BILANGAN 33 - BIBEL JAMITA NA DENGGAN

Pardalanan sian Mesir tu Moab

¹ Dung ditinggalkon halak Israel tano Mesir di bagasan barisan ni marga-margana be, na niuluhon ni si Musa dohot si Harun, maradian do halahi di angka inganan na nitontuhon.

² Diparentahon Tuhan ma tu si Musa anso disuratkon ia sude inganan paradianan ni halahi muda giot marbandar.

³ Ditinggalkon halak Israel tano Mesir di tanggal lima bolas bulan sada, sadari dung Pesta Paskah parjolo. Marhite pandonganion ni Tuhan i ditinggalkon halahi ma Ramses, disaksihon halak Mesir,

⁴ di hatiha mananom anak siangkaan ni halahi na dung dibunu Tuhan i. Marhite na songon i ma dipatidahon Tuhan i, na gumogo do Ia sian angka debata ni halak Mesir.

⁵ Dung ditinggalkon halak Israel Ramses, marbandar ma halahi di Sukot.

⁶ Dung i marbandar di Etam di topi ni parhorsihan.

⁷ Sian i mulak halahi tu Pi Hahirot, sabola Habincaran ni Baal Zefon, lalu marbandar donokkon ni Migdol.

⁸ Dung i ditinggalkon halahi ma Pi Hahirot torus manaripari Laut Rara dung i torus tu Parhorsihan Zur dung tolu ari di pardalanan, marbandar ma halahi di Mara.

⁹ Sian i torus halahi tu Elim lalu marbandar disi angke adong disi dua bolas mual dohot batang ni kurma pitu pulu kambona.

¹⁰ Dung i ditinggalkon halahi ma Elim marbandar ma halahi donokkon ni Solok Suez.

¹¹ Dung sian i marbandar halahi di Halongonan Sin.

¹² Sian i marbandar ma halahi di Dopka.

¹³ Sian Dopka, marbandar ma halahi di Alus.

¹⁴ Sian Alus, marbandar ma halahi di Rafidim, tapi nada adong inumon di inganan i.

¹⁵ Sian Rafidim, marbandar ma halahi di Halongonan Sinai.

¹⁶ Sian Halongonan Sinai marbandar ma halahi di Kibrot-Taawa (sanga “Kuburan Ni Nahisapan).”

¹⁷ Sian Kibrot-Taawa marbandar ma halahi di Haserot.

¹⁸ Sian Haserot marbandar ma halahi di Ritma.

¹⁹ Sian Ritma marbandar ma halahi di Rimon Peres.

²⁰ Sian Rimon Peres marbandar ma halahi di Libna.

²¹ Sian Libna marbandar ma halahi di Risa.

²² Sian Risa marbandar ma halahi di Kehelata.

²³ Sian Kehelata marbandar ma halahi di Dolok Siater.

²⁴ Sian Dolok Siater marbandar ma halahi di Harada.

²⁵ Sian Harada marbandar ma halahi di Makelot.

²⁶ Sian Makelot marbandar ma halahi di Tahat.

²⁷ Sian Tahat marbandar ma halahi di Tarah.

²⁸ Sian Tarah marbandar ma halahi di Mitka.

²⁹ Sian Mitka marbandar ma halahi di Hasmona.

³⁰ Sian Hasmona marbandar ma halahi di Moserot.

³¹ Sian Moserot marbandar ma halahi di Bene-Jaakan.

³² Sian Bene-Jaakan marbandar ma halahi di Hor Gidgad.

³³ Sian Hor Gidgad marbandar ma halahi di Jodbata.

³⁴ Sian Jodbata marbandar ma halahi di Abrona.

³⁵ Sian Abrona marbandar ma halahi di Esion-Geber.

³⁶ Sian Esion-Geber marbandar ma halahi di Halongonan Sin i ma Kades.

³⁷ Sian Kades marbandar ma halahi di Dolok Hor di parbalohan ni tano Edom.

³⁸ Mangihutkon parenta ni Tuhan i, Malim Harun manangkok tu Dolok Hor. Disi ma marujung ngolunia di tanggal sada bulan lima taon paopat puluhon dung ditinggalkon halak Israel tano Mesir.

³⁹ Di hamamate ni si Harun marumur ma ia saratus duapulu tolu taon.

⁴⁰ Hatiha i bolkas ma barita tu raja Arad sabola Selatan ni Kanaan bahaso halak Israel ro adop luatnia.

⁴¹ Mardalan ma halahi sian Dolok Hor, marbandar ma halahi di Zalmona.

⁴² Sian Zalmona marbandar ma halahi di Punon.

⁴³ Sian Punon marbandar ma halahi di Abot.

⁴⁴ Sian Abot marbandar ma halahi di Lobu ni Abarim di Luat Moab.

⁴⁵ Sian Abarim marbandar ma halahi Dibon Gad.

⁴⁶ Sian Dibon Gad marbandar ma halahi di Almon-Diblataim.

⁴⁷ Sian Almon-Diblataim, marbandar ma halahi di Dolok Abarim na di lambung Dolok Nebo.

⁴⁸ Sian Dolok Abarim, marbandar ma halahi di tano na hornop di Moab mardonokkon Batang aek Jordan paadop-adop tu kota Jeriko.

⁴⁹ Marbandar ma halahi di topi ni Batang aek Jordan di holang-holang ni Bet-Jesimot dohot Rura Akasia.

Angka parenta taran so manaripari Batang aek Jordan

⁵⁰ Di tano na hornop na di Moab donok tu Batang aek Jordan paadop-adop dohot kota Jeriko, dilehen Tuhan i ma parenta tu si Musa

⁵¹ i ma angka parenta tu bangso Israel, “Muda ditaripari hamu Batang aek Jordan laho masuk tu tano Kanaan,

⁵² angkon paorotonmunu sude halak na mangingani luat i. Roncohon hamu sude gana-ganaan ni halahi na sian batu dohot logam dohot angka inganan parsombaan ni halahi.

⁵³ Angkon rampason jana ingananmunu do tano i, angke madung Hulehen i di hamu.

⁵⁴ Dung i angkon bagi-bagionmunu do tano i tu ganop marga-marga ni Israel marhite na mambaen undi. Tu marga na gumodang lehen hamu tano na umbidang gabe pusako ni halahi, tu marga na ummenek tano pusako na so pola bidang.

⁵⁵ Muda so ra na mangingani luat i dipaorot hamu gabe i ma na manyusai hamu songon horsik di mata sanga songon duri di pat muse gabe porangan ni halahi ma hamu.

⁵⁶ Muda nada dipaorot hamu halahi gabe hamu ma pusaonKu songon na dung ditahi rohangKu hian laho mamusa halahi.”