HAKIM-HAKIM 8 - BIBEL JAMITA NA DENGGAN

Hatatalu ni halak Midian

¹ Didok halak Efraim ma tu si Gideon, “Biasi nada dipio hami di na kehe ho laho mamorangi halak Midian? Aha do dalanna umbaen songon i hami dibaen ho?” Songon i ma diungutkon halahi tu si Gideon.

² Tapi dialusi si Gideon ma, “Sanga aha na hubaen i nada bagi aha dope i martimbangkon na dung nibaenmunu. Hum saotik do dibaen hamu nian, tapi na saotik i pe dao do ummarga sian sude na dung dibaen ni sude parangan na sian margangku.

³ Hamu do na dapotan kuaso sian Debata gabe tarbaen hamu mambunu si Oreb dohot si Zeeb pamimpin ni Midian na dua i! Dipartimbangkon dohot i, aha ma he jasa na hubaen?” Dung didok si Gideon songon i, nada muruk be halahi.

⁴ Laing di hatiha i lalu ma si Gideon dohot anak buania sitolu ratus halak di bariba ni Batang aek Jordan. Ma loja sajo halahi nian tapi laing torus dope mangkojar musu.

⁵ Dung i lalu ma halahi di Sukot. Didok si Gideon ma disi tu halak kota i, “Tolong hamu ma jolo mangalehen saotik panganon di anak buakon. Ma loja sajo halahi hapengani na mangkojar si Zebah dohot si Salmuna raja ni Midian dope.”

⁶ Tapi dialusi angka pamimpin na di Sukot i ma, “Ah, so ditangkup hamu dope antong si Zebah dohot si Salmuna, ma mangido mangan hamu! Aha ma he gunana lehenon mangan anak buami?”

⁷ Jadi gabe didok si Gideon ma, “Antong denggan! Muda dung dilehen Tuhan naron di au hamonangan maradopkon si Zebah dohot si Salmuna, sambohonku ma hamu dohot duri sihupi na sian parhorsihan i!”

⁸ Dung i ditoruskon si Gideon ma pardalanan lopus lalu tu Pnuel. Disi laing dipangido ia ma sipanganon di anak buania i. Hape sarupa muse do alus ni halak Pnuel dohot alus ni halak Sukot.

⁹ Jadi hara ni i gabe didok si Gideon ma tu halahi, “Muda mulak au naron horas torkis, disi ma rumpakkononku palas-palas ni kota on.”

¹⁰ Di hatiha i topet ma si Zebah dohot si Salmuna dohot angka tentarania i sude di Karkor. Sian sude parangan ni angka halak parhorsihan i, hum hira-hira lima bolas ribu halak sajo noma na tinggal; ma hona bunu tentarania i saratus dua pulu ribu halak na marsinjatahon podang.

¹¹ Dijujur si Gideon ma parbatasan ni parhorsihan na di Habincaran ni Nobah dohot Jogbeha lalu ompot ma musu i diserang ia.

¹² Marlojong ma si Zebah dohot si Salmuna raja ni Midian na dua i tapi dikojar si Gideon ma halahi jana ditangkup, jadi gabe masarsar ma parangan ni halahi i hara ni biarna.

¹³ Dung i di pardalanan laho mulak sian parporangan i, sian dalan panangkohan Heres ma dibolus si Gideon.

¹⁴ Ditangkup ia ma disi sada halak doli-doli na sian Sukot, lalu disapai ia ma bayo i taringot tu angka goar-goar ni angka pamimpin dohot hatobangon ni kota na di Sukot. Jadi disuratkon bayo i ma angka goar-goar i di si Gideon – pitu pulu pitu halak sudena.

¹⁵ Dung i didapotkon si Gideon ma angka hatobangon na di kota i lalu didok ia, “Ligi bo, indon ma si Zebah dohot si Salmuna. Pasti laing diingot hamu dope, na so ra hamu manolong au hara ni na so hutangkup i dope ia, atehe? Umpe ra hamu mangalehen panganon di anak buangki; hape di bagasan na loja do halahi di hatiha i.”

¹⁶ Dung i dibuat si Gideon ma duri dohot sihupi sian parhorsihan, lalu dilibas ia ma angka hatobangon ni kota Sukot i.

