BILANGAN 6 - BIBEL JAMITA NA DENGGAN

Taringot tu halak parjanjian

¹ Disuru Tuhan do si Musa

² mangalehen angka aturan on tu halak Israel. Ganop halaklahi sanga dadaboru na marniet gabe sahalak nasir na mangalehen sude ngoluna tu Tuhan,

³ angkon pantangkononnia ma anggur dohot tuak. Nada tola inumonnia sanga siinumon aha pe na nibaen sian anggur jana nada tola mangankon batu ni anggur sanga kismis.

⁴ Salolot gabe nasir ia nada tola panganonnia sanga sipanganon aha pe na nibaen sian bona ni anggur, batu ni anggur sanga lampak ni hayuna pe nada tola panganonna.

⁵ Salolot dinietkon ia gabe halak nasir ia, nada tola manggunting obuk sanga marcukur. Madung dirahut nietnia i ia lopus gok hatihana pasahatkon dirinia tu Tuhan. Salolot ni i ma angkon padiaronnia maginjang obuk dohot janggutnia.

^6-7 Gabe tanda do obuknia i bahaso na dung dilehen ia sude ngolunia tu Debata. Hara ni i ma nada tola pahodaronnia dirinia. Nada tola donok ia tu bangke, haru pe bangke ni amangna, inangna sanga bangke ni kahanggina.

⁸ Salolot nasir dope ia madung halak na mardohonan ia di Tuhan.

⁹ Muda gabe hodar obuk ni sada halak nasir na dung mardohonan tu Tuhan hara ni na topet ia di lambung ni sada halak na mate ompot, angkon painteonnia pitu ari honokna dung i angkon dicukur ia obuknia dohot janggutnia disi pe anso ias ia.

¹⁰ Di ari pasalapankon obanonnia ma dua darapati sanga hatutu tu malim di pintu ni Bandar Parmianan Ni Tuhan.

¹¹ Unggas na sada lehenon ni malim i ma i gabe haul hasesaan ni dosa jana na asing i, gabe haul situtungon ma i laho paiaskon sian hahodaron hara ni na dais tu bangke i. Laing di ari i angkon mangulahi baenon ni halakna i mardohonan obukna i,

¹² jana paimbaruhon pangalehenan ni dirina songon halak nasir salolot ni hatiha na ditontuhon. Hatiha na dung salpu nada etongon be i angke obuk na mardohonan i madung gabe hodar. Songon haul gonti ni hararugi angkon pasahatonnia sada anak ni biri-biri na marumur sataon.

¹³ Muda dung salose niet ni sada halak nasir, baenonnia ma sada pangalaho na mardomu tusi, i ma angkon kehe ia tu pintu ni Bandar Parmianan Ni Tuhan,

¹⁴ lehenonnia ma tu Tuhan tolu pahan-pahanan na so martihas, sada anak ni biri-biri jantan umur sataon gabe haul situtungon, sada anak ni biri-biri boru-boru marumur sataon, gabe haul hasesaan ni dosa dohot sada biri-biri jantan gabe haul haluaan.

¹⁵ Ia sandiri angkon mangalehen roti sabakul na nipauli so marragi, i ma roti na hibul na nibaen sian topung na marcampur miak zetun dohot kue na nipis na dung niapusan dohot miak zetun. Tamba ni i angkon lehenonnia dope gandum dohot aek ni anggur.

¹⁶ Lehenon ni malim i ma i sude tu Tuhan; angkon lehenonnia haul hasesaan ni dosa dohot haul situtungon.

¹⁷ Rap dohot roti na sabakul i, angkon haulkononnia biri-biri jantan i tu Tuhan gabe haul hasesaan ni dosa. Dung i haul gandum dohot aek ni anggur i angkon haulkononnia tu Tuhan.

¹⁸ Di pintu ni Bandar Parmianan Ni Tuhan angkon cukuron ni nasir i obukna, dung i pamasuhonna tu api inganan ni haul haluaan i hatiha ditutung.

¹⁹ Dung songon i muda dung masak hae-hae jolo ni biri-biri jantan i, buaton ni malim i ma i jana dipayakkon rap dohot sada roti na hibul dohot sada roti na nipis sian bakul i, tu tangan ni nasir i.

²⁰ Dung i lehenon ni malim i ma sipanganon i gabe silehen-lehen na mardohonan tu Tuhan, haul na badia do on di malim na gabe songon tamba ni andora dohot pat ni biri-biri jantan mangihutkon aturan gabe bagian ni malim. Dung i pe anso tola halak nasir i minum anggur.

²¹ On ma angka aturan tu nasir, tapi muda dijanjihon sahalak nasir do lobi sian na ninietkonnia angkon digohi ia do laing songon na dijanjihonnia i.

Hata pasupasu ni malim

²² Diparentahon Tuhan ma tu si Musa

²³ laho pabolkaskon tu si Harun dohot tu angka anaknia anso didok halahi hata on hatiha dipasupasu halahi bangso Israel:

²⁴ Sai dipasupasu jana dijagohon Tuhan i ma hamu.

²⁵ Sai disondangkon Tuhan ma bohiNa tu hamu jana asi ma rohaNa di hamu.

²⁶ Sai diadopkon Tuhan ma bohiNa tu hamu jana dipasaor ma dameNa tu hamu.

²⁷ Dung i didok Tuhan, “Muda didok halahi goarKu mamasumasu bangso Israel pasupasuonKu ma halahi.”