HAMALIMON 14 - BIBEL JAMITA NA DENGGAN

Aturan paiaskon dung malum sian nyae kusta na maroban tu parmaraan

¹ Dilehen Tuhan i ma tu si Musa,

² angka aturan deba nari taringot tu na paiaskon sada-sada halak na dung malum sian nyae kusta na jahat i. Di ari panontuan ni na dung ias halak i angkon obanon ia tu malim.

³ Obanon ni malim i ma halahi tu balian ni parbandaran i anso dipareso ia. Muda na dung tutu do malum nyae i,

⁴ suruon ni malim i ma halak i maroban dua unggas na so haram, dohot samponggol hayu ares sian Libanon, sada tali na rara dohot saranting ruput hisop.

⁵ Unggas na sada angkon sambolon di ginjang ni huali tano na marisi aek na ias sian mual.

⁶ Unggas na sada nari rap dohot hayu ares, tali na rara dohot ruput hisop i, angkon sornopkononkon tu bagasan mudar ni unggas na dung nisambol i.

⁷ Mudar ni unggas i angkon pistikkononkon ni malim i pitu noli tu ginjang ni halak na dung malum i, dung i dohonon ni malim i ma na dung ias halakna i. Dung i unggas na mangolu i paluaon ma songon i.

⁸ Dung i angkon basuon ni halahi ma pakeanna, obukna pe angkon dicukur sude lalu maridi. Dung i ias ma ia, tola ma ia masuk tu parbandaran i, tapi pitu ari honokna nada tola ia masuk tu bandarnia sandiri.

⁹ Di ari papituhon angkon cukuronnia mangulahi ulunia, dung i janggutna, salibonna dohot sude imbulu na di pamatangnia angkon dicukur. Dung i angkon dibasu ia pakeannia lalu maridi. Dung i pe ias ma ia mangihutkon ugamo.

¹⁰ Di ari pasalapankon angkon obanon ni halahi ma dua anak ni biri-biri jantan, sada anak ni biri-biri boru-boru marumur sataon na so martihas, tolu kilogram topung na dung marcampur dohot miak zetun dohot sapartolu liter miak zetun.

¹¹ Dung i obanon ni malim i ma ia dohot sipasahatonnia i tu pintu ni Bandar Parmianan Ni Tuhan.

¹² Sada sian anak ni biri-biri jantan i dohot sapartolu liter miak zetun i buaton ni malim ma i pasahaton gabe haul gonti ni hararugi. Haul i ma songon silehen-lehen na mardohonan tu Tuhan, gabe malim i ma nampuna i.

¹³ Angkon sambolon ni malim i ma anak ni biri-biri i di inganan na badia, di inganan panyambolan ni pahan-pahanan na gabe haul hasesaan ni dosa dohot haul situtungon. Angkon disi do sambolon biri-biri i, angke haul gonti ni hararugi dohot haul hasesaan ni dosa, na badia situtu do i bope nampuna ni malim.

¹⁴ Buaton ni malim i ma saotik mudar ni biri-biri i laho mandaiskon tu pinggol siamun, tu ina ni jari tangan siamun dohot tu ina ni jari pat siamun ni halak na giot paboaon na dung ias i.

¹⁵ Dung i buaton ni malim i ma saotik sian miak zetun i laho mangusehon tu palakpak ni tangan siambirangna sandiri.

¹⁶ Dung i sornopkononnia ma sada jari tangan siamunnia tu miak i, lalu dipistikkon ia pitu noli di jolo ni Tuhan.

¹⁷ Dung i miak na saotik di tangannia i, angkon didaiskon dohot mudar, i ma tu pinggol siamun, tu ina ni jari siamun dohot tu ina ni pat siamun ni halak na giot paboaon na dung ias i.

¹⁸ Miak na lobi i angkon usehonon tu ulu ni halahi. Songon i ma pangalahona sibaenon ni angka malim di hatiha paiaskon diri di jolo ni Tuhan.

¹⁹ Dung i angkon haulkonon ni malim i do haul baen hasesaan ni dosa anso gabe ias halak na ramun i. Dung salpu i haulkononnia ma pahan-pahanan baen haul situtungon.

²⁰ Jana haulkononnia ma i rap dohot haul gandum di ginjang ni langgatan i. Songon i ma dibaen malim i laho manyesa dosa ni halahi, jadi gabe ias ma halahi.

²¹ Muda pogos do halahi, gabe nada tarhaulkon ia tolu pahan-pahanan songon na nitontuhon hian, jadi songon haul gonti ni hararugi tuk ma sada lombu jantan sajo obanonnia. I ma na gabe silehen-lehen na mardohonan tu Tuhan na gabe bagian ni malim. Anggo haul gandum tuk ma sakilogram topung gandum na dung marcampur miak obanonnia dohot miak zetun sapartolu liter.

²² Angkon obanonnia muse do dua darapati sanga hatutu, sada ma i gabe haul hasesaan ni dosa na sada nari gabe haul situtungon.

²³ Sude silehen-lehen sipasahaton i angkon obanon tu malim di jolo ni pintu ni Bandar Na Badia di ari hatiha paiaskon dirina.

