DANIEL 4 - BIBEL JAMITA NA DENGGAN

Marnipi si Nebukadnesar padua nolihon

¹ On ma boa-boa ni Raja Nebukadnesar na nitongosnia tu jolma sian sandok bangso, marga ni bangso dohot hata na marragam-ragam di sude portibi on: “Mur martamba-tamba ma hadameon di hamu!

² Por do rohangku paboahon tu hamu taringot tu tanda dohot hahomangan na nipatupa ni Debata Na Gumincat i tu au.

³ Halongangan situtu ma da tanda na nibaenNia! Hahomangan godang do di roha na nipatupaNia! Mamarenta salolot-lolotna do Debata! Markuaso do Ia sapanjangna.”

⁴ Sonang do au mangingani bagas godangku jana ngolungku marlobi-lobi.

⁵ Tapi di sada borngin taran modom au, marnipi ma au jana manjagit parnidaan na mambaen rohangku marsak situtu.

⁶ Jadi hupio ma angka halak na malo na adong di Babel laho patorangkon tu au astuan ni nipingki.

⁷ Tapi di na ro angka partondung, na malo manjampi, angka halak Kasdim dohot angka halak na umboto parhalaan jana hupaboa nipingki tu halahi, sahalak pe nada adong na malo patorangkon astuanna.

⁸ Ujungna ro ma si Daniel na nigoaran muse si Beltsasar songon goar ni debata na husomba i. Dirajai tondi ni angka debata na badia i ma si Daniel. Hupaboa muse ma nipingki tusia,

⁹ “Ale Beltsasar, pamimpin ni angka halak na marilmu, huboto do na nirajaan ni tondi ni angka debata na badia ho, jadi nada adong rahasia na buni di ho. Tangihon ma nipingkon jana patorang ma astuanna.

¹⁰ Jadi taran modom au huida ma sada hayu na gincat situtu na tubu di tonga-tonga ni portibi on.

¹¹ Na lobi gincat hayu i; bonana pe godang jana tohong. Lalu tu langit puncutna i, jabat tarida di sude jolma na satano on.

¹² Mangarata angka bulungna i, batuna pe ramos sajo, jabat tuk baen panganon ni jolma na satano on. Marmodoman angka binatang harangan di toruna i jana angka unggas pe marasari do di angka dangkana i. Jana sandok na mangolu dapotan sipanganon do sian ia.

¹³ Taran mamikiri parnidaan i au, huida ma sada surusuruan mijur sian banua ginjang; idaon songon na hobas do ia jana manat-manat.

¹⁴ Gogo ma sorania mangkuling mandok, ‘Taba ma hayu i jana tultuli ma angka dangkana, rurus ma bulungna i jana sarsarkon batuna i. Paorot ma angka binatang na marmodoman di toruna i dohot angka unggas na marasari di dangka-dangkana i.

¹⁵ Tapi anggo tungkona i padiar ma laing di bagasan tano i. Tambat ma dohot rante bosi dohot tumbaga, jana tadingkon ma i di padang-padang dihuliangi angka ruput na rata. Padiar ma i hona ombun jana mangolu rap dohot angka binatang dohot suan-suanan.

¹⁶ Padiar ma muba rohana sian roha jolma gabe roha ni binatang pitu taon honokna.

¹⁷ I ma haputusannami angka surusuruan na hobas jana na manat-manat. On do maksudnami: Anso dioku angka jolma sanga na di dia pe, na markuaso do Na Gumincat i maradopkon harajaan ni jolma dohot mangalehen harajaan i sanga tu ise pe na nitodoNia, bope tu halahi na umbile situtu pe!’

¹⁸ I ma da nipingki, ale Beltsasar. Saonnari paboa ma astuanna tu au. Sahalak pe sian angka halak na malo na adong di harajaankon nada malo paboahon tu au, hape anggo ho tarbaen ho do, dibaen dirajai tondi ni angka debata na badia do ho.”

Dipatorang si Daniel astuan ni nipi i

¹⁹ Umbege i, tarsonggot jana longang ma sangombas si Daniel na nigoaran muse si Beltsasar. Jadi au Raja Nebukadnesar, hudok ma tusia, “Beltsasar, ulang pola susa rohamu hara ni nipi i dohot astuanna.” Dialusi si Beltsasar ma, “Rajanami, denggan ma i sugari nian tu angka musu ni raja i ma masa angka na tarjadi na nipaboa ni nipi i jana ulang ma nian tu raja i.

²⁰ Songon i ma gincat ni hayu na niida ni raja i jabat lalu tu langit puncuna i jana bolas idaon ni jolma na satano on.

