DANIEL 2 - BIBEL JAMITA NA DENGGAN

Nipi ni si Nebukadnesar

¹ Sanoli di sada borngin, dung dua taon mamarenta Raja Nebukadnesar, marnipi ma ia. Marsak ma rohania dibaen nipinia i, lopus nada tarpodom be ia.

² Hara ni i dipiohon ia ma angka partondung, parjampi-jampi, datu dohot Kasdim laho patorangkon angka nipina i.

³ Didok raja i ma tu halahi: “Marnipi do au jana marsak sajo rohangku dibaen nada huboto astuan ni nipi i!”

⁴ Dialusi halahi ma di hata Aram: “Sai ginjang ma umur ni raja i salolot-lolotna! Patorang ma tu hami nipi i, anso hami patorang muse astuanna.”

⁵ Dialusi raja i ma, “Madung hubaen hatontuan songon on: Angkon paboaonmunu do nipi i tu au, songon i dohot astuanna. Muda nada tolap hamu, ponggol-ponggolon noma hamu jana bagasmunu angkon rumpakkononkon.

⁶ Tapi muda dapot hamu do, lehenonku ma tu hamu silehen-lehen na denggan dohot hasangapan. Antong, paboa hamu ma saonnari nipingki dohot astuanna!”

⁷ Dialusi halahi ma mangulahi, “Sugari antong jolo dipaboa raja i ma da nipi i tu hami, dung i hami patorang ma astuanna.”

⁸ Umbege i dialusi raja i ma, “Tumbuk do songon na nidodo ni rohangki. Hum na palambat-lambatkon do hamu dibaen diboto hamu do haputusanki,

⁹ laho manguhum hamu sude dohot dalan na sarupa muda nada diboto hamu paboahon nipi i tu au. Martahi do hamu torus paoto-otohon au betak sai bia ra au manguba haputusanki. Saonnari, paboa hamu ma nipi i, anso huboto muse nabisa hamu patorangkon astuanna.”

¹⁰ Dialusi partondung i ma, “Di sandok tano on sahalak pe nada adong na malo paboahon sanga aha na nihagiotan ni raja i. Jana nada unjung dope adong sada raja sanga na bia pe godangna dohot sangapna, mangido na songon i sian angka partondung, parjampi na malo, dohot sian angka parilmu na adong di bagas godang.

¹¹ Na maol do na nipangido ni raja i, sahalak pe nada adong na bisa paboahon i, asing sian angka debata, na so sainganan dohot jolma.”

¹² Umbege i gabe muruk sajo ma raja i jana diparentahon ia ma anso dibunu sude angka halak na malo-malo na adong di Babel.

¹³ Jadi dipabotohon ma parenta i, jana sude halak na malo-malo i dijalahi ma anso dibunu, dohot ma disi si Daniel bope angka dongannia i.

Dipatuduhon Debata nipi i dohot astuanna tu si Daniel

¹⁴ Jadi didapotkon si Daniel ma si Ariokh, pamimpin ni pangawal ni raja i na ditugaskon mambunu angka na pistar.

¹⁵ Manat-manat ma si Daniel marsapa tu si Ariokh sanga hara ni aha umbaen na ruar parenta ni raja i na songon i kejamna. Dipaboa si Ariokh ma tu si Daniel sanga aha na masa.

¹⁶ Manigor kehe ma si Daniel manopot raja i jana mangido anso dilehen tingki laho patorangkon astuan ni nipi i.

¹⁷ Dipalalu ma pangidoannia i, lalu mulak si Daniel tu bagas jana dipaboa ia ma sude na masa i tu si Hananya, si Misael dohot si Asarya.

¹⁸ Disuru ia ma halahi martangiang tu Debata na di banua ginjang i anso ibo rohaNia mida halahi jana anso dipaboa arti ni nipi i. Jadi muda songon i nada be bunuon halahi rap dohot angka na pistar na adong si Babel.

¹⁹ Laing di borngin i dipaboa Debata ma tu si Daniel arti na di bagasan sada parnidaan. Jadi dipuji si Daniel ma Debata na di banua ginjang i.

²⁰ Dung i ro ma alus ni si Daniel, ning ia ma: “Pinuji ma goar ni Debata salolot ni lolotna, angke sian Ia do hapistaran dohot hagogoon!

²¹ Ia do na manontuhon musim dohot hatiha, dibalikkon Ia do parkuaso jana dipajongjong Ia. Laing Ia muse do na mangalehen habisuhon, jana na mambasa-basahon parbinotoan.

²² Dibuka Ia do rahasia na lobi bagas. Diboto Ia do sude na tarjadi di bagasan hagolapan. Jana sinondang maringan di bagasan Ia.

²³ Ale Debata na nisomba ni daompung, hupuji jana hupasangap Ho. Dibaen dilehen Ho di au bisuk dohot gogo. Madung ditangihon Ho pangidoannami. Jana dipatuduhon Ho do alus tu raja i.”

Dipaboa jana dipatorang si Daniel nipi i

²⁴ Dung i kehe ma si Daniel mandapotkon si Ariokh na disuru laho mamunu angka halak na pistar di Babel i. Didok si Daniel ma tusia, “Ulang bunu angka na pistar i. Oban ma au manopot raja i, angke giot paboaonku tu raja i sanga aha nipi i dohot astuanna.”

²⁵ Manigor dioban si Ariokh ma si Daniel manopot Raja Nebukadnesar lalu didok ia ma: “Padumpang do au dohot sada halak sian angka buangan Jahudi i, na malo paboahon nipi ni raja i.”

²⁶ Jadi didok raja i ma tu si Daniel na margoar muse si Beltsasar, “Tarpaboa ho dehe tu au nipingki dohot astuanna?”