¹⁷ Di Pnuel pe dirumpakkon ia ma palas-palas jana dibunu ia sude halaklahi na di kota i.

¹⁸ Dung i disapai si Gideon ma si Zebah dohot si Salmuna, “Bia do angka jolma na nibunumunu na di Tabor i?” Dialusi si Zebah ma dohot si Salmuna, “Suman do halahi sude tu ho, songon pomparan ni raja-raja.”

¹⁹ “Angka kahanggingku do i – angka dakdanak ni dainang,” ning si Gideon. “Songon sintong ni na mangolu Tuhan, sugari nada dibunu hamu halahi, bagi na bia pe nada pola giot bunuonku hamu.”

²⁰ Dung i didok si Gideon ma tu si Jeter, anaknia siangkaan, “Tole, bunu ma halahi!” Tapi poso dope si Jeter. Jadi, mabiar do ia gabe nada disintak ia podangnia laho mambunu.

²¹ Didok si Zebah dohot si Salmuna ma tu si Gideon, “Tole ma da, ho pe mambunu hami. Patuduhon ma paboa na jantan do ho!” Jadi dibunu si Gideon ma halahi lalu dibuat ia ma sude parhiasan na adong di rungkung ni unto ni halahi.

²² Dung i didok halak Israel ma tu si Gideon, “Madung dipalua ho hami sian kuaso ni halak Midian. Jadi hara ni i, ho noma da antong pamimpinnami – ho dohot pomparanmu.”

²³ Alus ni si Gideon, “Nada. Nada gabe au pamimpinmunu; dakdanakku pe inda. Tuhan do na gabe pamimpinmunu.”

²⁴ Tapi dung i didok si Gideon ma muse, “Hum sada do pangidoanku; anting-anting na nirampasmunu sian musu i angkon pasahatonmunu sudena i tu au.” (Somalna mamake anting-anting sere do halak Midian; laing songon angka jolma na maringanan di parhorsihan.)

²⁵ “Denggan,” ning halahi mangalusi, “sian jop ni rohanami ma mangalehen i tu ho.” Dung i dipahembang halahi ma sada abit, lalu marroan ma pasada-sada mamayakkon angka anting-anting na nirampas ni halahi sian musu i di abit i.

²⁶ Mardonok do tu dua pulu kilogram sude anting-anting sere na dipasahat i tu si Gideon di hatiha i, nada dohot dope disi angka parhiasan, borgok, abit na ungu na nipake ni raja-raja ni Midian, dohot borgok angka na dapot di rungkung ni unto ni halahi i.

²⁷ Dipauli si Gideon ma sian sere i sada patung ni gana-ganaan, dibaen ia ma i di hutania, i ma di Ofra. Kehe ma tusi sude halak Israel laho marsomba gana-ganaan i, jabat nada diparrohahon halahi be Debata. Jana pangalaho i ma na gabe songon jorgong di si Gideon dohot di keluargania.

²⁸ Anggo halak Midian nada tolapsa be manggulot; ma talu halahi dibaen halak Israel. Jadi gabe aman ma luat i opat pulu taon lolotna, salolot di ngolu ni si Gideon.

Hamamate ni si Gideon

²⁹ Dung parporangan i, mulak ma si Gideon tu huta hagodangannia jana disi ma ia maringanan.

³⁰ Adong do anaknia halaklahi pitu pulu halak, harana bahat do dongan saripenia.

³¹ Adong muse do radingnia di Sikem; sian radingnia on adong do anaknia sada halaklahi na nigoarannia si Abimelek.

³² Dung matobang situtu pe umurnia anso marujung ngolu ni si Gideon anak ni si Joas i. Di kuburan ni si Joas amangnia i do ia dikubur. Di Ofra do kuburan i, i ma di kota ni Marga Abieser.

³³ Dung mate si Gideon, nada be setia halak Israel tu Debata. Marsomba tu angka Debata Baal noma halahi jana dibaen halahi ma Baal-Berit gabe debata ni halahi.

³⁴ Nada be maribadat halahi tu Debata, Tuhan ni halahi, na dung paluahon halahi sian kuaso ni sude musu na humaliang halahi.

³⁵ Nada muse dibalos halahi na denggan maradopkon keluarga ni si Gideon hara ni sude jasa ni si Gideon tu halak Israel.