BILANGAN 35 - BIBEL JAMITA NA DENGGAN

Angka kota ni halak Levi

¹ Di tano na hornop na di Moab, donok tu Batang aek Jordan paadop-adop dohot kota Jeriko, didok Tuhan ma tu si Musa,

² “Pabolkas ma tu bangso Israel, bahaso tano pusako na nijagit ni halahi i, sanga piga kota dohot padang ruput na humaliangna, angkon lehenon ni halahi tu halak Levi, anso maringanan halak Levi i disi.

³ Gabe siteanon ni halak Levi ma angka kota i baen inganan ni halahi. Padang ruput humaliangna i ma panjampalan ni pahan-pahanan ni halahi dohot binatang-binatang na asing.

⁴ Bidang ni padang-padang ruput i 450 meter humaliang disuhat sian tembok ni kota i.

⁵ Jadi luat ni halak Levi marrupahon opat sogi, gabe 900 meter ganop topina jana kota di tonga-tonga.

⁶ Tu halak Levi i angkon lehenonmunu onom kota haporusan gabe inganan haporusan ni angka halak na so marsangajo mamunu jolma. Asing sian i angkon lehenonmunu dope tu halak Levi opat pulu dua nari kota,

⁷ dohot padang ruputna. Jadi sude opat pulu salapan ma kota ni halak Levi.

⁸ Bahat ni kota ni halak Levi di ganop luat di Marga Israel angkon ditontuhon mangihutkon godang dohot menek ni ganop luat i.”

Angka kota haporusan

⁹ Disuru Tuhan ma si Musa,

¹⁰ pabolkaskon tu halak Israel angka hata on, “Dung ditaripari hamu Batang aek Jordan jana dimasuhi hamu tano Kanaan

¹¹ angkon tontuhononmunu kota haporusan, anso tarbaen angka halak na so marsangajo mamunu jolma, marlojong tusi.

¹² Di angka kota na songon i aman halahi, malua sian hosom ni sisolkot ni na tarbunu i. Angke halak na hona tuhas mamunu jolma, nada tola uhumon mate i taran so dipareso parkarona di pangadilan.

¹³ Tontuhon ma onom kota:

¹⁴ tolu di Habincaran ni Batang aek Jordan, tolu nari di tano Kanaan.

¹⁵ Gabe kota haporusan ma i di halak Israel dohot di halak na leban na rap dohot hamu santongkin sanga manongtong pe. Sanga ise na mamunu halak na asing na so disangajo, tola do maporus tu angka kota i.

^16-18 Tapi muda adong sada halak na mamake sinjata bosi, sanga batu sanga hayu pe mamunu halak na asing, madung sala halakna i hara ni na mamunu, ia pe angkon mate uhumon.

¹⁹ Koum sisolkot ni na tarbunu i, palalu uhuman mate. Muda padumpang ia dohot si pamunu i, dibunu ia ma i.

²⁰ Muda magigi sahalak tu na asing, lalu dibunu ia diumban, sanga didanggurkon ia sanga aha tu halak i,

²¹ sanga pe ditenju ia, sala do halakna i hara ni na mamunu, jadi halak i pe angkon niuhum mate. Sisolkot na dumonok tu na nibunu i do mambaen uhuman mate i. Muda marsuo ia dohot na mamunu i, dibunu ia ma i.

²² Tapi umpamana, sahalak na so marsangajo mamunu halak na asing na so dihagigihon ia, marhite na mangumban sanga pe na mandanggurkon sanga aha tusia.

²³ Sanga umpamana sada halak na so pola mangaligi, didabu ia batu na mambaen pola mate halak na asing na so musunia jana nada adong muse maksudnia pasusahon halakna i.

²⁴ Di bagasan parkaro na songon i angkon rapot godang do na mandabu uhum tu na mambaen mate i, nada sisolkot ni na mate i na giot mambaloskon.

²⁵ Halak na mamunu na so disangajo i, angkon ondingan ni halak na bahat do i sian pamaloson ni sisolkot ni na mate i. Angkon obanon ma halahi mulak tu kota haporusan, inganan haporusannia. Tinggal ma ia disi lopus mate malim godang na di kota i.

²⁶ Tapi sugari ma ditinggalkon ia kota haporusannia i,

²⁷ hape marsuo dohot sisolkot ni na mate tarbununia i, gabe dibunu ma ia, nada na mamunu ia i.

²⁸ Jadi angkon tinggal ia disi lopus mate Malim Godang di kota i, dung i pe anso tola ia mulak.

²⁹ Angka paraturan on mangonai do tu hamu, tu pomparanmunu, sanga di dia hamu maringanan.

³⁰ Di bagasan parkaro na mamunu, halak na asing, anso tarsalahon ia jana anso tola diuhum mate, angkon adong dua halak sanga lobi manyaksihon i. Hum sahalak saksi nada tuk manyaksihon sanga na tutu na nituhaskon i.

³¹ Sahalak pamunu angkon mate uhuman. Nada tola tobusonnia uhuman i dohot hepeng.

³² Muda maporus ma sahalak tu kota haporusan nada tola jagitonmunu hepeng sian ia anso tola ia mulak tu bagasnia taran so mate Malim Godang.

³³ Muda dibaen hamu songon i, hamu do mangaramuni tano na niingananmunu i. Pamunuon mangaramuni luat, jadi nada adong pangalaho na asing laho paias luat i lobi sian na mambuat hosa ni sipamunu i.

³⁴ Ulang ramuni hamu tano na niingananmunu, angke Au do Debata, jana Au maringanan di tonga-tonga ni bangso Israel.”