HAKIM-HAKIM 1 - BIBEL JAMITA NA DENGGAN

Marga Juda dohot Simeon manangkup si Adoni-Besek

¹ Dung marujung ngolu ni si Josua, marsapa ma halak Israel tu Tuhan, “Tuhan, marga dia do sian hami na parjolo angkon mamorangi halak Kanaan?”

² Dialusi Tuhan ma, “Marga Juda, madung Hulehen di halahi kuaso laho pataluhon luat i.”

³ Jadi didok halak Juda ma tu halak Simeon, “Beta, dongani hamu ma hami mamorangi halak Kanaan dohot mangarampas luat na nitontuhon ni Tuhan di hami. Hami dongani pe hamu sanoli on mangarampas luat na ditontuhon ni Tuhan di hamu.” Jadi Marga Simeon

⁴ dohot Marga Juda kehe ma rap marporang. Jana dilehen Tuhan do hamonangan di halahi maralohon halak Kanaan dohot halak Peris. Sampulu ribu halak sian musu i na mate di Besek.

⁵ Diroro na dua marga i ma raja ni luat i na margoar si Adoni-Besek.

⁶ Dilojong ia do nian, tapi dikojar halahi do ia jana ditangkup lalu digotap inang ni jari ni tanganna dohot patna.

⁷ Didok si Adoni-Besek, “Najolo madung hugotap inang ni jari ni pat dohot tangan ni pitu pulu raja, jana hupadiar halahi mangan sian teba-teba ni sipanganon na madabu sian mejangku. Saonnari dibaen Debata ma tu au dos songon na hubaen tu halahi.” Dioban do muse si Adoni-Besek on tu Jerusalem jana disi ma marujung ngolunia.

Marga Juda manaluhon Jerusalem dohot Hebron

⁸ Diporangi halak Juda ma Jerusalem, dirampas jana disurbu halahi ma kota i jana dibunu pangisina i.

⁹ Dung i kehe muse ma halahi mamorangi halak Kanaan na maringanan di luat partoran dohot na di robean ni dolok; songon i muse na maringanan di luat na mahiang di Selatan,

¹⁰ dohot di kota Hebron, i ma kota na nigoaran najolo Kiryat-Arba. Ditaluhon halak Juda ma disi si Sesai, Ahiman, dohot Talmai.

Si Otniel manaluhon kota Debir

¹¹ Sian Hebron kehe ma halak Juda mangaroro tu kota Debir na margoar di hatiha i Kiryat-Sefer.

¹² Sada sian Marga Juda i na margoar si Kaleb mandok, “Sanga ise na tolap mangarampas Kiryat-Sefer, tola buatonna disia borungku na margoar si Aksa.”

¹³ Dirampas si Otniel anak ni anggi ni si Kaleb na margoar si Kenas ma kota i. Jadi dilehen si Kaleb ma si Aksa gabe ripe ni si Otniel.

¹⁴ Di ari parbagason ni halahi i, disosak si Otniel ma si Aksa anso dipangido ia tano saladang sian amangnia. Jadi mijur ma si Aksa sian halodenia, gabe disapai si Kaleb ma sanga aha giot disia.

¹⁵ Dialusi si Aksa ma, “Giotku adong ma nian di au sanga na piga mual ni aek, angke tano na mahiang do antong na dilehen ni amang i di au.” Jadi hara ni i, dilehen si Kaleb ma tusia mual ni aek na di dolok dohot mual ni aek na di lombang.

Angka hamonangan ni Marga Juda

¹⁶ Angka halak Keni, i ma pomparan ni si Hobab, ipar ni si Musa, didongani halahi ma halak Juda haruar sian Jeriko, kota Kurma, jana kehe tu luat na harsang na di Selatan ni Arad na di Juda. Disi ma halahi hot maringanan di tonga-tonga ni bangso Amalek.