²⁴ Anak ni biri-biri dohot miak zetun i buaton ni malim i ma i anso dipasahat i gabe silehen-lehen na mardohonan tu Tuhan, na gabe bagian ni malim i.

²⁵ Sambolon ni malim i ma anak ni biri-biri i, dung i saotik sian mudarna i diapuskon tu pinggol parsiamun, tu ina ni jari tangan siamun dohot tu ina ni jari pat siamun ni na dung diokui ias halakna i.

²⁶ Usehonon ni malim i ma saotik miak i tu bagasan tangan hambirangna sandiri,

²⁷ dung i jari-jari ni tangan siamunnia mamistikkon miak i pitu noli tu Bandar Parmianan Ni Tuhan.

²⁸ Saotik sian miak i angkon diapuskon tu angka inganan dos songon mudar nangkin, tu pinggol siamun, tu ina ni jari ni tangan siamun, tu ina ni jari ni pat siamun ni na dung niokuan ias halahi.

²⁹ Lobi ni miak na di tangan ni malim i diusehon ma i tu ulu ni halahi. Songon i ma pangalahona paiaskon diri mangihutkon ugamo.

³⁰ Dung i pasahaton ni malim ma sada sian darapati sanga hatutu i,

³¹ na gabe haul hasesaan ni dosa, jana na asing i gabe haul situtungon rap dohot haul gandum. Songon i ma pangalahona paiaskon diri mangihutkon ugamo.

³² Songon i ma pangalahona sibaenon tu halak na hona nyae kusta na jorbut i, tapi halak na so adong lehenonna gabe haul songon na dung ditontuhon laho paiaskon diri.

Angka na lapuhon di bagasan bagas

³³ Dilehen Tuhan ma tu si Musa dohot tu si Harun

³⁴ deba nari angka aturan taringot tu bagas na nilangkotan ni lapuk na rarat i. (Pakeon angka aturan on dung masuk halak Israel tu tano Kanaan, tano na giot silehenon ni Tuhan tu halahi.)

³⁵ Sanga ise na marnida na lapuhon di bagasan bagasna, angkon kehe do ia tu malim paboahon i.

³⁶ Taran so ro malim paresohon i, suruonnia ma paruarkon sanga aha na di bagas i. Muda so diharuarkon sandok na adong di bagasan bagas i etongon do na ramun. Dung i kehe ma malim tu bagas i

³⁷ laho paresohon na lapuhon i. Muda adong dapot tompana tarsongon na rata-rata marcampur rara, tarida songon na masuk tu dinding batu,

³⁸ angkon tinggalkonon ni malim i do bagas i dikunci pitu ari honokna.

³⁹ Di ari papituhon angkon ro ia paresohon mangulahi. Muda rarat na lapuhon i,

^40-41 parentahononnia ma anso sude batu na hona lapuk i diharuarkon, dung i sude dinding batu i sabola sian bagasan dihois. Pangkoisan i dohot angka batu nangkin, diambungkon ma i tu balian ni kota.

⁴² Dung i angka batu na diparuar i, gontion ma dohot batu na imbaru. Dingding batu ni bagas i angkon nilepo mangulahi.

⁴³ Muda ro mangulahi na lapuhon i, haru pe na dung diambungkon angka batu i, jana dingding tembok madung dihois jana dilepo mangulahi,

⁴⁴ angkon ro dope malim paresohon bagas i. Muda mur rarat do na lapuhon i, na ramun do bagas i.

⁴⁵ Jadi angkon dirumpakkon noma i. Angka batu, hayu dohot sude pangalepo ni bagas i angkon obanon tu balian ni kota, tu inganan na ramun.

⁴⁶ Taran so i dope, sanga ise na masuk tu bagas na nikunci i, gabe ramun lalu tu andospotang.

⁴⁷ Sanga ise na modom sanga mangan di bagas i, angkon dibasu ia pakeannia.

⁴⁸ Dung dilepo dohot kapur na imbaru bagas i, hape lapukna i nada ro be, angkon paresoon ni malim do bagas i mangulahi, jana dohonon na dung ias bagas i, hara ni na dung mago lapukna i sude.

⁴⁹ Anso tardok na dung ias bagas i mangihutkon ugamo, buaton ni malim ma dua unggas, hayu ares Libanon, tali na rara dohot ruput hisop.

⁵⁰ Unggas na sada sambolonna ma i di ginjang ni huali na marisi aek na tio sian mual.

⁵¹ Hayu ares, tali na rara, hisop dohot unggas na mangolu i, angkon disornopkon tu bagasan mudar ni unggas na dung disambol i dohot tu bagasan aek na lan i. Dung i dipispiskon tu bagas i pitu noli.

^52-53 Unggas na laing mangolu i paluaon ni malim i ma i tu balian ni kota. Songon i ma baenon ni malim paiaskon bagas i mangihutkon ugamo anso gabe inganan na ias mangihutkon ugamo.

⁵⁴ Songon i ma paraturan taringot tu nyae kusta na jorbut i,

^55-56 taringot tu lotuk, sibuk tubu na so pade, tihas na bontar, sanga na marbosar bope taringot tu na lapuhon di pakean sanga di bagas.

⁵⁷ Hasaya ni angka paraturan on laho manontuhon, na ramun sanga na ias mangihutkon ugamo.