HAKIM-HAKIM 17 - BIBEL JAMITA NA DENGGAN

Angka patung na nisomba ni si Mika

¹ Adong ma sada halaklahi na margoar si Mika. Maringanan di luat partoran na di tano Efraim do ia.

² Sanoli didok ia ma tu inangnia, “Inang! Dompak na magoan inang saribu saratus hepeng perak, hubege diburai inang do na manangko i. Di au do hepeng i, au do na mambuatsa.” Dialusi inangnia i ma, “Sai dipasupasu Tuhan ma da ho, anakku!”

³ Dipaulak ia ma hepeng perak i tu inangnia, gabe ninna inangnia i ma: “Anso ulang hona bura ho anakku, hupasahat ma hepeng i tu Tuhan. Anso dipake i mambaen sada gana-ganaan sian hayu na dilampis dohot perak. Jadi saonnari hupaulak ma tu ho hepeng perak i.”

⁴ Tapi laing dipaulak ia do hepeng perak i tu inangnia. Dibuat inangnia i ma dua ratus hepeng perak i jana dilehen ma i tu tukang perak, giot mambaen sada gana-ganaan sian hayu jana dilampis dohot perak. Jadi dipayakkon si Mika ma patung i di bagasnia.

⁵ Si Mika sandiri pe na dung adong do sada inganan parsombaannia jana dibaen ia angka patung ni gana-ganaan dohot sada efod. Madung diangkat ia muse do sahalak anaknia gabe malim.

⁶ Di hatiha i nada adong raja ni bangso Israel; marsibaen roha-rohana be do ganop jolma.

⁷ Laing di hatiha i adong ma sada halak doli-doli sian Marga Levi jana marasal sian kota Betlehem na di tano Juda.

⁸ Madung kehe ia sian Betlehem jana mardalan ma ia laho manjalahi tano siinganan na asing. Di pardalanan i, lalu ma ia di bagas ni si Mika di luat partoran Efraim.

⁹ Disapai si Mika ma tusia, “Sian dia dehe ho dongan?” Dialusi bayo i ma, “Halak Levi sian Betlehem na di Juda do au. Na manjalak-jalahi tano siinganan do au.”

¹⁰ Didok si Mika ma, “Dison sajo ma ho maringanan, anso ho gabe panuturi dohot malimnami. Hulehen pe di ho muse pakean dohot panganon songon i muse sampulu hepeng perak ganop taon.”

¹¹ Satuju ma doli-doli i, jana tinggal ma ia di bagas ni si Mika, dibaen ma ia songon anakna sandiri.

¹² Diangkat si Mika ma ia gabe malimna jana maringanan di bagas ni si Mika.

¹³ Jadi ninna si Mika ma, “Antong, saonnari madung pos rohangku sai baenon ni Tuhan ma na denggan tu au, angke madung adong sada halak Levi di au na gabe malim.”