ESRA 3 - BIBEL JAMITA NA DENGGAN

Dipungka ma mangulahi maribadat

¹ Di bulan pitu, madung hot angka halak Israel i maringanan di angka kotana be. Di tanggal sada laing di bulan i, marlagut ma halahi di Jerusalem,

² dung i dibangun si Jesua anak ni si Jehosadak dohot angka donganna dohot si Zerubabel anak ni si Sealtiel maradu kahanggina ma langgatan ni Debata ni Israel. Jadi hara ni i, tarbaen halahi ma manutung haul di ginjangna i, domu tu angka panogu-noguon na tarsurat di bagasan Buku Uhum Ni si Musa, naposo ni Debata.

³ Haru pe mabiar halahi mida halak na maringanan di luat i, tapi laing dibangun halahi do langgatan i di ingananna humani. Jadi dipungka halahi ma mangulahi pasahatkon haul situtungon, di hatiha manyogot dohot andospotang.

⁴ Dirayahon halahi muse ma Pesta Undung-undung Bulung Rata, hombar tu paraturan; jana ganop ari dipasahat halahi ma haul na dung ditontuhon di ari i.

⁵ Tamba ni i taratur ma dipasahat halahi haul situtungon dohot haul di Ari Pesta Bulan Baru, dohot di sude parsuoan na asing na dipatupa laho marsomba Tuhan. Dipasahat halahi muse haul na niojar ni rohana be tu Tuhan.

⁶ Haru laing na so dibangun dope Bagas Ni Tuhan mangulahi, tapi anggo di tanggal sada bulan pitu i madung dipungka rayat i manutung haul di Tuhan.

Mamungka mambangun Bagas Ni Tuhan

⁷ Disumbangkon rayat i ma hepeng laho mangupai tukang batu dohot tukang hayu. Ditongoskon halahi muse do sipanganon, inumon dohot miak zetun tu kota Tirus dohot Sidon laho martukar dohot hayu sampinur Libanon sian angka kota i. Dioban ma hayu i tu Jopa mamolus laut. Sian isin ni si Kores, raja ni Persia i do dikarejohon rayat i sudena i.

⁸ Jadi di bulan dua, di taon paduahon dung mulak halak Israel mangulahi tu Jerusalem, dipungka halahi ma mambangun Bagas Ni Tuhan mangulahi. Dohot do markarejo si Zerubabel, si Josua dohot angka dongan ni halahi sabangso, angka malim, halak Levi, pendekna sude halak na tarbuang i hian. Angka halak Levi na marumur dua pulu taon tu ginjang, i ma ditontuhon laho manguluhon parkarejoan di na mambangun Bagas Ni Tuhan i.

⁹ Jadi rap mangawasi ma si Josua halak Levi i dohot angka dakdanaknia dohot kahangginia songon i muse si Kadmiel maradu angka dakdanakna (horong Hodawia) di parkarejoan na mambangun Bagas Ni Tuhan i. Diurupi halak Levi na sian horong Henedad do halahi.

¹⁰ Di na mamungka mamayakkon pondasi ni Bagas Ni Tuhan i angka parkarejo bangunan i, marpakean juba ma angka malim jana jongjong ma halahi di inganan na ditontuhon maniop sarune. Laing disi muse ma jongjong halak Levi na sian horong Asap maniop angka doal na menek-menek. Dipuji-puji halahi ma Tuhan hombar tu aturan na dung ditotopkon mamungka sian hatiha ni Raja Daud.

¹¹ Diendehon rayat i ma puji-pujian di Tuhan, diulak-ulahi ma bagian na parpudi i, songon on ma sorana, “Na burju do Tuhan i; jana hot do sapanjangna holong ni rohaNia tu Israel.” Marsurak ma sude rayat i dohot mamuji Tuhan, hara ni na dung dipayakkon pondasi ni Bagas Ni Tuhan.

¹² Bahat dope sian tonga-tonga ni angka malim, angka halak Levi dohot angka kapala ni horong-horong i na dung matobang situtu na sanga marnida Bagas Ni Tuhan najolo i. Tangis ma halahi gogo di na niida ni halahi dipayakkon pondasi ni Bagas Ni Tuhan i. Tapi anggo halak na deba nari na dohot disi, marsurak-surak do marmoga-moga,

¹³ jadi gabe nada habotoan be antara ni sora ni na marmoga-moga dohot na tangis. Hara ni gogona jabat do tarbege tu na dao.