HABAKUK 2 - BIBEL JAMITA NA DENGGAN

Alus ni Tuhan tu si Habakuk

¹ Manaek ma au tu menara panjagoanku jana hupainte ma jolo sanga songon dia alusNia di holos ni rohangku.

² Dialusi Tuhan ma tu au songon on, “Tangkas ma suratkon tu batu lei, sanga aha na Hupaboa tu ho, anso mura siseon ni angka na mamolus.

³ Suratkon ma i, angke nada saonnari dope hatihana. Tapi manigor ro ma hatihana i, jana musti tarjadi sanga aha na Hudokkon i tu ho. Haru pe laing honok dope idaon, tapi painte sajo ma! Pasti do ro hatiha ni i jana nada dipalambat-lambat.

⁴ Jana ingot ma: halak na gakgak nada tigor rohana, tapi anggo halak na tigor sian haporsayaanna, i do na giot mangolu.”

Bura tu halak na jahat

⁵ Matua dipaoto-oto hakayoan i do jolma. Jolma na songkal, bulbul do i jana sai humasusa. Songon hamatean do i, na so habutongan; luat tu luat sai rampasonna.

⁶ Tapi anggo angka bangso na dipatunduknia, sai manyindir ma i jana pacia-ciahon tusia. Dokkonon ni halahi ma, “Sai hona bura ma ho hara ni na pagukguk harto na so ho nampunasa! Sadia honok nari he sai pakayoonmu dirimu marhite na mamaksa angka halak na marutang tu ho anso digarari halahi utangna?”

⁷ Hape sian na so pamotoanmu, ho na dung patunduk halak na asing, marutang muse ma ho jana dipaksa manggarar bungana. Marroan ma angka musumu mangarampas sinadonganmu, gabe hitir-hitir ma ho mabiar!

⁸ Ma bahat disamun ho angka bangso, tapi samunon ni angka bangso na so dapotmu ma ho, hara ni pamunuon na nipadalanmi dohot hara ni hakejamonmu maradopkon angka luat, angka kota dohot halak na manginganisa.

⁹ Hona bura ma ho! Dipagukguk ho arta tu dongan sabagasmu marhite untung na dapotmu sian hakejamon, anso aman bagasmu sandiri jana dao sian hasusaan dohot parmaraan.

¹⁰ Hape nian na mangalapi hahaila tu dongan sabagasmu sajo do na nibaenmi. Manjalak tu rugimu sandiri do ho di na nisamunmu angka bangso.

¹¹ Salangkan batu na di tembok i pe marsurahi do mamurai ho, dohot angka tiang ni bagas i pe dipatubegehon do surak-surak i.

¹² Hona bura ma ho! Dipajongjong ho do kota di ginjang ni hajahatan jana dibaen ho do i mardongan pamunuon.

¹³ Marloja-loja angka bangso na nitaluhonmu nada adong gunana, jana abis dipangan api do sude na nipajongjongna. Giot ni Tuhan Na Markuaso i do sudena i.

¹⁴ Tapi songon laut na nigohan ni aek, laing songon i muse ma portibi on digohi dohot parbinotoan taringot tu hamuliaon ni Tuhan.

¹⁵ Marjaya ma halak na mangalehen donganna jolma minum mardongan muruk, jana na mambaensa lopus mabuk, giot mangaligi hahailana.

¹⁶ Saonnari geleranmu noma pailaon, jana nada na giot dipasangap. Muba ma hasangapanmu gabe habilean. Paksaon ni Tuhan noma ho minum sian panginuman na marisi uhuman. Minum ma ho lopus mabuk jana lenong-lenong.

¹⁷ Ditabai ho do angka hayu na di harangan Libanon, jana saonnari ho noma na giot sitabaon. Dibunu ho do angka binatang jana saonnari angka binatang i noma sihabiaranmu. Sudena on tarjadi hara ni pamunuon dohot hakejamon na dung nibaenmu maradopkon angka luat, kota dohot angka pangisina.

¹⁸ Aha ma he guna ni patung gana-ganaan? Aha ma he guna ni patung gana-ganaan sibaen gabus i? Harana porsaya do na mambaenna di parkarejoanna, hape nian angka gana-ganaan na ngungu do na nibaenna i.

¹⁹ Hona bura ma halak na mangkuling tu hayu santuho, “Ngot ma ho!” Tu sada batu na ngungu, “Jongjong ma ho!” Tarbaen sada patung ma he mandok sangkababa hata tu ho? Nian marlampis sere do i dohot perak, tapi anggo tondi umpe adong di bagasanna.

²⁰ Di bagasan Bagasna na badia i do Tuhan; sai maringanan di jolonia ma nian jolma na satano on.