HAKIM-HAKIM 16 - BIBEL JAMITA NA DENGGAN

Si Simson di Gasa

¹ Sanoli kehe ma si Simson tu Gasa. Marsuo ma ia disi dohot sada boru jalang lalu kehe ma ia rap modom dohot anak boru i.

² Jadi gabe tarboto ma tu halak Gasa hape na disi si Simson. Jadi dihobuk halahi ma inganan i jana dipainte halahi ma ia saborngin i di horbangan ni kota i. Nada adong sanga aha dibaen halahi anggo di borngin i harana dipikir halahi, “Laing na matehononta noma ia muda bincar mataniari.”

³ Hape nada torus tu manyogot si Simson modom disi. Tarsunggul ia tonga borngin lalu kehe ia tu horbangan ni kota i, dung i diumpat ia ma horbangan i sude dohot angka tiangna dohot angka goruk-gorukna sanoli mangumpat. Diporsan ia ma pintu horbangan i di abarania lalu dioban ma i tu puncut ni tor di bariba ni Hebron.

Si Simson dohot si Delila

⁴ Dung i disolom mata ni si Simson ma sada anak boru sian Rura Sorek. Si Delila goar ni anak boru i.

⁵ Jadi ro ma lima halak na markuaso ni Pilistin mandapotkon anak boru i mandok, “Elek-elek ma si Simson anso diboto ho rahasia ni hagogoannia dohot sanga na bia baenon anso ulang margogo ia. Ro ma hami muse manambat dohot manaluhon ia. Jana marsilehen ma hami tu ho saribu saratus be hepeng perak.”

⁶ Jadi didok si Delila ma tu si Simson, “Simson, hara ni aha dehe umbaen na songon i gogomu? Aha do rahasia ni i, cubo ma jolo paboa! Angkon aha do baenon panambatmu anso ulang margogo?”

⁷ Dialusi si Simson ma, “Muda ditambat au dohot pitu tali jorat na baru na so mahiang situtu dope gale ma au jana dos songon halak na asing.”

⁸ Jadi dilehen angka na markuaso ni Pilistin i ma tu si Delila pitu tali jorat na imbaru na so sadia hiang dope. Dung i, taran manambat si Simson dope si Delila dohot tali i.

⁹ Anggo halak Pilistin i paintehon ma di bilik na asing. Lalu didok si Delila ma, “Simson! Ma ro halak Pilistin i!” Manigor do dipargotapkon si Simson angka tali jorat i. Mangkagotap tali i songon pargotap ni bonang na hona api. Jadi, laing nada habotoan dope rahasia ni si Simson i.

¹⁰ Dung i didok si Delila ma tu si Simson, “Ah, margabus do ho! Dipargonjak ho sajo do au. Tole ma da, caritohon ma antong tu au sanga na aha do baenon panambatmu!”

¹¹ Dialusi si Simson ma, “Anggo ditambat au dohot tali na imbaru na so jungada dipake dope, gabe gale ma au jana songon halak na somal.”

¹² Taran paintehon halak Pilistin i di bilik na asing, dibuat si Delila ma sanga na piga tali na imbaru, lalu ditambat ia ma si Simson. Dung i marsurak ma ia, “Simson! Ma ro halak Pilistin!” Hapengani digotapkon si Simson angka tali i sian tangannia songon na manggotapkon bonang dibaen ia.

¹³ Jadi ninna si Delila ma tu si Simson, “Saonnari laing dipargonjakkon ho dope au. Margabus ho. Paboa ma da, sanga dohot aha do ho tambaton!” Dialusi si Simson ma, “Muda dipadomu dandanan ni obukku na pitu on, dung i diikat tu hupang, gale ma au jana gabe halak na somal.”

¹⁴ Gabe dipapodom si Delila ma si Simson lalu dipadomu ia ma dandanan ni obuk ni si Simson na pitu i gabe sada. Dung i ditambatkon ia ma tu hupang lalu pio-pio, “Simson! Ma ro halak Pilistin!” Ngot ma si Simson, ditarikkon ia ma obuknia lopus taldus sian hupang i.

¹⁵ Dung i didok si Delila ma tusia, “Ah, anggo pandokmu holong do rohamu di au hape anggo rohamu dao do sian au! Ma jabat tolu noli antong dipargonjakkon ho au, jana lopus saonnari laing so dipaboa ho dope biasi songon i gogomu.”

¹⁶ Dipupu si Delila ma ganop ari murngis-urngis dohot mangelek-elek, lopus loja si Simson umbegesa.

