 Sanga ise na dais tu halak na mangharuarkon same i sanga dais tu podomanna sanga juguk di inganan na dung nijuguhan sanga na nitijuran ni halahi, angkon basuonnia pakeanna lalu maridi, ramun ma ia lopus tu andospotang.

⁹ Palano sanga karosi na nijuguhan ni halak na mangharuarkon aekna i gabe ramun do.

^10-11 Sanga ise na dais sanga mangangkat bagi aha pe sian juguhan ni halak na songon i, sanga dijama ia so jolo dibasu ia tangannia, gabe ramun ma ia lalu tu andospotang. Angkon basuonnia ma pakeannia lalu maridi jana ramun do ia lalu tu andospotang.

¹² Huali tano na nijama ni halahi angkon taporkononkon do, jana mangkuk hayu na nijamania angkon dibasu.

¹³ Muda dung malum halak na mangharuarkon aekna i, angkon painteonnia pitu ari nari honokna. Dung i basuonnia ma pakeannia lalu maridi tu mual, gabe ias ma ia mangihutkon ugamo.

¹⁴ Di ari pasalapankon, obanonnia ma dua unggas darapati sanga unggas hatutu tu pintu ni Bandar Parmianan Ni Tuhan lalu pasahatkon tu malim.

¹⁵ Pasahaton ni malim i ma sada sian unggas i gabe haul hasesaan ni dosa, na asing i gabe haul situtungon. Songon i ma pangalahona patuluskon paiaskon diri mangihutkon ugamo di halak na songon i.

¹⁶ Muda sabur same ni halaklahi, angkon basuonnia sude pamatangnia, ramun do ia lalu tu andospotang.

¹⁷ Sanga barang aha sajo pe sian abit sanga bobak hadabuan ni samena i, angkon basuon; ramun do barang i lalu tu andospotang.

¹⁸ Muda dung marcampur halaklahi dohot dadaboru, angkon maridi do, tapi laing ramun do halahi lalu tu andospotang.

¹⁹ Dadaboru na dompak ro bulanna, ramun do ia pitu ari honokna. Sanga ise na dais tu dadaboru i ramun do ia lalu tu andospotang.

²⁰ Aha sajo na nijuguhi sanga na nipodomi dadaboru i salolot ro bulanna i, gabe ramun.

^21-23 Sanga ise na dais tu inganan na dung nipodoman sanga na nijuguhan ni daboru na ro bulanna i, angkon basuonnia pakeannia lalu maridi jana ramun do ia lalu tu andospotang.

²⁴ Muda marcampur sada halaklahi dohot sada dadaboru dompak ro bulanna, ramun do halaklahi i pitu ari honokna, podoman na nipodomanna i pe gabe ramun do i.

²⁵ Muda adong sada dadaboru na sai mangharuarkon mudar so hara ni haroro ni bulanna, sanga parro ni mudar i lumolot sian parro ni bulanna mangihutkon hasomalanna, salolot haruar mudar i ramun do halahi dos songon di haroro ni bulanna.

²⁶ Inganan na nipodoman sanga na dijuguhinia salolot songon i, ramun do i.

²⁷ Sanga ise dais tu inganan i gabe ramun. Angkon basuonnia pakeannia lalu maridi, ramun do ia lalu tu andospotang.

²⁸ Dung mantak mudar i, angkon painteon ni daboru i pitu ari nari. Dung i pe anso ias ia mangihutkon ugamo.

²⁹ Di ari pasalapankon angkon obanonnia ma dua darapati sanga hatutu tu malim i di pintu ni Bandar Parmianan Ni Tuhan.

³⁰ Sada sian unggas i angkon pasahaton gabe haul hasesaan ni dosa, na asing i gabe haul situtungon. Songon i ma pangalahona patuluskon haiason ni pamatang ni dadaboru i mangihutkon ugamo.

³¹ Disuru Tuhan do si Musa paingotkon halak Israel anso diparate-atehon halahi sanga andigan halahi ramun jana andigan na so ramun, anso ulang gabe dipahodar halahi Bandar Parmianan Ni Tuhan na di tonga-tonga ni parbandaran ni bangso i. Muda dipahodar halahi Bandar Na Badia i, angkon bunuon halahi.

³² Songon i ma angka paraturan tu halaklahi na mangharuarkon aekna sanga na sabur samena sian pamatangna,

³³ taringot tu dadaboru na ro bulanna dohot taringot tu halaklahi na marcampur dohot dadaboru na dompak ro bulanna.