ESRA 10 - BIBEL JAMITA NA DENGGAN

Sangkap mangantak na marsibuatan boru i

¹ Jadi taran na martangiang i si Esra lalu na tangis ia mangaku dosa di Bagas Ni Tuhan i, bahat sajo do halak Israel ro marlagut, halaklahi bope dadaboru dohot angka dakdanak. Dihuliangi halahi ma ia lalu tangis mangangguhi.

² Dung i mandok hata ma si Sekanya anak ni si Jehiel tu si Esra, “Ma mardosa hami tu Tuhan hara ni na mambuat boru ni bangso na asing. Haru songon i pe, laing adong dope siaropon ni roha ni Israel.

³ Tole ma marsumpa hita tu Debata, bahaso na giot paorotonta sude dadaboru i rap dohot angka dakdanak ni halahi i. Ihutkononnami noma sude sipaingotmu dohot angka sipaingot ni angka halak na asing na pasangapkon parenta ni Debata. Oloannami noma Tona Ni Debata.

⁴ Angkon ho noma na martindak. Hami urupi ma ho di sasudena. Tegas ma baen lopus beres.”

⁵ Jadi dipungka si Esra ma mambaen tindakan. Disuru ia ma angka malim-malim kapala ni angka halak Levi dohot angka halak Israel na deba nari anso marsumpa paboa na giot patuluson ni halahi ma usul ni si Sekanya i.

⁶ Dung disumpahon halahi, kehe ma si Esra sian jolo ni Bagas Ni Tuhan jana masuk ma ia tu bagas inganan ni si Johanan anak ni si Elyasib jana marborngin disi ma ia. Nada ra ia mangan sanga minum hara ni marsakna mamikirkon parbuatan ni angka halak buangan i.

⁷ Dung i dipasar ma sada boa-boa tu sude Jerusalem dohot Juda tu sandok halak Israel na dung mulak sian habuangan i anso marlagut di Jerusalem.

⁸ Sanga ise na so ro di bagasan tolu ari, disita ma sude sinadonganna jana diharuarkon ma halakna i sian masarakat. Diteken angka pamimpin ni rayat i do boa-boa i.

⁹ Dung tolu ari di tanggal dua pulu bulan sambilan, sude halaklahi na maringanan di tano Juda dohot Benyamin marroan ma tu Jerusalem jana marlagut di alaman ni Bagas Ni Tuhan. Ro ma udan na gogo situtu di hatiha i. Humitir ma sude halak hara ni ngalina ari i dohot hara ni pentingna parpunguan i.

¹⁰ Dung i jongjong ma si Esra jana mandok hata ma ia tu halahi, “Madung mardosa hamu dohot manambai hasalaan ni Israel hara ni na mambuat boru ni bangso na asing.

¹¹ Antong, oku hamu ma dosamunu tu Tuhan, Debata na nisomba ni angka ompunta i, jana patulus hamu ma sanga aha na pasonang rohaNia. Mandao ma hamu sian halak na asing na maringanan di luatta on jana paorot hamu ma angka dadaborumunu na sian bangso na asing i.”

¹² Dialusi angka jolma i ma marsora na gogo, “Ihutkononnami ma sipaingotmu.”

¹³ Laing didok halahi dope, “Tapi songon i ma bahat ni na ro on, boti udan maradu gogo. Nada tahan hami jongjong di ruar songon on. Boti muse, nada parkaro na tarpasidung di bagasan sadari dua ari on, harana bahat sajo sian hami na tarlibat di dosa on.

¹⁴ Paloas ma angka pamimpinnami tinggal di Jerusalem on laho mangurus soal on. Jadi angkon ro be ma sanga ise na marripehon bangso na asing na adong di angka kotanami be di hatiha na ditontuhon rap dohot angka pamimpin dohot angka panguhum na di kotana be. Jadi muda songon i nada muruhan ni Debata be hita hara ni parkaro i.”