¹⁷ Dung i kehe ma Marga Juda rap dohot Marga Simeon mamorangi dohot pataluhon halak Kanaan na maringanan di kota Zefat. Diburai halahi ma kota i, dung i dironcohon halahi lalu dibaen halahi ma goarna Horma.

¹⁸ Dung i dirampas halak Juda ma Gasa; Askelon; Ekron dohot na humaliangna.

¹⁹ Ditolong Tuhan do halak Juda gabe tarbuat halahi luat partoran, tapi nada tarbuat halahi angka halak na di rura, harana adong do angka kareta na sian bosi nampuna ni halahi.

²⁰ Songon na dung diparentahon ni si Musa, anggo Hebron dilehen do tu si Kaleb, dibaen madung dipaorot si Kaleb najolo anak ni si Enak na tolu i.

²¹ Marga Benyamin pe nada tarusir halahi morot halak Jebus sian kota Jerusalem. I ma dalanna umbaen na laing rap disi halak Jebus dohot halak Benyamin.

Angka marga sian pomparan ni si Josep manaluhon Betel

²² Kehe ma Marga Efraim dohot Manase pomparan ni si Josep mamorangi kota Betel jana diurupi Tuhan do halahi.

²³ Disuru ma halahi mamata-matai kota Betel (na margoar Lus di hatiha i).

²⁴ Di na giot lalu tu kota i angka na mata-mata i, marsuo ma halahi dohot sada bayo na giot manadingkon kota i. Didok halahi ma tusia, “Muda dipaboa ho sanga na bia baenonnami anso tarbaen masuk tu bagasan kota i, nada baenonnami na jat tu ho.”

²⁵ Jadi gabe dipatuduhon bayo i ma dalan masuk tu kota i. Jadi masuk ma halak Efraim dohot Manase tu kota i lalu dibunu halahi ma sude halak na disi, asing ni bayo i dohot keluargania.

²⁶ Dung i pinda ma muse ia tu tano ni halak Het, jana dipajongjong ia ma sada kota disi jana dibaen ia goarna Lus. Laing hot do songon i goar ni kota i.

Angka bangso na so dipaorot ni halak Israel

²⁷ Anggo Marga Manase nada dipaorot halahi halak na maringanan di kota Bet-Sean, Taanak, Dor, Jibleam dohot Megido maradu angka kota na adong humaliangna. Jadi laing hot do disi maringanan halak Kanaan.

²⁸ Tutu nian dung mur martamba gogo halak Israel, dipaksa halahi do halak Kanaan i markarejo di halahi, tapi laing na so dipaorot halahi do angka halak Kanaan i sian i.

²⁹ Di kota Geser, nada dipaorot Marga Efraim halak Kanaan na maringanan di kota i. Jadi laing disi do tinggal halak Kanaan i rap dohot halahi.

³⁰ Halak na mangingani kota Kitron dohot Nahalol pe nada dipaorot Marga Zebulon. I ma dalanna umbaen na laing rap tinggal sainganan halak Kanaan dohot halahi, tapi dipaksa do halak Kanaan i markarejo di halahi.

³¹ Nada dipaorot Marga Aser angka na maringanan di kota Ako, Sidon, Ahlab, Aksib, Helba, Afek dohot Rehob.

³² I ma dalanna umbaen laing na rap sainganan halak Kanaan na di kota i rap dohot halak Aser.

³³ Halak kota Bet-Semes dohot Bet-Anat pe nada dipaorot Marga Naftali. Laing maringanan di kota i do halak Kanaan rap dohot halak Naftali tapi dipaksa markarejo.

³⁴ Disosak halak Amori ma halak Dan tu luat partoran, nada dipatola halahi di tano na di rura i.

³⁵ Torus ma halak Amori maringanan di Ayalon, Saalbim, dohot di Dolok Heres, tapi sai dipupu Marga Efraim dohot Manase do mamisat halak Amori i jana dipaksa markarejo di marga na dua i.

³⁶ Luat ni halak Amori mulai sian Tangkohan Akrabim, sian Sela, lopus tu ginjang.