DANIEL 7 - BIBEL JAMITA NA DENGGAN

DIPATORANG SI DANIEL ANGKA PARNIDAANNIA 7:1–12:13 Parnidaan ni si Daniel taringot tu binatang na opat

^1-2 Di taon parjolo dung mamarenta si Belsasar, raja ni Babel, marnipi ma si Daniel jana dapotan parnidaan dipodomannia. Dung i, disuratkon ia ma pangarimpunanna, “Di borngin i dapotan parnidaan ma au, huida ma mangombus alogo na gogo sian humaliang jana gumalungsang ma laut na bidang i.”

³ Dung i murgap ma opat binatang na godang sian bagasan aek i na paasing-asing be tompana.

⁴ Na parjolo tompana songon singa, tapi marhabong songon habong ni rajawali. Di na hutatap tusia, manigor ma mumpat lalu taldus habongna i; tarangkat ma ia sian tano jana dipajongjong di dua pat songon jolma jana dilehen ma roha ni jolma tusia.

⁵ Binatang na paduahon tompana songon gompul. Jongjong di patna pudi i do ia, jana dioban ia tolu holi-holi ni rusuk di antara ni iponnia i. Hubege ma sora na mandok tusia, “Tole bo, papangani ma juhut sanga sadia giotmu!”

⁶ Taran pamanat-manatkon i dope au, murgap muse ma binatang na asing. Tompana songon babiat, tapi adong di tanggurungna i opat habong ni unggas jana ulunia pe opat muse. Jana dilehen do tusia hagogoon.

⁷ Taran manatap au tusi, murgap muse ma binatang na paopatkon. Sun gogona jana jorbut tompana, mabiar au midasa. Diropuk ia dohot iponnia na gogo jana na songon pir ni bosi i angka soroannia jana dipangabis ia; teba-tebana i didege-dege ia. Asing do ia sian angka binatang na parjolo i, anggo on martanduk sampulu.

⁸ Taran hupanotnoti tandukna i, ompot ma tubu sada tanduk na asing di antarana i. Menek do tanduk i tapi dionjar ia do lalu mumpat tolu sian angka tanduk na parjolo i. Marmata do tanduk na menek i songon mata ni jolma jana marpamangan na bulbul pangkataina.

Parnidaan taringot tuSia na tongtong mangolu i

⁹ Di na torus au mangaligi, dihobasi ma sanga na piga habangsa. Jadi juguk ma ia Na Tongtong Mangolu i di sada sian angka habangsa i. PakeanNia dohot obukNia ias sajo mamontar songon hapas, gara-gara do habangsa i dohot angka rodana i hara ni jilam ni api.

¹⁰ Ruar ma sada batang aek api, jana mamolus sian adopanNia; saribu noli marribu-ribu angka na mangoloi Ia, jana bahat sajo do jolma jongjong di joloNia. Dung i juguk ma angka Panguhum jana diungkap ma Angka Buku.

¹¹ Taran hupaligi-ligi tusia, laing hubege dope mamburas tanduk na menek i maradu bulbul. Dung i dimatehon ma binatang na paopatkon i, jana bangkena i diambungkon tu bagasan api lopus mosok.

¹² Anggo angka binatang na asing i madung dibuat kuasona, tapi laing dipaloas dope halahi mangolu lopus tu hatiha na dung ditontuhon.

¹³ Di bagasan parnidaan na tu au borngin i, huida ma adong tarsongon jolma. Ro ma ia dihuliangi ombun lalu kehe ia mandapotkon Na Tongtong Mangolu i jana dipatandahon tuSia.

¹⁴ Dilehen do tusia hasangapan dohot kuaso songon raja, jadi unduk ma tusia angka jolma sian sandok bangso, marga ni bangso dohot hata na marragam-ragam. Manongtong do kuasonia i salolot-lolotna, nada dirampas be sian ia harajaan.

Dipatorang angka parnidaan i

¹⁵ Longang rohangku jana marsak hara ni angka parnidaan na huida i.

¹⁶ Jadi hupadonok ma tu sada halak na jongjong disi jana hupangido ma hatorangan ni sudena i. Jadi dipaboa ia ma tu au artina.

¹⁷ Didok ia ma, “Binatang na godang na opat i, i ma opat harajaan na giot ro di tano on.

¹⁸ Tapi anggo tu bangso ni Debata Na Gumincat i lehenon do kuaso laho mamarenta jana manongtong do salolot ni lolotna pangarajaina.”

¹⁹ Dung i giot botoonku ma astuan ni binatang na paopatkon i na asing sian na deba nari i na jorbut tompana jana na mangaropuk soroanna lalu mansudehonsa dohot sisilon tumbagana dohot ipon bosina, dohot na mandege-dege teba-tebana i.

²⁰ Giot botoonku muse do taringot tu tandukna na sampulu i dohot tandukna na menek na umpudi tubu i na lalu mangumpat tolu sian tanduk na parjolo i. Marmata do tanduk i jana marpamangan na jungkat pangkulingna. Jorbutan dope tanduk na menek i sian angka tanduk na asing i.

²¹ Di na huparrohahon tanduk i, marporang ma ia dohot bangso ni Debata jana ditaluhon ia do halahi.

²² Dung i ro ma Na Tongtong Mangolu i mangalehen haputusan na mandok tigor do bangso ni Debata Na Gumincat i. Madung dapot hatihana di halahi laho manjagit kuaso laho mamarenta.

²³ On ma hatorangan na dapot au, “Binatang na paopatkon i, i ma harajaan na paopatkon na giot jongjong di tano on, jana asing do i sian angka harajaan na asing i. Giot segohonon jana bonduton ni harajaan i do sude portibi on jana dege-degeonnia teba-tebania i.”

²⁴ Tandukna na sampulu i, i ma sampulu raja na giot mamarenta di harajaan i. Dung i ruar ma sada raja na asing; asing situtu do i sian angka raja na asing na parjolo i, jana taluhononnia tolu raja.

²⁵ Mangkuling ma ia mangalo Debata Na Gumincat i jana parkancitannia ma bangso ni Debata. Akalkononnia ma paubahon angka aturan dohot angka pesta ugamo ni halahi jana rajaannia ma halahi tolu satonga taon honokna.

²⁶ Jadi marrapot ma Paruhuman Banua Ginjang jana buaton ma kuasonia lalu dironcohon ma ia lopus abis.

²⁷ Lehenon noma tu bangso ni Debata Na Gumincat i kuaso dohot hagodangan ni sude harajaan na di tano on. Nada marujung be kuaso ni halahi laho mamarenta jana sandok parkuaso na di tano on unduk noma tu halahi di bagasan haburjuon.

²⁸ Olat ni i ma barita i. Ia au, si Daniel, susa sajo do au hara ni i; jana husimpan do i sude di bagasan rohangku.