BILANGAN 34 - BIBEL JAMITA NA DENGGAN

Angka parbalohan ni luat i

¹ Dilehen Tuhan dope tu si Musa

² angka parenta on tu halak Israel, “Santongkin nari masuk ma hamu tu tano Kanaan, luat na giot lehenonKu gabe tano siteanonmunu. Songon on ma parbalohan ni luat i.

³ Balok di Selatan marginjang sian Halongonan Zin manopi-nopi parbalohan dohot Edom. Di sabola Habincaran gurat ni parbalohan i mamungka sian ujung ni Selatan ni Laut Mate,

⁴ lalu mangeldok tu Selatan adop Dalan Akrabim, dung i torus tu Zin lalu tu Kades-Barnea sabola Selatan. Sian i mangeldok tu Barat Laut lalu tu Hasar Adar torus tu Asmon.

⁵ Mangeldok ma parbalohan i disi tu rura parbalohan dohot Mesir, marujung di Laut Tonga.

⁶ Laut Tonga do parbalohan ni luatmunu sabola sian Hasundutan.

⁷ Gurat parbalohan di Utara mamungka sian topi Laut Tonga manuju tu Dolok Hor

⁸ sian i tu Dalan Hamat torus tu Zedad

⁹ dohot tu Zifron jana marujung di Hasar Enan.

¹⁰ Gurat parbalohan di Habincaran, mamungka sian Hasar Enan tu Sefam.

¹¹ Sian i torus tu Ribla di Habincaran ni Ain lalu tu angka tor sabola Habincaran topi ni Laut Galilea,

¹² torus tu Selatan saginjang ni Batang aek Jordan lalu tu Laut Mate. Songon i ma gurat parbalohan na opat i di luatmu.”

¹³ Dung i didok si Musa ma tu bangso Israel, “On ma tano sijagitonmunu marhite undi, tano na niparentahon ni Tuhan i angkon bagi-bagion tu sambilan satonga marga ni Israel.

¹⁴ Marga Ruben dohot Gad dohot satonga sian Marga Manase madung dijagit halahi bagian ni halahi jana madung dibagi tano i tu marsasaompu.

¹⁵ Tano ni halahi, i ma di Habincaran ni Batang aek Jordan paipar-ipar dohot Jeriko.”

Angka pamimpin na disuru mambagi tano i

¹⁶ Didok Tuhan ma tu si Musa,

¹⁷ “Angkon Malim Eleasar do dohot si Josua anak ni si Nun na mambagi tano i di tonga-tongamunu.

¹⁸ Laing todo muse ma sahalak sian ganop marga na gabe pamimpin mangurupi si Eleasar dohot si Josua mambagi-bagihon tano i.”

^19-28 Angka on ma halak na dung dipili Tuhan: MARGA PAMIMPINNA Juda si Kaleb anak ni si Jefunne Simeon si Samuel anak ni si Amihud Benyamin si Eledad anak ni si Kislon Dan si Buki anak ni si Jogli Manase si Heniel anak ni si Efod Efraim si Kemuel anak ni si Siftan Zebulon si Elisafan anak ni si Parnak Isakar si Paltial anak ni si Asan Aser si Ahihud anak ni si Selomi Naftali si Padael anak ni si Amihud

MARGA PAMIMPINNA

²⁹ On ma na nisuru ni Tuhan laho mambagihon tano pusako di tano Kanaan di halak Israel.