ESRA 8 - BIBEL JAMITA NA DENGGAN

Angka halak na tarbuang na mulak dohot si Esra

¹ On ma daftar ni angka kapala ni horong na dung dibuang tu Babel jana mulak rap dohot au tu Jerusalem di na mamarenta si Artahsasta gabe raja:

^2-14 Si Gersom sian horong Pinehas Si Daniel sian horong Itamar Si Hatus anak ni si Sekanya sian horong Daud Si Zakaria, sian horong Paros rap dohot 150 halaklahi sian horongnia (adong do suratna taringot tu tarombo ni halahi). Si Elyuenai anak ni si Zerahya, sian horong Pahamoab, rap dohot 200 halak halaklahi. Si Sekanya anak ni si Jahasiel, sian horong Zatu, rap dohot 300 halak halaklahi. Si Ebed anak ni si Jonatan, sian horong Adin rap dohot 50 halak halaklahi. Si Jesaya anak ni si Atalya, sian horong Elam, rap dohot 70 halak halaklahi. Si Zebaya anak ni si Mikael sian horong Sefaca, rap dohot 80 halak halaklahi. Si Obaja anak ni si Jehiel, sian horong Joab, rap dohot 218 halak halaklahi. Si Selomit anak ni si Josifya, sian horong Bani, rap dohot 160 halak halaklahi. Si Zakaria anak ni si Bebai, sian horong Bebai, rap dohot 28 halak halaklahi. Si Johanan anak ni si Hakatan, sian horong Asgad, rap dohot 110 halak halaklahi. Si Elifelet, si Jehiel, dohot si Semaya, sian horong Adonikam, rap dohot 60 halak halaklahi (umpudi do halahi ro). Si Utai dohot si Zakur, sian horong Bigwai, rap dohot 70 halak halaklahi.

Dipalagut si Esra halak Levi anso mangoloi di Bagas Ni Tuhan

¹⁵ Hupalagut ma sude rombongan i di topi ni batang aek na pahae tu kota Ahawa, lalu disi ma hami marbandar tolu ari lolotna. Dung hupareso, hape adong do sanga na piga malim sian tonga-tonga ni halahi, tapi nada adong sahalak pe sian Marga Levi.

¹⁶ Jadi hupiohon ma sambilan halak sian tonga-tonga ni angka pamimpin i, i ma si Elieser, si Ariel, si Semaya, si Elnatan, si Jarib, si Elnatan, si Natan, si Zakaria, si Mesulam dohot muse dua guru, i ma si Joyarib dohot si Elnatan.

¹⁷ Dung i huutus ma halahi mandapotkon si Ido, kapala ni masarakat na di Kasifia, mardongan pangidoan anso ditongoskon si Ido dohot angka donganna parkarejo di Bagas Ni Tuhan tu hamu angka halak na laho mangoloi di Bagas Ni Tuhan.

¹⁸ Hara ni denggan ni roha ni Debata, disuruhon halahi ma tu hami si Serebia, sada halak Levi na pistar na sian horong Mahli. Laing ro do rap dohot ia angka dakdanak dohot angka kahangginia salapan bolas halak bahatna.

¹⁹ Laing disuru do tu hami si Hasabya dohot si Jesaya na sian horong Merari rap dohot dua pulu halak kahanggi ni halahi.

²⁰ Tamba ni i, adong muse dope 220 halak parkarejo ni Bagas Ni Tuhan na tarsurat goarna. Dipahot Raja Daud dohot angka halak na godang di harajaan do sian najolo ompu ni halahi laho mangurupi halak Levi.

Puaso dohot martangiang angka halak na tarbuang i hian

²¹ Hupabotohon ma di topi ni Batang aek Ahawa i, bahaso angkon puaso sude jana patorukkon roha di adopan ni Debata. Hami tangiangkon do anso dipimpin Debata hami di pardalanan i, jana dijagohon Ia hami, angka dakdanaknami dohot sude sinadongannami.

