HAMALIMON 13 - BIBEL JAMITA NA DENGGAN

Aturan taringot tu na marnyae kusta

¹ Dilehen Tuhan ma angka aturan tu si Musa dohot si Harun songon on.

² Muda adong na mahancit di huling-kuling ni sada halak umpamana: marbosar, marbutir-butir sanga pano, na gabe nyae ni huling-kuling na maroban tu parmaraan, angkon obanon do halak na songon i tu malim pomparan ni si Harun.

³ Angkon paresoon ni malim i do na mahancit na di huling-kuling i. Muda gabe bontar do imbulu na donok tu na mahancit i, jana umbagas idaon na mahancit i sian humaliangna, halak na hona nyae kulit parmaraan ma i. Jadi patorangon ni malim i ma bahaso na dung ramun halak i.

⁴ Tapi muda bontar idaon na mahancit i, nada pola umbagas idaon sian huling-kuling humaliangna, bope imbulu i pe nada pola bontar, angkon paasingon ni malim ma halak i pitu ari honokna.

⁵ Di ari papituhon angkon paresoon ni malim i mangulahi. Muda laing dos do rupa ni nyae i mangihutkon pandapot ni malim i nada mangalangkoti, angkon paasingon ma halahi pitu ari nari.

⁶ Di ari papituhon paresoon ni malim i ma mangulahi, muda mur mago na hancit i nada mur tamba, pabotohonon ni malim i ma paboa na dung ias halahi. Nyae ni huling-kuling na so pola parmaraan do i. Basuon ni halakna i ma pakeanna jana gabe ias ma ia.

⁷ Tapi muda mur manamba nyae i haru pe na dung didok malim na ias halakna i, angkon kehe mangulahi halahi paboahon tu malim.

⁸ Paresoon ni malim i ma mangulahi, muda tutu na dung mur tu raratna nyae i, dipabotohon ma na dung ramun halakna i; na dung huliton na gabe parmaraan do i.

⁹ Halak na hona nyae huliton na jorbut i, angkon obanon tu malim.

¹⁰ Paresoon ni malim ma halahi. Muda bontar do tompa ni huling-kuling na mahancit i, bope imbuluna bontar jana gok nana di na mahancit i,

¹¹ i ma halak na dung hona nyae huliton. Patorangon ni malim ma bahaso na ramun halahi. Nada pola angkon paasingon inganan ni halahi angke madung tangkas na ramun do ia.

¹² Muda mur manamba do tihas na bontar i, pola ditutup ia sian pat lalu tu ambubunia,

¹³ angkon paresoon ni malim i do mangulahi. Muda diida ia na dung sap sude pamatang ni halahi jana bontar sude huling-kulingna, na dung ias do halahi.

^14-15 Tapi muda tubu dope sibuk na so pade sian i, angkon paresoon ni malim mangulahi, muda tutu do i sibuk na so pade dohonon ma na ramun halahi, angke sibuk na so pade, i do tandana bahaso nyae i nyae na gabe parmaraan.

¹⁶ Tapi anggo dung malum sibuk na so pade i, gabe mulak bontar, angkon patidahononnia dope dirinia tu malim,

¹⁷ anso dipareso mangulahi. Muda dung tangkas na dung bontar sibuk na so pade i, dohonon ni malim i ma na dung ias halakna i.

¹⁸ Muda adong sada halak na baroon, tapi madung malum baro i,

¹⁹ hape di pudi gabe manggurbak jana bontar, sanga tihas i tarida antara ni na bontar dohot na rara, angkon kehe do halahi tu malim,

²⁰ anso dipareso. Muda umbagas do tihas i sian sibuk na humaliang i, bope imbulu na disi madung bontar, dohonon ni malim ma na ramun halahi. Baro i ma boncir ni nyae huliton na gabe parmaraan.

²¹ Tapi di hatiha na nipareso ni malim i baro i, nada bontar be imbulu i, bope tihas i nada pola umbagas sian sibuk na humaliang i tapi mur bontar tompana, paasingon ni malim i ma inganan ni halahi pitu ari honokna.

²² Muda mur martamba do tihas i, paboaon ni malim i ma na ramun halahi, angke hona nyae huliton na gabe parmaraan do i.

²³ Tapi anggo so adong muba ni tihas i jana nada mur bidang, hum tihas ni baro i sajo noma, na dung ias do halahi.

²⁴ Muda adong sada halak mahancit hara ni na mosok, dung i tarida di sibuk na mosok i antara ni na bontar dohot na rara,

²⁵ angkon paresoon ni malim do i. Muda bontar imbulu di bagian na mahancit i jana umbagas na mahancit i sian sibuk na humaliang, i ma nyae huliton na maroban tu parmaraan na dung langkot tu na mosok i, dung i dohonon ni malim ma na dung ramun halahi.

²⁶ Tapi anggo nada bontar imbulu na disi bope nada pola umbagas na mahancit i sian sibuk humaliangna i, tapi tompana mur torang, dung i paasingon ni malim ma inganan ni halahi pitu ari honokna.

²⁷ Di ari papituhon i paresoon ni malim i ma mangulahi, muda mur mabidang do na mahancit i, i ma halak na dung hona huliton na maroban tu parmaraan angkon dohonon ma ia na dung ramun.

