DANIEL 11 - BIBEL JAMITA NA DENGGAN

¹ tarsongon au na jolo mangondingi ia laho mangurupi dohot patogu ia, i ma di taon parjolo dung mamarenta si Darius, halak Media i.

² Jana sanga aha na giot sidokkononku tu ho, na tutu do i.” Didok surusuruan i ma, “Tolu raja na asing na giot mamarenta Persia, ihut ma raja na paopatkon na ummora ulang pado na asing i. Di hagogok ni kuaso dohot hamoraonnia, ditahi rohania ma giot marporang mangalo harajaan Junani.

Harajaan Mesir dohot Harajaan Siria

³ Dung i ruar ma sada raja na gogo. Parentaonnia ma sada harajaan na lobi godang jana baenonnia ma roha-rohania.

⁴ Tapi santongkin dope ia mamarenta, mabola ma harajaannia gabe opat bagian mangihutkon haroro ni alogo sian langit, nada madabu tu pinomparna, jana nada markuaso songon ia, angke madabu do harajaannia, gabe harajaan ni halak na asing. Angka raja na so sian pomparannia noma mamarenta manggonti ia jana nada songon ia gogo ni halahi.

⁵ Anggo raja ni Mesir gabe margogo do. Tapi sada sian angka panglimana i gabe gumogo sian ia, jana harajaan na gumodang muse ma na giot parentaonnia.

⁶ Dung adong piga-piga taon muse, giot mambaen hasadaan ma raja ni Mesir dohot raja ni Siria jana pabagasonnia ma borunia tu raja ni Siria. Hape nada lolot tahan hasadaon i, jana hona bunu ma borunia i, songon i halaklahina dohot anakna dohot angka naposona na manaruhon ia.

⁷ Nada sadia honok dung i, gabe raja ma sada halak sian horong ni boru ni raja i. Pajoloonnia ma mamorangi tentara ni raja ni Siria, roroonna tu bentengna i lalu taluhononna.

⁸ Di na laho mulak ia tu Mesir, obanonnia ma patung ni debata ni musuna i dohot barang-barang sere dohot perak na dung dihaulkon tu debatana i. Nada porangonnia be raja ni Siria piga-piga taon.

⁹ Dung i ro ma raja ni Siria mamorangi Mesir, tapi talu do ia jana mulak boti baenonna tu tanona sandiri.

¹⁰ Jadi marhobas ma angka anak ni raja ni Siria laho marporang dohot mambaen tentara na bahat. Maju ma sada sian halahi margalusak songon aek magodang torus mamorangi benteng ni musu.

¹¹ Jadi muruk ma raja ni Mesir jana maju muse ma ia tu galanggang ni porang mangalo raja ni Siria i. Tartaluhon ia do tentara ni Siria na bahat i.

¹² Dung i ginjang ma rohania hara ni hamonangannia i dohot hara ni bahat ni musu dimatehon ia, tapi nada sai torus ia monang.

¹³ Padua nolihon dibaen raja ni Siria parangan na bahat, umbahat sian na parjolo i dope. Muda dung dapot hatihana, pungkaonnia ma mardalan rap dohot tentara na marsinjata na singkop i.

¹⁴ Jadi gabe bahat ma halak na giot mangalo tu raja ni Mesir. Jana piga-piga sian bangsomi angka na gogo ale Daniel, dohot muse ma mangalo hara ni na dung diida halahi sada parnidaan. Tapi nada manjadi karejo ni halahi i.

¹⁵ Dung i hobuhon ni raja ni Siria ma sada kota na marbenteng jana buatonna. Nada bisa tentara ni Mesir i martahan; angka tentara pilian pe nada adong be gogona.

¹⁶ Roha-roha ni raja ni Siria i ma baenonna nada adong pola be paraloan mangambatisa. Inganannia ma tano parjanjian i jana marguru disia sajo noma sudena.

¹⁷ Dung i, hobasan ni raja ni Siria ma sude tentarania laho mamorangi Mesir. Dohot sada tujuan na giot patundukkon sude harajaan ni musuna, baenonnia ma sada partahian dohot musuna i jana pabagasonnia ma borunia dohot raja ni Mesir i; tapi nada manjadi sangkap na nibaennia i.

¹⁸ Dung salpu i; giot porangonnia ma angka bangso na di topi ni laut, jana bahat do i taluhononna. Tapi taluhonon ni sada pamimpin ni luat na asing ma ia jana antahonna ma incak-incak na nibaenna, jana mur ia noma layasan ni angka pamimpin ni luat na asing i.

¹⁹ Dung i diadopkon ia ma bohinia tu angka kota na marbenteng di kotania sandiri; tapi tarsilandit do ia jana madabu jana nada adong be barita taringot tusia.

²⁰ Gontion ni sada raja ma ia, i ma raja na giot marsuru angka pagawena laho palagutkon pajak mardongan paksa laho manambai sinadongan ni harajaanna. Nada piga ngombas hona bunu ma raja i, nada pola di sihapataran jana nada muse di bagasan porang.”

Raja ni Siria na jahat

²¹ Didok surusuruan i muse ma tu au, “Raja na mangihut mamarenta di Siria i ma sada halak na jahat na so patut gabe raja. Tapi ro do ia sian na so pamotoan jana dirampas ia ma harajaan sian raja i marhite sipaoto-oto.

²² Sude tentara na ro angkon diayup do dijolona jana dipatalu, jana dohot muse do sahalak Parjanjian.

²³ Marhite na mambaen angka parjanjian, paoto-otoonnia ma angka bangso na asing. Jana mur tamba ma gogonia, haru pe hum harajaan na menek sajo do na niparentania.

