BILANGAN 32 - BIBEL JAMITA NA DENGGAN

Angka marga-marga di Habincaran ni Batang aek Jordan

¹ Angka Marga Ruben dohot Gad, bahat situtu do pahan-pahananna. Dung diida halahi denggan ni tano Jaeser dohot tano Gilead panjampalan ni pahan-pahanan,

² kehe ma halahi manopot si Musa, si Eleasar dohot angka pamimpin na asing i di halak Israel, ninna halahi ma,

^3-4 “Tano di kota Atarot, Dibon, Jaeser, Nimra, Hesbon, Eleale, Sebam, Nebo dohot Beon, na dung diingani halak Israel marhite pangurupi ni Tuhan denggan situtu inganan i parpahan-pahanan, jana bahat sajo do pahan-pahanannami,

⁵ pangidoannami anso dilehen tano i di hami gabe teanonnami. Ulang be suru hami kehe taripar Batang aek Jordan.”

⁶ Dialusi si Musa, “Bia, giot tinggal hamu dison? Salangkan angka kahanggimu angkon kehe dope marporang.

⁷ Biasi songon i pulukmunu mambaen mabiar halak Israel manaripari Batang aek Jordan laho masuk tu tano na nilehen ni Tuhan i di halahi?

⁸ Madung dibaen angka amamunu na songon i, dompak na husuru halahi sian Kades-Barnea paresohon luat i.

⁹ Madung dibolus halahi lalu tu Rura Eskol jana madung diida halahi tano i. Tapi dung mulak halahi, dipabiar-biari halahi ma halak Israel, gabe mabiar masuk tu tano na nilehen ni Tuhan i di halahi.

^10-11 Gabe muruk ma Tuhan i di ari i pola didokkon Ia, ‘Na so ra do halak on mangoloi Au. Hara ni i Husumpahon ma: Sude halahi na marumur dua pulu taon sanga lobi di hatiha na haruar i halahi sian Mesir, nada adong na tola masuk tu tano na Hujanjihon tu si Abraham, si Ishak dohot si Jakob.’

¹² Sude halak on hona uhum, asing sian si Kaleb anak ni si Jefunne halak Kenas i, dohot si Josua anak ni si Nun, angke tongtong do dioloi halahi Tuhan i.

¹³ Muruk do Tuhan i tu halak Israel gabe dipadiar Ia halahi di halongonan i pola opat pulu taon honokna, lopus abis na sansundut na mangalo i marmatean.

¹⁴ Saonnari, giot songon amamunu i ma hamu. Hamu ma sundut na mardosa. Hara ni pambaenanmunu i gabe marsijongjong muruk ni Tuhan i tu halak Israel.

¹⁵ Hamu halak Ruben dohot halak Gad, muda aloonmunu Tuhan i saonnari, tinggalkonon ni Tuhan i ma bangso on di halongonan, patundamunu do ro hasusaan i.”

¹⁶ Dung i dipadonok halak Ruben dohot halak Gad i ma tu si Musa, ninna ma, “Paloas ma hami pajongjong jolo bara ni biri-birinami sian tembok batu dohot kota na marbenteng di dakdanaknami.

¹⁷ Dung songon i marhobas ma hami kehe marporang rap dohot angka kahangginami dongan sabagasnami. Hami pe mamimpin di parporangan i lopus bolkas halahi tu tano siteanon ni halahi be. Hatiha i tarbaen angka dakdanaknami ma tinggal dison di kota na marbenteng, sonang so targanggu halak luat on.

¹⁸ Nada mulak hami tu bagasnami so jolo sude halak Israel manean tano na dilehen di halahi.

¹⁹ Nada buatonnami di hami saotik pe sian tano na di bariba ni Batang aek Jordan, harana madung hami jagit bagiannami dison di Habincaran ni Batang aek Jordan on.”

²⁰ Dialusi si Musa ma, “Muda tutu do sian ias ni rohamunu na nidokmunu i, denggan ma dison hamu, hobas hian ma hamu laho marporang.

