ESTER 3 - BIBEL JAMITA NA DENGGAN

Mambaen sangkap na jahat si Haman laho mangago halak Jahudi

¹ Dung piga-piga taon diangkat Raja Ahasweros ma sada halak na margoar si Haman gabe perdana menteri. Anak ni si Hamedata na sian pomparan ni si Agag do si Haman.

² Diparentahon raja i ma tu sude pagawenia anso pasangapkon si Haman, marsomba di jolonia. Sude do mangoloi parenta i, asing sian si Mordehai.

³ Disapai angka pagawe na di bagas godang i ma tusia sanga hara ni aha umbaen dilanggar ia parenta ni raja i,

⁴ jana ganop ari do ia disosak halahi anso mangoloi sajo ia, tapi nada ra ia manangihon. Didok ia, “Halak Jahudi do au, nada tarbaen au manungkap di jolo ni jolma.” Jadi gabe dilapurkon halahi ma i tu si Haman dibaen giot botoon ni halahi sanga na bia do sibaenon ni si Haman maradopkon si Mordehai.

⁵ Sun ma muruk ni si Haman di na tarboto tusia bahaso na so ra si Mordehai manungkap tusia.

⁶ Jana dung diboto ia na halak Jahudi do hape si Mordehai, dibaen ia ma haputusan laho manguhum si Mordehai jana nada hum ia sajo, tapi na giot pusaonnia muse ma sandok bangso Jahudi na di harajaan Persia.

⁷ Di taon padua bolaskon mamarenta Raja Ahasweros di bulan sada, i ma bulan Nisan, disuru si Haman ma mambaen undi na margoar “purim” laho mamboto sanga ari dohot bulan dia na tumbuk laho palaluhon nietnia na jahat i. Jadi gabe ditontuhon ma tanggal tolu bolas bulan dua bolas, i ma bulan Adar.

⁸ Jadi didok si Haman ma tu raja i, “Rajanami, adong do sada bangso na ganjil na marserak di ganop propinsi di harajaan on. Asing situtu do adatna sian angka bangso na deba nari i. Nada patu halahi tu angka aturan ni harajaan on. Jadi, sugari dumenggan nian ulang dipadiar raja i halahi mambaen roha-rohana.

⁹ Anggo na so haboratan do raja i, diharuarkon ma sugari surat parenta laho mamusa halahi. Jana muda na ra do raja i manjagit usul sian iba, pasti tarpamasuk iba do lobi sian 340.000 kilogram perak tu bagasan kas ni raja i.”

¹⁰ Umbege i, diuldus raja i ma sian jari-jarina tintin na nipakenia laho mancap boa-boa na rasmi lalu dilehen ia ma tu si Haman, musu godang ni halak Jahudi i.

¹¹ Didok raja i ma tusia, “Hupasahat ma tu ho bangso i dohot hepengna i. Pambaeni ma sanga na aha giotmu tu halahi.”

^12-13 Jadi di tanggal tolu bolas bulan sada, dipiohon si Haman ma angka sekretaris ni raja i. Disuru ia ma halahi mambaen surat domu tu sude na niparentahonnia, dung i diterjemahkon ma surat i tu sude hata jana disalin tu sude surat na dipake di harajaan i. Markite-hite goar ni Raja Ahasweros do surat i dibaen jana dicap dohot tintinnia i lalu ditongoskon ma tibu tu angka na markuaso, gubernur dohot na sangap di sude propinsi. Anggo isina, i ma parenta na mandok angkon bunuon nada adong ampunna sude bangso Jahudi, na poso bope na matobang, bope dadaboru sanga na dakdanak jana sinadonganna i dirampas, i ma di tanggal tolu bolas bulan Adar.

¹⁴ Angkon pabotohononkon do boa-boa i di sude propinsi anso sude halak hobas hian di ari na dung ditontuhon i.

¹⁵ Tibu ma markehean angka suruan na pataruhon surat i tu sude propinsi ni harajaan i. Diparentahon raja i ma anso laing dipabotohon barita i di Susan, kota sabungan ni Persia. Dung salpu i juguk-juguk ma si Haman dohot raja i minum anggur, tapi anggo kota Susan ma pola gaor patunda ni barita i.