HAKIM-HAKIM 5 - BIBEL JAMITA NA DENGGAN

Ende ni si Debora dohot si Barak

¹ Di ari i marende ma si Debora dohot si Barak anak ni si Abinoam, songon on:

² Puji Tuhan! Marsumpa do Israel laho marjuang; sian ias ni rohana kehe rayat i marporang.

³ Angka raja dohot parkuaso tangihon hamu ma, marende au di Tuhan Debata, ni Israel.

⁴ Tuhan, di na mardalan Ho ruar sian Seir, dohot Luat Edom ditadingkon Ho, humotar portibi. Angka bubusan ni langit pe marbuka, jana diduruskon angka ombun ma aekna.

⁵ Di jolo ni Tuhan, Sinai, angka dolok mabiar di adopan ni Debata ni Israel, halahi pe mabiar.

⁶ Di hatiha ni si Samgar anak ni si Anat, songon i di hatiha ni si Jael, nada adong pardalan-dalan be di luat on, soada pardalanan di dalan godang.

⁷ Mangalungun do angka kota ni Israel lopus ro ho, ro ho, Debora gabe ina di tano Israel.

⁸ Di na marsomba Israel tu debata na asing, porang pe mapultak, nada adong na marsinjata sian na opat pulu ribu halak.

⁹ Hamu angka panglima Israel, hupasangap do hamu. Puji Tuhan! Sian jop ni rohana dilehen halahi dirina gabe haul.

¹⁰ O hamu na mangalombut halode na bontar, hamu muse na juguk di ginjang ni ambal, dohot hamu sude na mardalan pat, pajojor hamu ma barita hamonangan on, da.

¹¹ Tangihon! Di lambung ni angka sumur marendei halak na ribur. Paboa-boahon hamonangan ni Tuhan marpupu, hamonangan na nilehenNia tu bangsoNia! Lalu marbaris ma halak ni Tuhan tu horbangan ni kota.

¹² Jongjong ma si Debora jana tangging na marende i. Jongjong bo ho Barak anak ni si Abinoam, iring ma angka tahanan i.

¹³ Marroan angka na barani na teba mandapotkon pamimpinna, ro pe bangso ni Tuhan na rade do marporang diSia.

¹⁴ Sian Efraim torus manuat halahi mardalan tu rura, mangihutkon parangan ni Benyamin na marbaris di jolona. Marroan sian Mahir angka panglima, dohot sian Zebulon marjongjongan ma angka perwira.

¹⁵ Marroan pangituai ni Isakar rap dohot si Debora, olo da, ro Isakar, jana dohot muse do si Barak. Diihutkon halahi ma ia manuat di rura, hape pandapot ni Marga Ruben marbola.

¹⁶ Biasi tinggal di antara ni biri-biri halahi? Na giot umbege parmahan do marpio pahan-pahananna i? Marbola ma da pandapot ni Marga Ruben, giot ro sanga nada, dia do dibaen.

¹⁷ Halak Gilead maringanan di bariba ni Batang aek Jordan, jana Marga Dan biasi tinggal di kapal-kapal? Marga Aser juguk di topi ni laut, umpe ra ia morot sian angka solok-soloknia.

¹⁸ Hape Zebulon dohot Naftali marsitutu marporang di tongtangan.

¹⁹ Marporang halahi di lambung ni mual Megido, di Taanak, marporang raja-raja ni Kanaan, tapi nada dirampassa perak.

²⁰ Angka bintang na di langit pe dohot do marporang, sian inganan parhusoranna halahi mamorangi si Sisera.

²¹ Mangalantap Batang aek Kison mangayup musu, maju, torus ma manggogo maju, ale tondingku.

²² Matupakpak pat ni kudo maradu hipas marsiadu, mangaronggur tano i hara ni pardalanna na marpacu.

²³ “Burai ma Meros,” ninna Surusuruan Ni Tuhan, “Burai ma dohot pangisina, harana nada ro halahi mangurupi Tuhan, mangurupi Tuhan songon pahlawan.”

²⁴ Maruntung ho Jael, ripe ni si Heber halak Keni, sian sude dadaboru na mangingani bandar, umbahat di ho antong pasupasu i.

²⁵ Mangido aek si Sisera, susu do dilehen disia, dadi di mangkuk, i do na patut di raja-raja.

²⁶ Dohot pantik-pantik bope di tanganna bosi potuk-potuk dipaku si Jael si Sisera lopus ulu i malantuk.

²⁷ Di pat ni si Jael bustang ia nada marhosa payak di tano i ro ajalna.

²⁸ Manatap inang ni si Sisera, jana manggora sian jarojak ni jandela, biasi karetana inda unjung mulak? “Biasi angka karetana inda podo tarbege?”

²⁹ Mangalusi ma na umbisuk sian na uli bulung pangoloina tapi di bagasan rohana sandiri dapotsa do alusna,

³⁰ “Na marbagi-bagi barang na dapot dirampas do halahi, ganop parajurit mandapot dua be bujing-bujing. Disi Sisera ma bahan ni baju na ummarga, salendang sulaman na marragam tompa ma tu rungkung ni ratu.”

³¹ Sai mate ma nian angka musuMu, Tuhan, songon si Sisera, tapi sude donganMu sai magodang ma songon mataniari di angkasa. Dung i i sonang ma luat i opat pulu taon lolotna.