HAKIM-HAKIM 6 - BIBEL JAMITA NA DENGGAN

Gideon

¹ Mardosa sanoli nari halak Israel tu Tuhan, jadi gabe dipadiar Ia ma bangso Midian mangarajai halahi pitu taon honokna.

² Jana hara ni gogona halak Midian i, markehean ma halak Israel martabuni tu angka liang dohot tu angka inganan na asing na aman di angka dolok.

³ Boti muse, ganop dung sidung manyuan gandum angka partani ni Israel, marroan ma halak Midian rap dohot halak Amalek dohot angka halak na sian parhorsihan mangaroro halak Israel.

⁴ Marbandar di luat ni Israel halahi jana diabisi halahi sude suan-suanan disi lopus tu luat di na humaliang Gasa na di Selatan. Songon i biri-biri pahanan, lombu dohot halode ni halak Israel dioban lari. Sangkibung pe nada adong ditadingkon, gabe nada adong be sanga aha panganon di halak Israel.

⁵ Marudut-udut marroan angka jolma i dohot unto bope kemah ni halahi sun bahatna – nada taretong hara ni bahatna. Marroan halahi manyegohon luat i,

⁶ jana nada tarbaen halak Israel bagi aha maradopkon halahi. Dung i pio-pio ma halak Israel tu Tuhan.

⁷ Dung i pio-pio ma halak Israel mangido Tuhan manolong halahi mangalo halak Midian.

⁸ Diutus Tuhan ma sada halak panurirang tu halahi. Didok panurirang i ma, “Songon on ma pandok ni Tuhan, Debata ni Israel: ‘Madung Hupalua hamu sian parhatobanan di Mesir.

⁹ Madung Hupalua hamu sian halak Mesir dohot sian angka jolma na di luat on na mamorangi hamu. Ma pola Huusir halahi sian luat on di na ro halahi mamorangi hamu, lalu Hulehen tano ni halahi i di hamu.

¹⁰ Madung Hudok tu hamu bahaso Au do Tuhan Debatamunu, dohot na so tola hamu marsomba angka debata ni bangso Amori na niingananmunu tanona i saonnari. Hape nada diihutkon hamu parentangKu.’ ”

¹¹ Sanoli ro do Surusuruan Ni Tuhan di desa Ofra, lalu juguk di toru ni hayu ara nampuna ni si Joas, sada halak na sian golongan ni Marga Abieser. Na topet manggiling gandum di panggilingan anggur do anak ni si Joas on, na margoar si Gideon. Anso ulang diida halak Midian do umbaen na martabuni-tabuni dibaen ia songon i.

¹² Ro ma Surusuruan Ni Tuhan i mandapotkon ia jana didok ma, “O doli-doli na jagar! Rap dohot ho do Tuhan!”

¹³ “Tola dehe au marsapa Tuan? ning si Gideon mangalusi. Muda tutu Tuhan mandongani hami, antong biasi didondoni angka pangalaho on hami? Di dia do sandok hahomangan na jungada dibaen Tuhan najolo i jana na nicaritohon ni angka ompu na umpompar hami sanga songon dia pangharuarkon ni Tuhan di halahi sian Mesir? Saonnari madung ditadingkon Tuhan hami jana dipadiar Ia hami dirajai angka halak Midian.”

¹⁴ Dung i dilehen Tuhan ma parenta on tu si Gideon, “Kehe ma ho dohot sude hagogoanmu paluahon halak Israel sian kuaso ni halak Midian. Au do na marsuru ho.”

¹⁵ Dialusi si Gideon ma, “Biasi au, Tuhan? Dia ma mungkin au paluahon bangso Israel sian kuaso ni halak Midian? Sian Marga Manase, horong na masuk tu au ma na gumale. Jana sian hami na sakoum pe au muse ma na soadana artina.”

¹⁶ “Pasti bisa do ho!” ninna Tuhan, “angke Au do na giot mangurupi ho. Mura do ropukkononmu angka halak Midian i tarsongon na mangadopi sada halak sajo baenonmu.”

¹⁷ Dialusi si Gideon ma, “Muda na tutu situtu do au tumbuk di roha ni Tuhan, cubo ma jolo mangalehen tanda bahaso na tutu do Tuhan mangkobari tu au.

¹⁸ Pangidoanku, sobar ma jolo Tuhan dison lopus huparade sipanganon di Tuhan.” “Denggan,” ninna Tuhan, “Hupainte pe lopus mulak ho.”

¹⁹ Jadi mulak ma si Gideon, dilompa ia ma sada hambeng jara-jara, dibuat ia ma sampulu kilogram topung, dung i dibaen ia ma roti na so marragi. Dung salpu i dibaen ia ma juhut i di bagasan karanjang, jana kuana i di bagasan hudon, lalu dioban ia ma sudena i jana dipatupa ia tu Surusuruan Ni Tuhan i na paintehon di toru ni bona ni ara i.

²⁰ Didok Surusuruan Ni Tuhan i ma, “Payakkon ma roti dohot juhut i di ginjang ni batu on lalu duruskon ma kua ni juhut i tu ginjangna i.” Dibaen si Gideon ma songon na diparentahon i tusia.

²¹ Dung i disurduhon Surusuruan Ni Tuhan i ma tanganna, digoitkon Ia ma dohot ujung ni hayu na nitiopNia juhut dohot roti i. Gara ma batu i lalu abis ma mosok juhut dohot roti i. Dung i mago ma Surusuruan i.