¹⁷ Ujungna dicaritohon si Simson ma rahasia i. “Na dipasahat do au tu Debata gabe hapunjunganNia. Nada tola ulungku hona cukur, dibaen na dung gabe sada halak nasir do au. Muda digotap obukkon, mago noma hagogoonki boti gale ma au jana gabe halak na somal.”

¹⁸ Dihilala si Delila madung dipaboa si Simson rahasia ni rohania i. Jadi hara ni i ditongos ia ma barita on tu angka na markuaso ni Pilistin, “Laing ro ma da hamu sanoli nari on. Madung dipaboa si Simson rahasia ni rohania i.” Jadi ro ma halahi maroban hepeng baen di si Delila.

¹⁹ Dung i diapus-apus si Delila ma si Simson lopus tarpodom di ampuannia, lalu dipiohon ia ma halak jana disuru ia manggotap dandanan ni obuk ni si Simson na pitu i. Gabe mago ma hagogoan ni si Simson i. Dung i digorahon si Delila ma si Simson,

²⁰ ning ia ma, “Simson! Ma ro halak Pilistin!” Ngot ma si Simson jana diambang ia tarbaen malua dope ia songon di hatiha na salpu-salpu i. Nada diboto ia bahaso na dung ditadingkon Tuhan do ia.

²¹ Gabe ditangkup halak Pilistin ma ia jana diholuk anak ni matana i. Dioban halahi ma ia tu Gasa jana ditambat halahi ma ia dohot rante tumbaga lalu dipamasuk ma tu bagasan hurungan. Disuru ma ia disi markarejo manggiling.

²² Tapi laing maginjang muse ma di hatiha i obuknia.

Hamamate ni si Simson

²³ Sanoli marlagut ma angka na markuaso ni Pilistin giot marpesta dohot pasahatkon haul marsitutu tu Dagon, debata ni halahi. Marende ma halahi, “Madung dilehen debatanta i hamonangan di hita maralohon si Simson, musunta i!”

²⁴ Dung diida halak na bahat si Simson, dipuji halahi ma Dagon jana marende, “Madung dilehen debatanta i di hita hamonangan adop musunta na manyegohon luatta dohot na mamatehon bahat sian hita!”

²⁵ Songon i ma jop ni roha ni halahi, gabe didok halahi ma, “Dioban ma da si Simson tuson anso taparmayam-mayam ia.” Jadi gabe dialap ma si Simson sian hurungan jana disuru ma ia jongjong di antara dua tiang na bolon lalu diparmayapkon halahi ma ia.

²⁶ Didok si Simson ma tu dakdanak na manogu ia, “Padiar ma marsitiopan au tu angka tiang na mambaen jongjong bagas on, anso tarbaen au marsisande disi.”

²⁷ Marsompit do di bagasan bagas i halak. Jana disi muse do silima halak na markuaso ni Pilistin i. Jana di tirket ni bagas i adong do hira-hira tolu ribu halak. Manonton ma halahi sude dohot mangincahi si Simson.

²⁸ Di hatiha i martangiang ma si Simson; didok ia ma, “Ale Tuhan Debata, sai ra ma Ho jolo marningot au. Laing lehen ma jolo hagogoon di au sanoli nari on, o Debata, anso laing tarbaloskon au sakali on pambaenan ni angka halak Pilistin on na mangholuk anak ni matangkon dua-dua.”

²⁹ Dung i ditiop si Simson ma tiang tonga na dua i, na mambaen jongjong bagas i. Di na marsitiopan dohot tangannia siambirang tu tiang na sada dohot tangan siamunnia tu tiang na sada nari,

³⁰ pio-pio ma ia, “Padiar ma mate au rap dohot angka halak Pilistin on!” Jana sagogonia dionjar ia ma tiang i lopus marumpak jana didondoni ma silima halak na markuaso ni Pilistin i rap dohot sude jolma na asing na adong disi. Laing mate do dohot si Simson. Tapi, umbahat do dibunu ia jolma di hatiha parmatenia i sian di hatiha ni ngolunia.

³¹ Dung i marroan ma kahangginia dohot koum sisolkotnia laho mambuat bangkenia. Dioban halahi ma ia mulak, lalu dikuburkon ma ia di bagasan kuburan ni si Manoah amangnia i. Di antara ni Zora dohot Estaol do kuburan i. Dua pulu taon ma honokna si Simson gabe pamimpin ni Israel.