HAKIM-HAKIM 18 - BIBEL JAMITA NA DENGGAN

Si Mika dohot Marga Dan

¹ Di hatiha i, nada adong raja di Israel, jana sian angka marga ni Israel, nada mandapot tano dope Marga Dan. Jadi na manjalak-jalahi tano dope halahi sibaenon gabe luat ni halahi.

² Dipili halahi ma lima halak angka na barani situtu sian sude angka horong ni marga ni halahi na maringanan di Zora dohot di Estaol. Dilehen ma karejo ni silima halak i laho manangkasi luat i dohot pamanat-manatkon halak na maringanan disi. Jadi kehe ma halahi jana lalu ma di luat partoran na di tano Efraim. Marborngin di bagas ni si Mika ma halahi.

³ Dibege halahi ma mangecet disi doli-doli ni Levi i jana ditandai halahi do pangkataina. Jadi marsapa ma halahi tusia, “Biasi dison ho? Aha karejomu? Ise maroban ho?”

⁴ Dialusi doli-doli i ma, “Giot ni si Mika do on. Na nigajinia do au gabe malim.”

⁵ Jadi didok halahi ma tusia, “Antong anggo songon i, tolong ma jolo sapai tu Debata sanga na marhasil do langkanami on sanga nada.”

⁶ Dialusi malim i ma, “Ulang hamu gamang. Madung dipartuai Tuhan langkamunu on.”

⁷ Jadi kehe ma silima halak i tu Lais. Diparrohahon halahi ma angka halak na maringanan disi. Torang ma antong, anggo parngoluon ni halak Lais i dos do dohot parngoluon ni bangso Sidon. Haru pe dao halahi sian bangso i jana pinjil, aman jana sonang do ngolu ni halahi, nada adong musuna, sonang, boti nada adong na hurang sanga na aha pe.

⁸ Di na mulak silima halak i mandapotkon marga ni halahi di Zora dohot Estaol, dipangido ma halahi mangalehen laporan.

⁹ Jadi didok halahi ma, “Tole ma! Hita porangi kota Lais. Madung hami ida tano i, tung mansai jeges do. Ulang ma ngongong sajo hita, kehe ma hita tusi laho mambuat tano i.

¹⁰ Muda lalu hamu tusi, dapotonmunu ma disi bangso na so hurangan sanga aha pe, bidang do tano i, jana tuk do disi sanga aha giot ni rohaniba. I ma tano na dumenggan di tano on. Madung dilehen Tuhan i tu hamu.”

¹¹ Jadi gabe kehe ma sian Zora dohot Estaol onom ratus halak Marga Dan. Marsinjata na lengkap do

¹² halahi kehe tu Hasundutan ni Kiryat-Jearim na di tano Juda lalu disi ma halahi marbandar. I ma dalanna umbaen na laing digoari inganan i Parbandaran Ni Dan.

¹³ Sian i mardalan ma halahi torus tu luat partoran Efraim lopus tu bagas ni si Mika.

¹⁴ Didok mata-mata silima halak na salpu i ma tu angka donganna i, “Diboto hamu dehe na adong di sada sian bagas on patung na marlampis perak? Adong muse dope angka patung na asing dohot Efod. Pikiri hamu ma jolo sanga na aha do sibaenonta.”

¹⁵ Jadi kehe ma halahi tu bagas ni si Mika, tu bagas inganan ni doli-doli Marga Levi i jana dijalang halahi ma ia.

¹⁶ Anggo tentara ni Dan na onom ratus halak i na marsinjata i singkop, ma jongjong di pintu ni horbangan.

¹⁷ Manigor masuk ma tu bagas i anggo silima halak mata-mata i jana dibuat halahi ma patung hayu na marlampis perak i dohot angka patung na asing i dohot efod i. Laing jongjong do di hatiha i anggo doli-doli Marga Levi i rap dohot sionom ratus tentara i di pintu ni horbangan i.

¹⁸ Jana dompak na masuk i silima halak i tu bagas ni si Mika jana dibuat halahi efod dohot angka patung ni gana-ganaan i, marsapa ma doli-doli Marga Levi i, “Na giot mahua dehe hamu dison?”

¹⁹ Dialusi halahi ma, “Sip ma ho, tutup pamanganmi! Ulang ho manyapai. Ihutkon sajo ma hami, gabe malim dohot panuturinami ma ho sanoli on. Timbang gabe malim ni sada ripe, gumonan ma ho gabe malim ni sada marga!”

²⁰ Sonang do roha ni doli-doli Marga Levi i di hata i. Jadi dibuat ia ma efod dohot angka patung ni gana-ganaan i lalu diihutkon ia ma halahi.

²¹ Dung i dipatorus halahi ma pardalanan ni halahi, di jolo ma angka dakdanak, pahan-pahanan dohot angka barang-barang ni halahi.

²² Jadi dung dao halahi, dipiohon si Mika ma angka hombar bagasnia mangayak halahi. Dung dapot halahi angka Marga Dan i,

²³ marsurak-surak ma si Mika tu halahi. Manaili ma angka Marga Dan i jana disapai halahi ma si Mika, “Aha do? Biasi songon i bahat ni jolma on?”

²⁴ Dialusi si Mika ma, “Ulang ma paula so diboto hamu! Nada he, hamu mambuat angka patung dohot malimna i jana dilarihon hamu? Saonnari nada adong be bagi na ahangku!”

²⁵ Didok angka halak Dan i ma, “Gumonan ma sip ho. Anggo inda, gabe muruk ma naron angka jolma on hantamon jana bunuonna ma ho dohot sude isi ni bagasmu.”

²⁶ Dung i ditoruskon angka halak Dan i ma pardalanan ni halahi. Diida si Mika dao do gumogo halahi ulang ia, jadi ia pe mulak noma.

²⁷ Dung dioban angka halak Dan i malim i dohot barang-barang na dibaen ni si Mika i, kehe ma halahi mamorangi Lais, kota na gok hasonangan i ma kota na di rura Bet-Rehob. Dibunu halahi ma angka halak na di kota i, jana disurbu ma kota i.

²⁸ Nanggo adong sahalak pe na mangurupi halahi harana dao do Lais sian Sidon, jala nanggo adong pardomuan ni halahi dohot bangso na asing. Dipature halak Dan i ma muse kota i jala maringanan ma halahi disi.

²⁹ Dipauba halahi ma goar ni kota i gabe Dan mangihutkon goar ni ompu na umpompar halahi, i ma si Dan anak ni si Jakob.

³⁰ Dibaen halahi ma disi patung ni gana-ganaan na nioban ni halahi i lalu diangkat halahi ma si Jonatan anak ni si Gersom, pahompu ni si Musa, gabe malim ni halahi. Hot do pomparan ni si Gersom on gabe malim ni Marga Dan i lopus tu hatiha di na hona oban halak Israel jana dibuang tu tano na asing.

³¹ Anggo patung na nibaen ni si Mika i hot do di Lais, salolot laing di Silo Bagas Ni Debata.