²⁴ Porangannia ma angka tano na napu, nada jolo adong boa-boana. Baenonnia ma angka na so jungada dope dipatupa ompuna. Jadi bagi-bagihononnia ma tu angka na mangihutkon ia sude barang na dirampas dohot sinadongan na dapotnia di bagasan parporangan. Baenonnia ma mata-mata laho mamorangi angka inganan na marbenteng, tapi tibu do marujung hatihana.

²⁵ Mardongan habaranion baenonnia ma tentara na bahat laho mamorangi Mesir na dung hobas muse laho mangalo ia dohot tentara na gogo. Tapi tarpaoto ma raja ni Mesir gabe nada manjadi karejo na.

²⁶ Angka panuturinia na dumonok tusia, i ma na giot mandabuhon ia. Bahat do sian angka tentarania na hona bunu, jana ias haiasonna angka tentarana i.

²⁷ Dung i rap juguk ma raja na dua i sameja jana rap mangan, tapi marroha na jahat do halahi na dua, jana marsigabusan ma halahi. Tapi sundat do sangkap ni halahi i dibaen nada dapot dope hatihana.

²⁸ Dung i mulak ma raja ni Siria i tu tanona maroban sude barang na nirampasnia. Dipasada ia do rohana laho mangagohon ugamo na nitiop ni bangso ni Debata. Patupaonnia ma roha-rohania lalu mulak ma ia tu tanonia.

²⁹ Dung sadia honok, ro muse ma ia mamorangi Mesir, tapi asing do akibatna sian na parjolo i,

³⁰ harana ro ma angka kapal ni halak Kitim mangalo ia, gabe mago ma habaranionna. Dung i mulak ma ia mardongan hosom maradopkon Parjanjian Na Badia i jana angkon martindak do ia. Dung mulak ia parate-atehononnia ma halak na maninggalkon Parjanjian Na Badia i.

³¹ Ramun ma inganan na badia i baenon ni piga-piga halak sian tentarania i. Soadahonon ni halahi ma haul siganop ari jana pajongjongon ni halahi ma Hajahatan Na Mangagohon.

³² Jadi marhite sipaoto-oto, jajang-jajangon ni raja i ma angka jolma na dung marbalik sian ugamo ni halahi, anso ra mangurupi ia. Tapi aloon ni angka halak na burju marugamo tu Debata do halahi.

³³ Angka halak na bisuk mamimpin rayat, baenonna ma bahat halak mangarti. Tapi sanga na piga ngombas, hona bunu do piga-piga halak sian halahi hara ni porang, sanga hara ni api, jana deba nari hona samun dohot hona tangkup.

³⁴ Jadi taran mardalan pamunuon i, dapotan pangurupion ma saotik bangso ni Debata, jana bahat ma halak na ro pasadahon dirina tu halahi tapi nada sian roha na situtu.

³⁵ Hona bunu ma deba angka pamimpin na marbisuk i, tapi akibatna songon on ma: gabe mur polin ma angka jolma i. Songon i ma torus lalu tu hatiha na parpudi, i ma hatiha na dung ditontuhon Debata.

³⁶ Roha-roha ni raja Siria ma baenonna. Dokkononnia ma sian ginjang ni rohana, bahaso na gumodang ia ulang pado sandok debata na dia pe i. Salang sian Debata Na Gumincat i pe laing gumodang dope ia didok rohania. Tarpupu ia dope mambaen songon i lopus dapot hatihana uhumon ni Debata ia. Tumbuk do sibaenon ni Debata hombar tu sangkap na nibaenNia.

³⁷ Nada diterge raja i sanga na debata dia pe jadi na nisomba ni ompuna, dohot debata pujian ni angka dadaboru. Nada dipardulihon ia angka debata i sudena, angke gumodang do ia dihilala rohana sian i sudena.

³⁸ Tapi sombaonnia ma debata na so unjung disomba angka ompuna, i ma debata na mangondihon angka benteng. Haulkononnia ma sere, perak, batu na arga dohot angka haul na marlobi-lobi na asing i tu debata na so unjung i dope disomba angka ompuna i.

³⁹ Pilionnia ma angka jolma na marsomba tu debata na asing i laho mampartahankon angka bentengnia i. Sanga ise na ra manjagit ia songon raja, lehenonnia ma hasangapan na godang dohot pangkat na gincat dohot tano bage songon upana.

⁴⁰ Muda marayak marujung ma kuaso ni raja Siria i, ro ma raja ni Mesir mamorangi ia. Jadi baloson ni raja ni Siria ma parangan i lopus marujung. Padohotonnia ma bahat kareta porang, kudo, dohot kapal. Mangaroro ma ia songon aek magodang jana solatonna bahat luat.

⁴¹ Salang tano na denggan i pe porangannia muse do, jana bunuonnia ma halak marribu-ribu. Tapi anggo Harajaan Edom, Moab dohot tano na ummarga sian Harajaan Amon, malua do i.

⁴² Di na nitaluhonnia angka harajaan i, Harajaan Mesir pe nada malua.

⁴³ Rampasonnia ma sinadongan ni Mesir na dibunihon, i ma angka sere, perak maradu barang na asing sigodang arga. Taluhononnia ma Sudan dohot Libia.

⁴⁴ Jadi ro ma barita na manyonggot sian Habincaran dohot sian Utara, jadi gabe marporang ma ia abis-abisan jana bunuonnia ma bahat halak.

⁴⁵ Mur baenonnia muse ma benteng ni harajaannia na godang jana na gincat i di antara ni laut dohot Dolok Na Jeges na badia. Tapi mate do ia muse jana sahalak pe nada adong na mangurupi ia.”