HAMALIMON 11 - BIBEL JAMITA NA DENGGAN

Angka binatang na halal dohot na haram

¹ Dilehen Tuhan ma tu si Musa dohot tu si Harun angka aturan songon on:

^2-3 tu bangso Israel. Angka binatang na mangolu di darat, na mangalngei jana marbola tambirikna, sude binatang na songon i na halal do i, tola panganon.

^4-6 Tapi anggo unto, landuk sanga kelinci nada tola panganon. Binatang na songon i haram do etongon, angke haru pe mangalngei tapi nada marbola tambirikna.

⁷ Babi nada tola panganon. Na haram do i etongon, angke haru pe marbola tambirikna, anggo babi nada mangalngei.

⁸ Angka binatang na songon i nada tola panganon sanga dais tu bangkena, angke na haram do binatang i.

⁹ Sude ragam ni ihan na marhapi-hapi jana marsisik, tola do panganon.

^10-12 Sude ragam ni binatang na mangolu di bagasan aek, tapi nada marhapi-hapi bope nada marsisik, na haram do i etongon. Angka binatang na songon i nada tola panganon, sanga dais tu bangkena nada tola.

^13-19 Ulang pangan hamu sada pe sian angka unggas on: unggas rajawali, sipauk, sude ragam ni halihi nasar, gawak, burung unto, camar, blekok dohot sude ragam ni sibarung, rande, haluang dohot arip-arip.

^20-23 Sude binatang na menek-menek na marhabong bope mangincir na haram do i etongon, asing ma muda na mangambur. Jadi siapor, sigurindik dohot siapor na rata tola do panganon.

^24-28 Gabe hodar do sada halak lopus tu andospotang muda dais ia tu angka binatang on: binatang na martambirik (asing ni na marbola tambirikna jana mangalngei) dohot binatang si opat pat na adong sisilonna panjomak. Sanga ise na maroban bangke ni binatang na songon i, angkon basuonna do pakeanna, tapi laing etongon dope ia na hodar lopus tu kotu magorip.

^29-30 Monci tano, monci na godang, monci na menek dohot pelang, tohuk, sigulandak, jobar, bengkarung, keong, bunglon, angkon haram do i etongon.

³¹ Barang ise na dais tu binatang i sanga tu bangkena pe, gabe hodar do i lopus tu andospotangna.

³² Muda madabu bangke ni binatang sisongon i tu sada barang, etongon ma haram barang i. Sanga tu aha pe dipargunahon barang i, nada gabe soal i, tapi tongtong do hodar barang i painte so disornomkon tu aek. Songon i pe i, laing haram do barang i painte andospotang. Mangonai do on tu sude barang na nibaen sian hayu, abit, bobak sanga harung abit.

³³ Muda madabu bangke na songon i tu bagasan huali na nibaen sian tano, sude na adong di bagasan huali i gabe hodar hara ni i angkon taporkononmunu do huali i.

³⁴ Sipanganon na somal tarpangan hape madung hona aek sian nangkin, gabe hodar bope sanga aha pe siinumon di bagasan huali na songon i gabe hodar.

³⁵ Sanga na tudia madabu bangke i, gabe hodar. Dalihan dohot parapian na nibaen sian tano angkon ditaporkon.

³⁶ Sanga aha pe na hona tu bangke i gabe hodar, asing ma mual dohot sumur. Di bagasan na songon i, sumur dohot mual i angkon ias do i etongon.

³⁷ Muda madabu bangke na songon i tu same na giot saburkononkon, same i tongtong do ias etongon.

³⁸ Tapi muda hatiha dirondam same i di pangarondaman hape madabu bangke i tusi, gabe hodar ma same i.

³⁹ Muda dais halak tu bangke ni binatang na halal, gabe ramun ma ia lopus tu andospotang.

⁴⁰ Muda dipangan halak bangke ni binatang na songon i sanga na ahana pe dipangan ia, angkon dibasu ia pakeannia, jana hodar do ia lopus tu andospotang.

⁴¹ Pahan-pahanan na menek na mangolu di tano,

⁴² bope binatang na mangincir, siopat pat sanga sibahat pat haram do i.

⁴³ Ulang nipahodar diriniba hara ni na mangankon angka pahan-pahanan na songon i.

⁴⁴ Au do Tuhan Debatamu, hara ni i jago ma anso tongtong badia hamu, angke na badia do Au.

⁴⁵ Au do Tuhan na maroban hamu ruar sian Mesir, anso gabe Au Debatamunu. Angkon badia do hamu angke na badia do Au.

⁴⁶ Antong songon i ma angka aturan taringot tu angka binatang dohot angka unggas, taringot tu sude binatang na mangolu di bagasan aek dohot sude binatang na manggulot di tano i.

⁴⁷ Tangkas ma pareso hamu, dia do na ias mangihutkon ugamo jana halal, bope dia na kotor mangihutkon ugamo jana haram.