HAMALIMON 10 - BIBEL JAMITA NA DENGGAN

Dosa ni si Nadab dohot si Abihu

¹ Di na sadari, ro ma angka anak ni si Harun, i ma si Nadab dohot si Abihu, rap mambuat inganan ni apina be, lalu mangisi banggar tusi. Ditambahon halahi dope hamonyan tu api i, dung i dipasahat halahi ma i tu Tuhan. Tapi nada badia api i angke nada na nisuru ni Tuhan halahi pasahatkonsa.

² Tuhan i sandiri do parohon api na manutung halahi lalu mate disi, di Bandar Parmianan Ni Tuhan.

³ Didok si Musa ma tu si Harun, “On ma pikiran ni Tuhan i di na nidokNia, ‘Sude halak na giot mangoloi Au angkon pasangaponna do Au angke sasada Au do Debata. Giot patuduhononKu hamuliaonKu tu bangsongKu.’ ” Tapi hohom do si Harun.

⁴ Dung i dipio si Musa ma si Misael dohot si Elsafan, i ma anak ni si Usiel, tulang ni si Harun. Didok si Musa ma tu halahi, “Ro ma hamu, buat hamu ma bangke ni sisolhotmunu i sian Inganan Na Badia jana payakkon hamu tu balian ni parbandaran i.”

⁵ Dung i ro ma halahi, ditiop halahi ma angka bangke i laing markameja lalu dioban halahi tu balian ni parbandaran, songon na nidok ni si Musa.

⁶ Dung i didok si Musa ma tu si Harun dohot tu angka anakna na laing mangolu dope, i ma si Eleasar dohot si Itamar, “Ulang padiar hamu obukmunu nada nisuri, sanga manyuakkon pakeanmu songon na patidahon marsakmunu. Muda dibaen hamu songon i, angkon mate hamu, bope sude bangso Israel angkon muruhan ni Tuhan. Tapi sude halak Israel na asing i, tola do marsak manangisi sidua halak, na mate dibaen api ni Tuhan i.

⁷ Ulang haruar sian pintu ni Bandar Parmianan ulang mate hamu, angke di hatiha mangalehen miak, madung nipatumbuk hamu gabe pangoloi di Tuhan i.” Dung i dioloi halahi ma parenta ni si Musa i.

Aturan ni angka malim

⁸ Didok Tuhan ma tu si Harun,

⁹ “Dung salpu minum aek ni anggur sanga bir, dohot angka anakmu nada tola masuk tu Bandar Parmianan i. Muda dilaosi hamu aturan i angkon mate hamu. Sude pomparanmu angkon mangoloi aturan on.

¹⁰ Angkon diboto ho haasingan ni sanga aha na dung ditontuhon tu Debata, sanga aha tu halak na bahat, antara ni na so ramun tu na ramun.

¹¹ Sude tona na dung Hulehen di ho marhite si Musa, angkon ajarkononmu tu bangso Israel.”

¹² Didok si Musa ma tu si Harun dohot tu anakna na dua i, i ma si Eleasar dohot si Itamar, “Buat ma haul gandum na lobi sian sipanganon na dung dipasahat tu Tuhan. Baen ma roti na so marragi sian topung i, dung i pangan ma roti i di lambung ni langgatan i, angke haul na badia do i.

¹³ Pangan ma roti i di sada inganan na badia, i ma bagianmu Harun dohot angka anakmu halaklahi sian sipanganon na dung dipasahat tu Tuhan i. I do parenta ni Tuhan i tu au.

¹⁴ Tapi anggo ho dohot angka anakmu halaklahi bope dadaboru, tola do panganonmu andora dohot pat pudi ni pahan-pahanan na dihaulkon i songon silehen-lehen na mardohonan tu Tuhan di angka malim. Tola do panganonmunu i sanga di dia inganan na ias mangihutkon ugamo. Silehen-lehen na nipasahat on, dilehen di ho dohot di angka anakmu na gabe bagianmunu sian haul haluaan ni bangso Israel.

¹⁵ Pat na pudi dohot andora ni pahan-pahanan i, angkon taruhonon ni halahi tu hamu, hatiha dipasahat tabo-tabona i gabe haul sipanganon tu Tuhan. Angka bagian on gabe bagianmu dohot angka anakmu ma i sapanjang, songon na nidok ni Tuhan i hian.”

¹⁶ Dung i disapai si Musa ma sanga di dia do hambeng na gabe haul hasesaan ni dosa. Dipaboa halak ma tusia na dung ditutung do pahan-pahanan i. Hara ni i gabe muruk ma si Musa tu si Eleasar dohot si Itamar. Didok ia tu halahi.

¹⁷ “Biasi nada dipangan hamu haul hasesaan ni dosa i di sada inganan na badia? Na badia do haul i, madung dilehen Tuhan do i di hamu, anso disesa sude dosa ni halak Israel.

¹⁸ Dibaen nada dioban hamu mudar ni pahan-pahanan i tu inganan na badia, angkon panganonmunu do patutna haul i disi, songon na dung Hudok tu hamu.”

¹⁹ Dung i dialusi si Harun ma, “Nada he na dung dipasahat halak Israel do sadari on haul hasesaan ni dosa, haul situtungon tu Tuhan? Tapi haru songon i pe, sitaonon on laing au do manaon i. Sugari sura ma na dung hupangan sadari on haul hasesaan ni dosa i, hapengani nada pola mambaen sumonang Tuhan i.”

²⁰ Sombu ma roha ni si Musa umbege alus i.