²¹ Sude hamu na tarbaen dohot marporang angkon manaripari Batang aek Jordan on, mardongan pangurupion ni Tuhan angkon porangonmunu, lopus ditaluhon Tuhan i angka musu i,

²² lalu mangarampas luat i. Dung i pe anso tola hamu mulak, angke madung dikarejohon hamu karejomunu di Tuhan i dohot di angka kahanggimu donganmu sabangso. Tuhan i pe, okuonNa do bahaso hamu nampuna tano na di Habincaran on.

²³ Tapi ingot hamu ma! Muda nada dipatulus hamu janjimunu i, mardosa ma hamu di Tuhan. Jadi ulang baen be na sala, anso ulang hona uhum hamu hara ni dosamunu.

²⁴ Antong kehe ma hamu, pauli hamu ma hutamu dohot bara ni biri-birimu hum on siingotonmunu, angkon patulusonmunu sude sanga aha na nijanjihonmunu.”

²⁵ Dung i didok halak Gad dohot halak Ruben ma, “Olo tuan, sude na nidokmu hami patulus.

²⁶ Anaknami dohot dongan sabagasnami dohot pahan-pahanan, lombu dohot biri-birinami tinggal ma dison, di angka kota na di Gilead.

²⁷ Tapi anggo hami, hobas do sude kehe marporang di bagasan pandonganion ni Tuhan. Angkon tariparannami do Batang aek Jordan laho marporang songon na nidokmi tu hami.”

²⁸ Dung i dilehen si Musa ma parenta tu si Eleasar, si Josua dohot angka pamimpin ni Israel,

²⁹ “Muda dioloi halak Gad dohot halak Ruben do parenta ni Tuhan, dohot do halahi manaripari Batang aek Jordan laho marporang jana muda marhite pangurupion ni halahi gabe tarrampas luat i, jadi lehen hamu ma tano Gilead na gabe siteanon ni halahi.

³⁰ Tapi muda so ditaripari halahi Batang aek Jordan laho marporang rap dohot hamu, gabe tano pusako na di tano Kanaan i noma bagian ni halahi dos dohot hamu.”

³¹ Dialusi halak Gad dohot halak Ruben ma, “Olo tuan sai na patulusonnami do parenta ni Tuhan i.

³² Mardongan Tuhan i, tariparannami ma Batang aek Jordan laho marporang anso tarpartahankon hami siteanonnami dison, di Habincaran ni Batang aek Jordan on.”

³³ Dung i dilehen si Musa ma tu angka Marga Gad dohot Ruben dohot tu satonga Marga Manase sude luat ni Raja Sihon, i ma raja ni halak Amori dohot luat ni Raja Og sian Basan dohot muse angka kota dohot humaliangna.

³⁴ Dipauli Marga Gad ma mangulahi kota Dibon, Atarot, Aroer,

³⁵ Atarot-Sofan, Jaeser, Jogbeha,

³⁶ Bet-Nimra dohot Bet-Haran.

³⁷ Dipauli Marga Ruben ma mangulahi kota: Hesbon, Eleale, Kiriataim,

³⁸ Nebo, Baal-Meon (digonti do goar ni kota on dohot Sebam). Angka kota na nipauli ni halahi mangulahi digonti halahi dohot goar na imbaru.

³⁹ Marga Makir anak ni si Manase, mamorangi tano Gilead lalu diingani halahi, jana dipaorot halahi do halak Amori na adong disi.

⁴⁰ Hara ni i dilehen si Musa ma tano Gilead tu Marga Makir, gabe disi ma halahi maringanan.

⁴¹ Si Jair sian Marga Manase marporang jana mangarampas sanga na piga-piga sosor gabe dibaen ia ma goarna “Angka huta Jair”.

⁴² Si Nobah mamorangi jana mangarampas Kenat rap dohot angka huta na disi gabe dibaen ia ma goarna Nobah, mangihutkon goarnia sandiri.