ESRA 7 - BIBEL JAMITA NA DENGGAN

Lalu si Esra di Jerusalem

¹ Dung martaon-taon muse, dompak si Artahsasta mamarenta gabe raja di Persia, adong ma sada bayo na margoar si Esra, sian pomparan ni Malim Godang Harun. Songon on ma langka ni sundutnia sian toru tu ginjang: Esra Asarya Hilkia

² Salum Zadok Ahitub

³ Amarya Asarya Merayot

⁴ Zerahya Usi Buki

⁵ Abisua Pinehas Eleasar Malim Godang Harun

^6-7 Halak na marsikola do si Esra jana bahat do na binotonia salaho tu Uhum na nilehen ni Tuhan, Debata ni Israel tu si Musa. Dibaen dipasupasu Tuhan Debata do si Esra, gabe dilehen raja ma disia sandok na nipangidonia. Di taon papituhon mamarenta Raja Artahsasta, marangkat ma si Esra sian Babel manuju Jerusalem rap dohot sarombongan halak Israel, i ma angka malim, halak Levi, angka parende maradu panjago horbangan ni Bagas Ni Tuhan, dohot angka parkarejo.

^8-9 Di tanggal sada bulan sada ma ditadingkon halahi Babel jana dohot partolongan ni Debata, lalu ma halahi di Jerusalem di tanggal sada bulan lima.

¹⁰ Madung dipasada si Esra rohania tu na manangkasi Tona Ni Tuhan, laho patuluskonsa lalu mangajarkon sude hatontuan dohot paraturanna i tu bangso Israel.

Dokumen na nilehen ni Raja Artahsasta tu si Esra

¹¹ On ma dokumen na nilehen ni Raja Artahsasta tu si Esra, sada halak malim dohot Ahli Uhum,

¹² “Sian Raja Artahsasta tu Malim Esra, Ahli Uhum Ni Debata na markuaso di banua ginjang.

¹³ Au mamarentahon, diisinkon kehe rap dohot ho sude malim, halak Levi dohot halak Israel na asing di sude harajaanku na marpor ni roha giot mulak tu Jerusalem.

¹⁴ Harana au dohot panuturingku sipitu halak i mangutus ho tu Jerusalem dohot Juda laho manangkasi pangalahona dohot mangaligi sanga na tutu situtu do Uhum Ni Debata na nipasahatna i tu ho, dioloi.

¹⁵ Giot pasahatonku dohot panuturingku sipitu halak i haul sere dohot perak tu Debata ni Israel, Debata na maringanan di Jerusalem i. Oban ma sihaulkononnami i.

¹⁶ Laing oban muse ma sude sere dohot perak na nipalagutmi di sude Babel dohot sude sumbangan ni bangso Israel dohot angka malimna baen di Bagas Ni Tuhan Debata ni halahi di Jerusalem.

¹⁷ Pake ma hepeng i sadenggan-dengganna laho manobusi lombu jantan, angka biri-biri jantan, anak ni biri-biri, gandum dohot anggur. Haulkon ma sudena i di ginjang ni langgatan ni Bagas Ni Tuhan na di Jerusalem.

¹⁸ Perak dohot sere na lobi i tola do i pakeonmu tu haporluanmu sandiri dohot angka donganmu, hombar tu hagiot ni Debatamu.

¹⁹ Pasahat ma tu Debata na di Jerusalem i sude parkokas na dipasahat tu ho sipakeon di paribadatan di Bagas Ni Debata.

²⁰ Jana sude haporluan na asing di Bagas Ni Tuhan tola do pangidoonmu sian kas ni harajaan.

²¹ Huparentahon do tu sude pangurus ni kas ni harajaan na di propinsi Efrat Hasundutan anso dilehen tusia manigor sanga aha pe na nipangido ni Malim Esra, Malim Ni Debata na markuaso di banua ginjang i,

²² lopus songon on bahatna: perak lopus 3.400 kg, gandum lopus 10.000 kg, anggur lopus 2.000 liter, miak zetun lopus 2.000 liter, dohot sira sanga sadia bahat na porlu.

²³ Tangkas ma baen di na paradehon sasude na niporluhon ni Debata na markuaso di banua ginjang i baen di BagasNia anso ulang muruk Ia tu au sanga tu angka jolma na mamarenta dung au.

²⁴ Nada tola buatonmunu pajak sian angka malim, halak Levi, parende, panjago pintu horbangan, parkarejo, sanga sian ise sajo na adong hubunganna dohot Bagas Ni Tuhan.

²⁵ Ale Esra, pake ma habisuhon na nilehen ni Debata tu ho, jana angkat ma angka pamimpin dohot angka panguhum laho mamarenta sude halak na di propinsi Efrat Hasundutan na mangihutkon Uhum Ni Debatamu di ngoluna. Sai ajarkon ma antong Uhum i tu sude halak na so umbotosa dope.

²⁶ Ganop halak na so mangoloi angka Uhum Ni Debatami, sanga angka uhum ni harajaan, angkon manigor do mate hona uhum baenon, sanga dibuang, sanga dirampas sinadonganna i, sanga dipahurungkon.”

Si Esra mamuji Debata

²⁷ Jadi didok si Esra ma, “Puji ma Tuhan, Debata na nisomba ni ompunta i! Madung disungguli Ia roha ni raja gabe ra ia mangalehen rohana tangkas tu Bagas Ni Tuhan di Jerusalem.

²⁸ Marhite pangurupi ni Debata gabe jop roha ni raja i, angka panuturina dohot parpangkat na markuaso disi mida au. Madung dilehen Tuhan Debatangku semangat tu au, jadi gabe marhasil au marpio bahat kapala ni horong ni Israel anso mulak tu Jerusalem. ”