²² Maila do au laho mangido tentara na markudo tu raja i, laho manjagohon hami nian maradopkon musu di pardalanan i. Harana madung hudok tusia, bahaso na sai dipasupasu Debatanami do ganop halak na porsaya diSia jana dihasogohon bope diuhum Ia do ganop halak na so setia tuSia.

²³ Jadi gabe marpuaso ma hami dohot martangiang tu Debata mangido anso dijagohon Ia hami, jana dipatulus Ia do antong tangiangnami i.

Angka haul baen di Bagas Ni Tuhan

²⁴ Sian tonga-tonga ni angka malim na sumangap, hupili ma dua bolas halak: Si Serebia, si Hasabia dohot sampulu halak nari.

²⁵ Dung i hutimbang ma di halahi perak, sere dohot angka parkokas na dung disumbangkon ni raja i, angka panuturi maradu sude angka halak na sangap dohot na nilehen ni sude halak Israel, na laho sipakeon di bagasan Bagas Ni Tuhan. Hupasahat ma sudena i tu angka malim i.

^26-27 On ma daftar ni angka sumbangan i: perak – 22 ton 100 parkokas perak – 70 kg sere – 3.400 kg 20 mangkuk sere – 8,4 kg 2 mangkuk tumbaga na jeges situtu, na mararga sarupa dohotsere.

²⁸ Hudok ma tu angka malim i, “Madung dihapunjungkon hamu di Tuhan, Debata na nisomba ni angka ompunta, songon i muse sude parkokas perak dohot sere ma disumbangkon tu Tuhan, hapunjungan ni Tuhan do i.

²⁹ Jagohon ma angka barang-barang i denggan lopus lalu hamu tu Bagas Ni Tuhan. Dung lalu hamu disi angkon timbangonmunu do barang-barang i jana pasahat hamu ma tu angka malim kapala dohot angka pamimpin ni halak Levi maradu angka pamimpin ni halak Israel di Jerusalem.”

³⁰ Jadi dijagit angka malim dohot halak Levi i ma perak dohot sere, dohot angka parkokas i anso dioban tu Bagas Ni Tuhan di Jerusalem.

Lalu di Jerusalem

³¹ Di tanggal dua bolas bulan parjolo, hami tadingkon ma Batang aek Ahawa jana kehe ma hami tu Jerusalem. Di bagasan pardalanan i dijagohon Debata do hami sian serangan dohot pangambat ni musu.

³² Dung lalu di Jerusalem maradian ma hami tolu ari lolotna.

³³ Dung di ari paopatkon kehe ma hami tu Bagas Ni Tuhan, hami timbang ma perak, sere dohot angka parkokas i. Dung i hami pasahat ma i tu Malim Meremot anak ni si Uria, disaksihon si Eleasar anak ni si Pinehas dohot dua halak Levi, i ma si Josabad anak ni si Josua dohot si Noadiah anak ni si Binui.

³⁴ Dietong ma sude barang i jana ditimbang lalu disuratkon sudena.

³⁵ Laing di na sadari i, sude do angka na mulak sian habuangan i pasahatkon haul situtungon tu Debata ni Israel. Dihaulkon halahi do 12 lombu jantan baen di sude Israel, 96 biri-biri jantan, dohot 77 anak ni biri-biri; tamba ni i muse 12 biri-biri sipakeon gabe haul hasesaan ni dosa ni halahi sandiri. Ditutung do sude pahan-pahanan i gabe haul tu Tuhan.

³⁶ Dipasahat halahi muse ma dokumen na nilehen ni raja i tu halahi, tu gubernur dohot angka na manjabat di propinsi Efrat Hasundutan. Jadi gabe dilehen angka na marjabatan i bantuan tu bangso i anso laing tarbaen halahi tongtong maribadat di Bagas Ni Tuhan.