²¹ Mangarata angka bulungna jana batuna pe ramos jabat tuk mangalehen panganon ni sude jolma na satano on. Marsilaung di toruna angka binatang harangan jana angka unggas pe marasari di dangka-dangkana i.

²² O rajanami, raja i ma da hayu na gincat i. Sai martamba do hagodangan ni raja i lalu tu langit jana mabidang do kuaso ni raja i lopus tu ujung ni tano on.

²³ Diida raja i muse do sada surusuruan mijur sian banua ginjang na mandok, ‘Taba ma hayu on jana pamate, tapi padiar ma tungkona i tinggal di tano i. Tambat ma i dohot rante bosi dohot tumbaga lalu tadingkon ma di padang-padang dihuliangi angka ruput na rata. Padiar ma hona ombun ia jana mangolu rap dohot angka binatang pitu taon honokna.’

²⁴ Ale rajanami, on do astuan ni parnidaan i jana on ma na niputuskon ni Na Gumincat i taringot tu ari pangapudian ni raja i.

²⁵ Paoroton ma raja i sian tonga-tonga ni parngoluon ni jolma, jana mangolu di tonga-tonga ni angka binatang noma di padang. Pitu taon honokna sai mangan ruput raja i songon lombu jana modom di tano lapang na so martarup, gabe marombun-ombun. Dung salpu i, okuon ni raja i ma paboa na markuaso do Na Gumincat i di ginjang ni harajaan ni jolma, jana dilehen Ia harajaan i tu sanga ise sajo na nitodo ni rohaNia.

²⁶ Diparentahon surusuruan i do anso dipadiar tungko ni hayu i tinggal di bagasan tano i. Astuan ni i mandok gabe raja do mangulahi raja i dung dioku raja i, na guru di Debata do sude portibi on.

²⁷ Hara ni i, denggan ma diihutkon raja i sipaingotku. Ulang be sai mardosa raja i, tapi dipatulus raja i ma na denggan dohot na tigor, jana ibo ma roha ni raja i mida halak na pogos. Jadi muda songon i, sai tongtong ma martua raja i.”

²⁸ Tarjadi ma sudena i tu Raja Nebukadnesar.

²⁹ Dung dua bolas bulan muse, taran mardalan-dalan ia di kobun-kobun di tingkat parginjang ni bagas godang di Babel,

³⁰ didok ia ma, “Ligi da, na jeges ma antong kota Babel! Au ma da na mambangun i gabe kota sabungan ni negara laho patandahon kuaso ni hagogoonku, hagodangan dohot habonggalonku!”

³¹ Nada abis dope ia mangkuling di na nibegenia sora sian langit mandok, “Tangihon ma on ale Raja Nebukadnesar! Madung dibuat sian ho kuasomu songon raja.

³² Paoroton ma ho sian parngoluon ni jolma, jana mangolu di padang-padang ma ho songon angka binatang. Pitu taon honokna mangan ruput noma ho songon lombu. Dung salpu i okuonmu ma na markuaso do Na Gumincat i maradopkon harajaan ni jolma jana dilehen Ia harajaan i sanga na tu ise sajo na nitodoNia.”

³³ Laing di hatiha i, manigor tarjadi ma na nidok ni hata i. Hona usir ma si Nebukadnesar sian parngoluon ni jolma jana manjampal noma songon lombu. Hona ombun ma pamatangna, obukna songon ginjang ni imbulu ni halihi jana sisilonna songon ginjang ni sisilon ni unggas.

Dipuji si Nebukadnesar Debata

³⁴ “Dung salpu hatiha sipitu taon i, hupadorgak ma tu langit gabe sumuang ma torang rohangku. Jadi hupuji ma Na Gumincat i. Hupasangap jana hupagodang ma na Tongtong Mangolu i, Mamarenta noma Debata salolot-lolotna. Markuaso do Ia sapanjangna.

³⁵ Nada adong astuan ni bangso na di portibi on. Dirajai Debata do surusuruan na di banua ginjang dohot jolma na di tano on. Sahalak pe nada adong tarbaen mangalo hagiotNia, nada adong na puluk manyapai sanga aha na nibaenNia.

³⁶ Dung sumuang torang rohangku, gabe dipaulak ma tu au hagodangan, habonggalan dohot barita ni goarku. Disambut angka pagawe dohot angka na marpangkat au jana dipaulak ma tu harajaanku, mur tu godangna noma tehe sian na salpu.

³⁷ Jadi au saonnari, au si Nebukadnesar mamuji, pagincatkon dohot pasangapkon Raja Ni Banua Ginjang. Tutu jana tigor do sude pambaenanNa jana bisa do Ia patorukkon halak na ginjang marroha.”