BILANGAN 5 - BIBEL JAMITA NA DENGGAN

Paraturan taringot tu halak na ramun

¹ Didokkon Tuhan ma tu si Musa,

² “Parentahon ma tu halak Israel: Anso sude halak na marnyae kusta, sude halak na maraek-aek ruar sian pamatangnia dohot sude halak na ramun hara ni bangke angkon nisuru kehe maninggalkon parbandaran i.

³ Bope halaklahi sanga dadaboru angkon suruonmu kehe tu balian ni parbandaran, anso ulang diramuni halahi inganan parbandaran, ingananKu rap dohot halahi.”

⁴ Dipatulus halak Israel do na niparentahon ni Tuhan tu si Musa, jana disuru halahi ma na marnyae i maninggalkon parbandaran.

Taringot tu gonti rugi

⁵ Dilehen Tuhan dope marhite si Musa

⁶ angka aturan tu bangso Israel. Muda adong sahalak na so manghabiari Tuhan, mambaen hasalaan tu halak na asing,

⁷ angkon okuon ni halakna i dosana jana gararonnia sude, ditamba dope dua pulu porsen tu halak na nirugiannia i.

⁸ Tapi anggo dung mate halak na nirugiannia i, jana nada adong koum na solkot, tu Tuhan ma gararonna gabe bagian ni malim. Panggararna i nada masuk etongon biri-biri jantan na nipake di hatiha na mambaen pardamean hara ni na marsala i.

⁹ Jana ganop silehen-lehen na mardohonan na nilehen ni halak Israel tu Tuhan, gabe bagian ni malim na manjagit na nilehen i ma i.

¹⁰ Silehen-lehen na nilehen tu malim buaton ni malim i sandiri ma i disia.

Taringot tu halaklahi na manuhasi dadaboruna

¹¹ Disuru Tuhan si Musa

^12-14 mangalehen angka paraturan on tu halak Israel. Sai adong do masa di sada halaklahi mangkilala na so tunduk be dadaborunia tusia. Curiga rohania di dadaborunia i na dung rorang hara ni na margaul dohot halaklahi na asing. Tapi di halaklahi i nada adong sada sitiopan na tontu, angke marsibuni do dadaborunia mangkarejohon na songon i, saksi pe nada adong, dadaboru i pe nada jungada tardapot. Sanga ra muse do antong, sahalak halaklahi manuhas i dadaborunia, hape nada adong hasalaan ni dadaboru i.

¹⁵ Muda masa pangalaho na dua on, angkon obanonna ma dadaborunia i tu malim. Obanonnia muse silehenon na porlu tusi, i ma sakilogram topung dahanon. Nada tola baenon tu topung i miak zetun sanga hamonyan, angke na nilehen ni sada halaklahi na mangiburu; jana hasayana anso diboto ia do tutu sanga nada na nituhaskonnia i.

¹⁶ Obanon ni malim i ma dadaboru i tu jolo jana disuru ia jongjong di jolo ni langgatan i.

¹⁷ Dung i buaton ni malim i ma sada mangkuk na binaen sian tano, lalu diusehon ia saotik aek na badia tu bagasan. Dung i dibuat ia muse saotik tano sian lante ni Bandar Parmianan Ni Tuhan jana dipamasuk ia ma tu aek i anso gabe aek na tarbaen parohon bura.

¹⁸ Sarsaron ni dadaboru i ma obukna jana tiop di tangannia topung silehenon i. Mangkuk na marisi aek na tarbaen parohon bura i, malim i do maniop i.

¹⁹ Dung i didok malim i ma hata ni sumpa jana angkon jagiton ni dadaboru i do hata ni sumpa i. Angkon dohonon ni malim i ma: “Muda so tutu ho markarosuan, nada hona ho sumpa na niparo ni aek on.

²⁰ Tapi anggo tutu do ho markarosuan,

²¹ Tuhan ma mambaen goarmu gabe sada bura di tonga-tonga ni bangsomu, hesut ma hae-haemu jana busungon ma ho.

²² Masuk ma aek on tu butuhamu mambaen ho busungon jana hesut na niabitanmi.” Alusan ni dadaboru i ma, “Hujagit ma i; sai dibaen Tuhan i ma songon i.”

²³ Dung i disuratkon malim i ma hata ni bura i, lalu diapus ia dohot aek na di bagasan mangkuk i.

²⁴ Tarbaen aek i do gabe hancit situtu hilalaon ni dadaboru i. Tapi taran so disuru dope inumon ni dadaboru i aek i

²⁵ buaton ni malim i ma topung sihaulkonon i, lalu dipahortang tanganna tu ginjang laho pasahatkon tu Tuhan. Dung i haulkononna ma topung i di ginjang ni langgatan.

²⁶ Buaton ni malim i ma sanggolom topung i tanda ni na nihaulkon, jana ditutung ma i di ginjang ni langgatan. Ujungna dipainumkon ma aek i tu dadaboru i.

²⁷ Sugari na dung tutu dadaboru i markarosuan gabe hancit situtu ma hilalaon ni dadaboru i baenon ni aek i, busungon ma butuhana jana hesut hae-haena. Gabe bura ma goarna i di tonga-tonga ni bangsona.

²⁸ Tapi muda na so marsala do ia, nada hona bura i, jana tarbaen dope ia tubuan anak.

^29-30 Songon i ma tona taringot tu sada halaklahi na mangiburu tu dadaboruna na markarosuan. Suruon ni malim i ma dadaboru i jongjong di jolo ni langgatan di na patuluskon aturan i malim i.

³¹ Malua do halaklahina i sian hasalaan, tapi anggo tutu do marsala dadaboruna i, mangae ma ia patundana.