¹⁵ Sada halak pe nada adong be na mandok haboratan tu usul i, asing sian si Jonatan anak ni si Asael dohot si Jahseya anak ni si Tikwa, dihombari dua halak Levi, i ma si Mesulam dohot si Sabetai.

¹⁶ Laing hot do giot padalanon ni angka halak buangan na dung mulak i sangkap i, jadi gabe dipili Malim Esra ma sanga na piga-piga halak sian tonga-tonga ni angka kapala ni horong, lalu disuratkon ia goarna. Di tanggal sada bulan sampulu dipungka halahi ma manangkasi parkaro i.

¹⁷ Dung mardalan tolu bulan marhasil ma halahi pasidungkon pamaresoan tu sude halaklahi na mambuat boru sian bangso na asing.

Angka halak na marripehon bangso na asing

¹⁸ On ma daftar ni angka halak na marripe sian bangso na asing: Angka malim, tarsurat dohot horongna: Horong Josua dohot kahanggina, angka dakdanak ni si Josada: Si Maaseya, si Jarib dohot si Gedalya.

¹⁹ Marjanji do halahi giot manyirangkon ripe ni halahi, lalu dihaulkon halahi ma biri-biri jantan gabe haul hasesaan ni dosa ni halahi.

²⁰ Horong Imer: Si Hanani dohot si Zebaya.

²¹ Horong Harim: Si Maaseya, si Elia, si Semaya, si Jehiel dohot si Usia.

²² Horong Pashur: Si Elyoenai, si Maaseya, si Ismael, si Netaneel, si Josabad, dohot si Elasa.

²³ Angka halak Levi: Si Josabad, si Simei, si Kelaya (na margoar muse si Kelita), si Petaya, si Juda dohot si Elieser.

²⁴ Angka parende: Si Elyasib Angka panjago ni pintu horbangan ni Bagas Ni Tuhan: Si Salum, si Telem dohot si Uri.

²⁵ Angka halak Israel na asing: Horong Paros: Si Ramya, si Jesia, si Malkia, si Miyamin, si Eleasar, si Malkia, dohot si Benaya.

²⁶ Horong Elam: Si Matania, si Zakaria, si Jehiel, si Abdi, si Jeremot dohot si Elia.

²⁷ Horong Zatu: Si Elyoenai, si Elyasib, si Matania, si Jeremot, si Zabad dohot si Asisa.

²⁸ Horong Bebai: Si Johanan, si Hananya, si Zabai dohot si Atlai.

²⁹ Horong Bani: Si Mesulam, si Maluk, si Adaya, si Jasub, si Seal dohot si Jeramot.

³⁰ Horong Pahatmoab: Si Adna, si Kelal, si Benaya, si Maaseya, si Matania, si Besaleel, si Binui dohot si Manase.

^31-32 Horong Harim: Si Elieser, si Jisia, si Malkia, si Semaya, si Simeon, si Benyamin, si Maluk, dohot si Semarya.

³³ Horong Hasum: Si Matnai, si Matata, si Zabad, si Elifelet, si Jeremai, si Manase dohot si Simei.

^34-37 Horong Bani: Si Maadai, si Amram, si Uel, si Benaya, si Bedeya, si Keluhu, si Wanya, si Meremot, si Elyasib, si Matania, si Matnai, si Jaasai.

^38-42 Horong Binui: Si Simei, si Selemya, si Natan, si Adaya, si Maknadbai, si Sasai, si Sarai, si Asareel, si Selemya, si Semarya, si Salum, si Amarya dohot si Josep.

⁴³ Horong Nebo: Si Jeiel, si Matica, si Zabad, si Zebina, si Jadai, si Joel dohot si Benaya.

⁴⁴ Sudena halahi na dung mambuat boru ni bangso na asing do. Jadi gabe disirangkon halahi ma angka ripena i jana dipaorot rap dohot angka dakdanak ni halahi.