BILANGAN 27 - BIBEL JAMITA NA DENGGAN

Angka boru ni si Zelafehad

¹ Adong lima boru ni si Zelafehad, i ma si Mahla, si Noa, si Hogla, si Milka dohot si Tirsa. Amang ni si Zelafehad i ma si Hefer, amang ni si Hefer i ma si Gilead. Amang ni si Gilead i ma si Makir, amang ni si Makir i ma si Manase, jana amang ni si Manase i ma si Josep.

² Boru ni si Zelafehad na lima i kehe manopot si Musa dohot Malim Eleasar, dompak marlagut angka pamimpin dohot halak na bahat donok tu pintu Bandar Parmianan Ni Tuhan. Ninna halahi ma,

³ “Di na mate amangnami di halongonan, nada manadingkon anak halaklahi. Nada dohot ia dongan ni si Korah mangalo Tuhan i. Mate pe amangnami i hara ni dosania sandiri do.

⁴ Biasi gabe mago goarnia sian bangso Israel, hum hara ni na so adong pomparannia halaklahi? Pangidoannami, lehen ma tano pusako di hami dos dohot kahanggi ni amangnami i.”

⁵ Dung i dipabolkas si Musa ma pangalaho i tu Tuhan,

⁶ gabe didok Tuhan ma tu si Musa,

⁷ “Na nipangido ni boru ni si Zelafehad i, patut do i. Jadi lehen ma di halahi tano pusako dos dohot kahanggi ni amang ni halahi. Teanan ni si Zelafehad i gabe teanon ni borunia.

⁸ Dokkon ma tu halak Israel, muda adong sada halaklahi na mate so maninggalkon anak halaklahi, jadi hamoraonnia i dilehen teanon ni anak dadaboru.

⁹ Muda so adong borunia dilehen ma hamoraonnia tu kahanggina.

¹⁰ Muda so adong kahangginia dilehen ma hamoraonnia tu kahanggi ni amangna.

¹¹ Muda so adong kahanggi ni amangnia sanga udania, dilehen ma artania tu sisolkot na dumonok. Na dung nitontuhon on angkon dalankonon ni halak Israel songon paraturan ni tona. Au do Tuhan na mamarentahon tu ho.”

Si Josua dipili manggonti si Musa

¹² Didok Tuhan ma tu si Musa, “Manangkok ma ho tu Dolok Abarim, sian i ma tatap luat na giot lehenonKi di halak Israel.

¹³ Dung ditatap ho ale Musa, mate ma ho songon angkangmu si Harun,

¹⁴ angke di Halongonan Zin dialo hamu na dua do parentangKu. Hatiha di Meriba sude rayat i marungut-ungut tu Au, nada ra hamu patorangkon tu halahi bahaso hum Au do na Markuaso.” (Meriba i ma haroroan ni aek di Kades na di Halongonan Zin.)

¹⁵ Martangiang ma si Musa,

¹⁶ “O Tuhan Debata na mangalehen hangoluan tu sude na mangolu, hupangido, patidahon ma sada halak na tarbaen manguluhon bangso on.

¹⁷ Sada halak na tarbaen gabe panglima muda masa porang. Ulang ma padiar bangsomon songon habanan ni biri-biri na so marparmahan.”

¹⁸ Didok Tuhan ma tu si Musa, “Pio ma si Josua, anak ni si Nun. Halak na pistar do i. Ampehon ma tanganmu tu ginjang ulunia.

¹⁹ Suru ma ia jongjong di jolo ni Malim Eleasar, dohot sude bangso i. Di jolo ni halahi sude paboa na si Josua ma na gabe gontimu.

²⁰ Lehen ma tusia sabagian sian kuasomi, anso sude halak Israel mangoloi tusia.

²¹ Angkon marsapa do si Josua tu si Eleasar jana sapaan ni si Eleasar ma hagiotKu marhite na mamake Urim. Marhite na songon i ma si Eleasar mamimpin si Josua dohot sude bangso Israel di sude parkaro na ro tu halahi.”

²² Dung i dipatulus si Musa ma sude na niparentahon ni Tuhan i tusia. Disuru ia ma si Josua dohot jolma na bahat i jongjong di jolo ni si Eleasar.

²³ Songon na dung diparentahon Tuhan, diampehon si Musa ma tangannia tu ginjang ulu ni si Josua jana dipaboa ia bahaso si Josua ma na gabe gontinia.