²⁷ Dialusi si Daniel ma, “Rajanami, nada adong halak na marilmu, na malo manjampi, partondung sanga pe na umboto parhalaan tarbaen paboahon na songon i tu raja i.

²⁸ Tapi adong do di banua ginjang Debata na mambuka sude rahasia, jana madung dipaboa Ia tu raja i sanga aha na giot tarjadi tu pudi on. Jadi on ma nipi ni raja i dohot astuanna:

²⁹ Taran modom raja i, marnipi do raja i taringot tu hatiha na giot ro. Dipatidahon Debata sibuka rahasia i do tu raja i sanga aha na giot masa.

³⁰ Saonnari madung dipataridahon tu au rahasia i, nada hara ni na ummalo au sian angka na asing i, tapi anso bisa do botoon ni raja i taringot tu nipi ni raja i jana anso bisa diastui raja i taringot tu angka pikiran na ro tu raja i sandiri.

³¹ On ma parnidaan na niida ni raja i: Adong sada patung di jolo ni raja i! Na lobi godang patung i, jana marlinang-linang, jana na sun jorbut rupana.

³² Sian sere do dibaen uluna i, andorana dohot tanganna sian perak, gontingna dohot butuhana sian tumbaga,

³³ hae-haena sian bosi jana patna i deba sian bosi, deba nari sian tano liat.

³⁴ Taran manatap raja i tu patung i, magulang ma sada batu sian dolok-dolok, nada adong halak mandabuhonsa, ditondong ma patna na sian bosi dohot tano liat i, gabe maropuk,

³⁵ jana maropuk ma bosi, tano liat, tumbaga, perak dohot sere i songon abu di pardegean ni gandum taran di logo ni ari. Marhabangan ma abu na i diombus angin, lopus nada adong be partinggalna. Tapi anggo batu na godang na mangunggalkon patung i gabe sagodang ni dolok jana gabe digohi ma tano on.

³⁶ I ma nipi ni raja i, jana hupatorang ma saonnari astuanna.

³⁷ Na niparsangapan, raja i ma raja ni sandok raja; raja i do na sumangap. Dilehen Debata na di banua ginjang i do tu raja i harajaan on, kuaso, gogo dohot hagodangan.

³⁸ Dibaen Ia do raja i gabe parkuaso di sude tano na niinganan ni jolma jana pangarajai ni sandok unggas dohot angka binatang na asing i. Raja i sandiri ma ulu sere na di patung i.

³⁹ Tapi dung marujung harajaon ni raja i, ro muse ma harajaan na asing na ummenek sian harajaan ni raja i, ro muse ma harajaan na patoluhon na nigambarkon ni tumbaga na di patung i, na mangarajai sandok tano on.

⁴⁰ Ihut ma harajaan na paopatkon, na sarupa dohot bosi gogona. Jana songon bosi na mangaropuk sanga na aha pe, laing songon i muse ma harajaan na paopatkon on mangaropuk dohot mangalantuk angka harajaan na asing i.

⁴¹ Pat dohot jari-jari ni patna i na sian tano liat deba jana deba nari sian bosi i, patuduhon bahaso na giot marbagi-bagi do harajaan i di pudian ni ari. Adong muse do gogo ni harajaan i, angke marcampur bosi do tano liat i.

⁴² Jari-jari ni patna na deba nari bosi jana na deba nari sian tano liat i astuanna, adong do deba sian harajaan i na gogo jana adong muse na gale.

⁴³ Bosi na marcampur tano liat i, i ma patandahon na marusaho harajaan i patamba gogona marhite na mambuat dohot mangalehen boru, tapi nada adong gunana, laing songon bosi i na so tarbaen marsada dohot tano liat i.

⁴⁴ Di hatiha ni angka raja-raja i mamarenta, giot pajongjongon ni Debata na di banua ginjang i ma sada harajaan na manongtong sapanjangna jana na so tartaluhon bangso dia pe. Roncohonon ni harajaan na sada i ma sandok harajaan na asing i tapi harajaan na sada i, manongtong do ro di salolot ni lolotna.

⁴⁵ Nada he diida raja i do sada batu na magulang sian dolok-dolok i haru pe nada adong halak na mandabuhonsa, lalu manondong dohot mangaropuk patung na sian bosi, tumbaga, tano liat, perak dohot sere i? Didok Debata na sun godang i do tu raja i sanga aha muse na giot masa tu pudi on. Madung hupaboa nipi ni raja i na satutuna jana hupatorang astuanna na sasintongna.”

Manjagit upa na patut si Daniel sian raja i

⁴⁶ Dung i manungkap ma Raja Nebukadnesar di jolo ni si Daniel jana diparentahon ia ma tu rayat i anso pasangaphon si Daniel jana manghaulkon tusia haul situtungon dohot angka haul na asing i.

⁴⁷ Didok raja i ma, “Tutu do Daniel, gumodang do Debatami sian sandok debata. Guru diSia do sude raja, jana na margogo mambuka rahasia. Huboto pe na songon i, hara ni na bisa do ho patorangkon astuan ni rahasia on.”

⁴⁸ Dung i dilehen ia ma di si Daniel pangkat na gincat, dileheni ia angka silua na jeges-jeges, jana diangkat ia si Daniel gabe pangarajai ni Babel lalu dibaen ia gabe pamimpin ni sude panuturi ni raja.

⁴⁹ Tapi hombar tu pangidoan ni si Daniel, dipasahat raja i ma laho mangarajai propinsi Babel tu si Sadrakh, si Mesakh dohot si Abednego, tapi anggo si Daniel sandiri maringanan di bagas godang ni raja i ma.