HAKIM-HAKIM 4 - BIBEL JAMITA NA DENGGAN

Si Debora dohot si Barak

¹ Dung mate si Ehud, mardosa ma mangulahi bangso Israel tu Tuhan.

² Gabe dipadiar Tuhan halahi talu dibaen si Jabin raja ni Kanaan na maringanan di kota Hasor. Si Sisera na maringanan di Haroset-Hagoyim do panglima ni tentara i.

³ Adong do sambilan ratus kareta porang na sian bosi di si Jabin. Dua pulu taon honokna ia manjajah halak Israel, i noma kejamna. Dung i pio-pio ma halahi mangido tolong tu Tuhan.

⁴ Di hatiha i, sada panurirang dadaboru do na mamimpin Israel, na margoar si Debora, dadaboru ni si Lapidot.

⁵ Somalna sai juguk do si Debora di toru ni bona ni kurma, antara ni Rama dohot Betel, na di partoran Efraim. Jana, disi ma halak Israel marroan laho mangido sipaingot tusia.

⁶ Sanoli disuru ia ma halak mamiohon si Barak, anak ni si Abinoam na sian kota Kedes na di Luat Naftali. Dung i didok ia ma tu si Barak, “On ma parenta ni Tuhan, Debata ni Israel tu hamu: ‘Palagut ma sampulu ribu halak halaklahi sian Marga Naftali dohot Zebulon, jana oban ma halahi tu Dolok Tabor.

⁷ Giot baenonKu annon si Sisera panglima ni tentara ni si Jabin i ro dohot tentarania i dohot angka kareta porangna i mandapotkon hamu di Batang aek Kison laho mamorangi hamu. Tapi na giot lehenonKu do hamonangan di hamu di parporangan i.’ ”

⁸ Didok si Barak ma tu si Debora, “Muda dohot ho, ra do au kehe. Tapi anggo nada, au pe nada ra kehe.”

⁹ Dialusi si Debora ma, “Antong denggan! Dohot ma au! Tapi ingot da, nada ho na mandapot hasangapan i. Markite-hite sada dadaboru ma Tuhan manaluhon si Sisera.” Jadi kehe ma si Debora dohot si Barak tu Kedes.

¹⁰ Jana diarahon si Barak ma Marga Zebulon dohot Naftali tu Kedes. Adong ma sampulu ribu halak bahatna di hatiha i na mangihutkon si Barak dohot si Debora.

¹¹ Di hatiha i, madung disirang si Heber halak Keni i dirina sian bangsonia. (Bangso Keni, i ma pomparan ni si Hobab, tunggane ni si Musa.) Ma kehe si Heber on mamasang angka bandarnia di lambung ni harangan tusam na di Zaanaim, nada pola sadia dao sian Kedes.

¹² Disi dibege si Sisera na dung kehe si Barak tu Dolok Tabor,

¹³ dipalagut ia ma kareta porangnia na sian bosi na sambilan ratus i, rap dohot sude pasukannia i lalu disuru ia halahi sian Haroset-Hagoyim tu Batang aek Kison.

¹⁴ Dung i ninna si Debora ma tu si Barak, “Tole bo, maju ma! Tuhan ma mamimpin ho. Di ari on ma dilehen ia hamonangan di ho maralohon si Sisera.” Jadi manuat ma si Barak sian Dolok Tabor rap dohot dongannia sisampulu ribu halak i,

¹⁵ dung i diserang halahi ma si Sisera. Jana dipasarsar Tuhan ma sude pasukan ni si Sisera i dohot angka kareta porangna gabe mijur ma si Sisera sian karetana i lalu marlojongi mardalan pat.

¹⁶ Dikojar si Barak ma angka kareta porang dohot pasukan ni musu i lopus tu Haroset-Hagoyim lalu dibunu ia sude pasukan ni si Sisera i; umpe sahalak dipadiar mangolu.

¹⁷ Jadi anggo si Sisera madung lari tu kemah ni si Jael, dadaboru ni si Heber, halak Keni i, angke na mardongan do Raja Jabin na sian Hasor dohot dongan sabagas ni si Heber i.

¹⁸ Diparro ni si Sisera i, ro ma si Jael mangalo-alo ia mandok, “Beta ma tuan, masuk ma da tu kamarku; ulang pola mabiar.” Jadi masuk ma si Sisera tu bagasan bandar i lalu ditabunihon si Jael ma ia di balik ni tire.

¹⁹ Didok si Sisera ma tu si Jael, “Tolong ma jolo lehen saotik aek di au siinumon; manguas au.” Jadi dibuka si Jael ma kantongan kulit, inganan panyimpanan ni susu. Dung dilehen ia minum si Sisera, dibunihon ia ma mangulahi tu balik ni tire i.

²⁰ Dung i didok si Sisera ma tu si Jael, “Kehe ma ho jongjong di jolo ni pintu ni bandar i. Muda adong halak na ro jana marsapa tu ho sanga na adong halak dison, dok ma, inda.”

²¹ Hara ni lojana si Sisera jabat mondohondok ia lalu tarpodom sinok sajo. Dibuat si Jael ma sada bosi potuk-potuk dohot pamantik ni bandar i sada, jana disisipi ia ma mandonohi si Sisera, dung i disusukkon ia ma pamantik i bagas tu parsontinganna i lopus tombuk tu tano. Songon i ma dibaen si Jael mambunu si Sisera.

²² Di na ro si Barak manjalahi si Sisera, ro ma si Jael mangalo-alo si Barak jana didok ia ma tusia, “Beta ma anso hupatuduhon tu ho halak na nijalahanmi.” Masuk ma si Barak dohot si Jael, diida ia ma madung mate si Sisera, gampalang di tano, pantik susuk-susuk ni bandar i di parsontinganna i.

²³ Dilehen Tuhan ma di ari i hamonangan tu halak Israel maradopkon si Jabin, raja ni Kanaan i.

²⁴ Mur honok mur disosak halak Israel ma raja i lopus mate ia ujungna.