ESTER 7 - BIBEL JAMITA NA DENGGAN

¹ Jadi padua nolihon ma raja i dohot si Haman mangan minum rap dohot si Ester.

² Lalu-lalu minum anggur, marsapa ma raja i mangulahi tu si Ester, “Iabo, di Namora i, aha do ulaning por ni rohamu? Dokkon ma da! Pasti do lehenonku haru pe dipangido ho satonga sian harajaanku.”

³ Dialusi Ratu Ester ma, “Muda tumbuk di roha ni raja i, pangidoanku anso laing dipatola au mangolu dohot bangsongku.

⁴ Harana madung targadis au dohot bangsongku laho bunuon. Sugari digadis hami hum na giot baenon hatoban, huhasipkon do i jana nada gangguonku pola raja i. Hape saonnari na giot abiskonon ma hami jana pusaon!”

⁵ Jadi marsapa ma Raja Ahasweros tu Ratu Ester, “Ise dehe na puluk mambaen songon i? Di dia halakna i?”

⁶ Dialusi si Ester ma, “Si Haman na jahat on ma da musunami jana na mamparhanciti hami!” Di bagasan biar na marsitutu manatap ma si Haman tu raja dohot tu ratu i.

⁷ Sun ma muruk ni raja i, lalu jongjong manadingkon meja jana kehe mardalan tu ruar tu kobun ni bagas godang i. Madung mamoto si Haman bahaso na dung dibuat raja i haputusan laho manguhum ia, jadi gabe laing tongtong ma ia disi rap dohot Ratu Ester laho mangidohon anso dipalua.

⁸ Mandele ma si Haman didabuhon ia ma dirinia tu ginjang ni podom-podoman ni si Ester laho mangido ampun, tapi laing topet muse ma disi mulak raja i sian kobun ni bagas godang i. Marnida si Haman songon i, marsurak ma raja i, “Aha? Laing barani dope antong bayo on mambaen na so ture tu ratu i dison, di jolongku jana di bagas godangku sandiri?” Disi didokkon raja i hata i, marroan ma angka pangoloi lalu manutupi ulu ni si Haman.

⁹ Jadi didok si Harbona sada sian pangoloi i, “Rajanami, adong do di bagas ni si Haman tiang gantungan dua pulu dua meter gincatna. Na nipajongjong ni si Haman do i laho manggantung si Mordehai halak na dung paluahon hosa ni raja i!” Dung i ninna raja i ma: “Gantung hamu ma si Haman tu tiang i!”

¹⁰ Songon i ma si Haman digantung di tiang na nipajongjongnia i baen di si Mordehai. Dung salpu pe i anso mombun rimas ni raja i.