²² Mamoto ma si Gideon, bahaso Surusuruan Ni Tuhan sandiri do hape na ro i mandapotkon ia. Jadi mardongan biar didok si Gideon ma, “Marjaya ma au, ale Tuhan Na Humincat! Dibaen madung maradopan bohi au dohot SurusuruanMu!”

²³ Tapi didok Tuhan ma tusia, “Horas ma da ho! Ulang ho mabiar. Nada jabat mate ho.”

²⁴ Lalu dipajongjong si Gideon ma disi sada langgatan jana digoari ia ma i, “Tuhan do mual ni hasonangan.” Laing adong dope langgatan i di Ofra, i ma kota ni halak Abieser.

²⁵ Di borngin i dilehen Tuhan ma parenta tu si Gideon songon on, “Buat ma lombu jantan ni amanta hamu i, i ma lombu na paduahon na marumur pitu taon. Bungkar ma langgatan ni Baal na nipajongjong ni amanta i, lalu rumpakkon ma tiang na manggambarkon Dewi Asera na di lambung ni langgatan i.

²⁶ Pajongjong ma di ginjang ni harumpahanna i sada langgatan na dung tangkas denggan dirancang. Dung i angkon tutungonmu ma haul tu Tuhan, i ma lombu jantan i himpal ulang dilapa-lapa, tiang na manggombarkon Dewi Asera na nirumpakkonmi ma pake gabe sobanna.”

²⁷ Jadi dialap si Gideon ma hatobannia sampulu halak lalu kehe ma ia patuluskon na niparentahon ni Tuhan i tusia. Tapi hara ni biarnia maradopkon halahi sabagas dohot angka jolma na di hutania i, nada puluk ia mangkarejohon i arian-arian. Jadi borngin do dipatulus ia i.

²⁸ Di na ngot halak kota i ancogot manyogotna i, diida halahi ma langgatan na tu Baal dohot tiang na manggombarkon Dewi Asera i madung marumpak. Diida halahi muse ma na dung dipajongjong di inganan i sada langgatan jana na dung ditutung disi lombu jantan gabe haul.

²⁹ Marsisapa-sapaan ma halahi sama halahi, “Parbuatan nise dehe on?” Dung disihiri, dapot halahi ma, si Gideon anak ni si Joas i do hape nampuna karejo disi.

³⁰ Dung i didok halahi ma tu si Joas, “Madung dirorak anakmu langgatan ni Baal jana dirumpakkon ia tiang na manggombarkon Dewi Asera na di lambungna i. Hara ni i, oban ma anakmi tu ruar on. Angkon mate i!”

³¹ Tapi dialusi si Joas ma tu angka na mangalap-alapi i tusia, “Di pihak ni Baal dehe hamu? Na giot mambela ia do hamu? Ise na di pihaknia, bunuon ma sadari on! Anggo Baal do antong Debata, padiar ma ia sandiri mambela dirinia, angke langgatannia do na dirorak i.”

³² Hara ni na nidok ni si Joas, “Padiar ma Baal sandiri mangalo si Gideon, dibaen madung dirorak ia langgatanna,” jadi sian hatiha i digoari halak ma si Gideon “Jerubaal”.

³³ Di hatiha i madung marlagut sude halak Midian, Amalek dohot angka horong ni bangso na di parhorsihan na di Habincaran ni Jordan. Ditaripari halahi ma Batang aek Jordan jana marbandar halahi di Rura Jisreel.

³⁴ Tapi si Gideon pe dirajai Tondi Ni Tuhan ma, gabe diombus ia ma sarune laho marpio angka halak na sian Marga Abieser anso ro marlagut dohot ia.

³⁵ Disuru ia muse ma utusan tu Marga Aser, Zebulon, dohot Naftali dohot tu Marga Manase – na di Habincaran bope na di Hasundutan ni Batang aek Jordan. Halahi pe madung marroan laho mangihutkon ia.

³⁶ Dung i didok si Gideon ma tu Debata, “Tuhan, madung didokkon Ho na ra do Ho mamake au laho paluahon halak Israel.

³⁷ Antong, di ginjang ni tano on, inganannami na somal mambanting gandum, ma hupayakkon dison panggustingan ni imbulu ni biri-biri. Ancogot muda hum imbulu ni biri-biri on sajo do na maraek dibaen ombun jana tanona i nada, gabe i ma buktina bahaso na giot pakeonMu au laho paluahon halak Israel.”

³⁸ Gabe tarjadi ma songon i: Di na ngot si Gideon manyogotna i diporo ia ma imbulu ni biri-biri i, dapot ia ma aek samangkuk.

³⁹ Jadi didok ia ma tu Debata, “Tuhan, ulang muruk Ho muda laing mangkuling au saonnari. Paloas ma au mambaen sada nari pancuboan marhite imbulu ni biri-biri on. Tapi anggo sanoli on, imbulu ni biri-biri on ma nian sugari na tongtong mahiang, hape tanona i gabe maraek.”

⁴⁰ Di borngin i dipatulus Debata ma na nipangido ni si Gideon i, ancogotna i manyogot, tutu do mahiang imbulu ni biri-biri i, hape anggo tanona i maraek do hara ni ombun.