²⁸ Tapi anggo laing songon i do tompa ni tihas i jana nada pola mur mabidang bope mur so tarida, nada huliton na maroban tu parmaraan i. Dohonon ni malim i ma na dung ias halak i angke hum hara ni na mosok do i.

²⁹ Sugari sura adong sada halaklahi sanga dadaboru na mangkalotuk uluna sanga isang-isangna,

³⁰ angkon paresoon ni malim do i. Muda umbagas do na mahancit i sian sibuk humaliangna, bope obuk na disi gabe gorsing jana ranggo, i ma tanda ni nyae kusta na maroban tu parmaraan, jadi angkon pabotohonon ma na dung ramun halahi.

³¹ Di hatiha na paresohon na hancit i malim i, nada pola umbagas sian sibuk humaliangna, tapi nada adong obuk na jeges disi, angkon paasingon do halahi pitu ari honokna.

³² Di ari na papituhon, angkon paresoon ni malim i ma na mahancit i mangulahi, muda nada manamba na mahancit i dohot angka obuk na disi nada pola gorsing, dung i nada pola umbagas na mahancit i sian sibuk humaliangna,

³³ angkon cukuron ma humaliang inganan ni na mahancit i. Dung i paasingon ni malim ma inganan ni halahi pitu ari honokna.

³⁴ Di ari papituhon, paresoon ni malim ma mangulahi, muda laing nada manamba na mahancit i, dung i muse nada umbagas na mahancit i sian sibuk humaliangna, pabotohonon ma na dung ias halahi jana angkon basuonnia pakeanna.

³⁵ Tapi muda mur manamba na mahancit i, hape madung didok ia na dung ias ia,

³⁶ angkon paresoon ni malim mangulahi. Muda tutu ma na mur mabidang na mahancit i, nada pola paresoon ni malim i obukna na dung gorsing, angke madung tangkas na dung ramun ia.

³⁷ Tapi muda so manamba na mahancit i mangihutkon pandapot ni malim, jana tutu do obuk na jeges disi, na dung malum ma na mahancit i, dohonon ni malim ma na dung ias halahi.

³⁸ Muda adong sada halaklahi sanga dadaboru na martihas-tihas na bontar di huling-kulingna,

³⁹ angkon paresoon ni malim do halakna i. Muda bontar langan do tompa ni tihas i, i ma pano na langkot tusia, dohonon do ias halakna i.

^40-41 Muda adong sada halaklahi na palpalon sabola sian pudi sanga sabola sian jolo di uluna, nada ramun halahi hara ni palpalna i.

⁴² Tapi anggo tubu tihas antara na bontar dohot na rara-rara di palpalna i, i ma na dung hona kusta na maroban tu parmaraan.

⁴³ Angkon paresoon ni malim do halahi, jana muda adong do tutu tihas na bontar rara-rara,

⁴⁴ dohonon ni malim ma na ramun halahi, na dung nyae kusta na maroban tu parmaraan hara ni nyae di uluna.

⁴⁵ Sahalak na hona kusta na jorbut i, angkon pakean na masuak-suak do pakeonnia jana padiaron obukna nada nisuri, angkon tutuponnia do di toru ni bohina jana marsurak-surak mandok: “Ramun, ramun!”

⁴⁶ Salolot diae ia nyae i, ramun do ibana. Angkon di balian ni parbandaran do ingananna, dao sian halak na asing.

Aturan taringot tu na lapuhon

⁴⁷ Muda adong pakean na lapuhon sanga abit aha pe sian wol sanga linen,

⁴⁸ sanga angka sipaulion gabe barang pakean sian bobak.

⁴⁹ Muda rata-rata do tompa ni lapuk i sanga rara-rara, i ma tandana na dung mabidang na lapuhon i, angkon patidahononkon do i tu malim.

⁵⁰ Paresoon ni malim ma barang i lalu dipaasing ia pitu ari honokna.

⁵¹ Di ari papituhon paresoon ni malim ma mangulahi. Muda mur manamba do na lapuhon i, i ma tandana na ramun barang i.

⁵² Angkon tutungon ni malim ma barang i, hara ni na martamba-tamba do lapukna i, hara ni i angkon ditutung tu api.

⁵³ Tapi muda diida malim na paresohon i, hape nada martamba lapuk ni barang i,

⁵⁴ disuru basu ia ma i jana dipaasing ia pitu ari honokna.

⁵⁵ Dung i dipareso malim mangulahi. Muda so muba tompa ni lapuk i haru pe nada manamba, na ramun do barang i, hara ni i angkon nitutung do i, nada marimbar haru sabola sian pudi sanga sian jolo na lapuhon i.

⁵⁶ Tapi di hatiha dipareso malim i mangulahi lapuk i, hape madung balsom, angkon suakkononnia ma na marlapuk di abit sanga bobak i.

⁵⁷ Dung i muda ro mangulahi lapuk i, angkon tutungon ni nampuna i do barang i.

⁵⁸ Muda dung dibasu, tihas na di barang i gabe mago, angkon basuon ma barang i mangulahi, disi pe taretong na dung ias.

⁵⁹ Songon i ma angka aturan taringot tu na lapuhon na dapot di pakean linen sanga wol sanga di barang aha sajo pe na binaen sian bobak.