BILANGAN 22 - BIBEL JAMITA NA DENGGAN

Disuru Raja Moab mamio si Bileam

¹ Dung i ditoruskon halak Israel ma mardalan lalu marbandar ma halahi di padang na di Moab, di Habincaran ni Batang aek Jordan di bariba ni Jeriko.

² Dung i dibege raja ni Moab na margoar si Balak, anak ni si Zipor, sanga songon dia pambaen ni halak Israel tu halak Amori, jana sadia bahat ni halak Israel i.

³ Mabiar ma ia dohot sude rayat ni Moab maradopkon halak Israel, dibaen bahat do halahi.

⁴ Dung i ninna halak Moab ma tu pamimpin ni halak Midian, “Santongkin nari sego ma sude na adong humaliang hita baenon ni bangso i, songon lombu na manjampal ruput di padang.” Gabe ditongos Raja Balak

⁵ ma suruanna laho mamio si Bileam anak ni si Beor na maringanan di kota Petor donokkon ni Batang aek Efrat di Luat Amau. Dipalalu angka suruan i ma tu si Bileam tona sian si Balak songon on, “Anso diboto ho, adong sada bangso na ro sian Mesir, sarsar do halahi sun tu dia, gabe parmaraan do on di luatnami.

⁶ Umbahat do halahi sian hami. Hara ni i, ro ma ho! Burai ma halahi, anso taralo hami halahi laho mangusir halahi sian luatnami on. Pos do rohangku, dapotan pasupasu do na nipasupasumu, jana hona bura do na niburaanmu.”

⁷ Jadi kehe ma pamimpin ni halak Moab dohot halak Midian i, maroban upa di si Bileam, anso diburai ia halak Israel. Kehe ma halahi manopot si Bileam pabolkaskon tona ni Raja Balak

⁸ didok si Bileam ma tu halahi, “Marborngin ma hamu dison. Ancogot hupaboa pe tu hamu, sanga aha didok Tuhan tu au.” Jadi marborngin ma pamimpin ni halak Moab i di inganan ni si Bileam.

⁹ Dung i ro ma Debata manyapai si Bileam, ninna ma, “Ise do halak na ro tu ingananmi, Bileam?”

¹⁰ Dialusi si Bileam, “Suruan ni Raja Balak na sian Moab do i, pabolkaskon barita,

¹¹ bahaso adong sada bangso na ro sian Mesir manyarsar di luat ni halahi. Dipangido Raja Balak anso huburai bangso i, anso diporangi jana diusir ia halahi.”

¹² Didok Debata ma tu si Bileam, “Ulang kehe ho dohot halahi, dung i ulang burai halak Israel, angke madung Hupasupasu halahi.”

¹³ Ancogotna i didapotkon si Bileam ma suruan ni si Balak i, lalu didok ia, “Mulak ma hamu, nada diloas Tuhan i kehe au rap dohot hamu.”

¹⁴ Jadi mulak ma halahi manopot si Balak jana dipaboa halahi tusia, bahaso na so ra si Bileam ro rap dohot halahi.

¹⁵ Dung i disuru si Balak ma mangulahi suruanna umbahat jana gumincat pangkatna sian na parjolo i.

¹⁶ Kehe ma halahi manopot si Bileam maroban tona ni si Balak. “Hupangido sagodang-godangna anso ulang tulak pangidoanku, anso ro ho tu au.

¹⁷ Bahat pe hugarari tu ho laho patuluskon aha sajo na hudok. Ro ma ho jolo manolong ahu, burai ma bangso i.”

¹⁸ Tapi dialusi si Bileam ma, “Haru sude perak dohot sere na adong di bagas godang ni si Balak dilehen di au, nada ra au mangalo parenta ni Tuhan Debata na husomba i. Marhite pangalaho na menek pe nada puluk au mangalo.

¹⁹ Tapi marborngin ma hamu dison, songon na binaen ni angka suruan na parjolo i. Giot botoonku betak adong na asing na giot dohonon ni Tuhan tu au.”

²⁰ Borngin i ro ma Debata mangkatai dohot si Bileam, ninna ma, “Ro halak on mangido anso rap kehe hamu ancogot, antong marhobas ma ho anso kehe. Tapi hum na Hudok i do na patut karejohononmu.”

²¹ Ancogotna i dipasang si Bileam ma palano ni halodenia, lalu kehe ma ia rap dohot pamimpin ni halak Moab i.

Si Bileam dohot halodenia

²² Di na kehe i si Bileam, muruk ma Debata. Dompak dijuguhi si Bileam halodenia diiring dua halak naposonia, jongjong ma Surusuruan Ni Tuhan di tonga dalan i mangolat-olatsa.

²³ Dung diida halode i surusuruan i jongjong manyintak podang, manyirpang ma halode i sian dalan, manyimbil tu ladang i, jana disambok si Bileam ma halode i anso mulak tu dalanna.

²⁴ Dung i jongjong muse ma Surusuruan Ni Tuhan i di dalan na sompit di antara ni dua kobun anggur na martembok batu paipar-ipar.

²⁵ Dung diida halode i Surusuruan i, manopi ma ia pola tarhapit pat ni si Bileam tu tembok batu i. Gabe dipukul si Bileam mangulahi halode i.

²⁶ Mardalan ma muse Surusuruan Ni Tuhan i jongjong di dalan na sompit situtu, jabat nada tarbolus be tu siambirang sanga tu siamun.

²⁷ Anggo dison, dung diida halode i Surusuruan Ni Tuhan i dipapayak halode i ma pamatangna. Gabe muruk situtu ma si Bileam jabat tungkotnia dibaen ia panyambok ni halode i.

²⁸ Dilehen Tuhan i ma hamaloon mangkatai tu halode i. Mangkuling ma halode i tu si Bileam, “Aha ma he salangku tu Tuanku, pola jabat tolu noli au disambok Tuanku?”

²⁹ Dialusi si Bileam ma, “Dibaen dipaoto-oto ho au! Sugari adong podang di au angkon mate ho hubunu!”

³⁰ Dialusi halode i ma, “Nada he na dung honok do au halode ni Tuanku na somal juguhan ni Tuanku, jungada dehe hualo Tuanku?” “Nada,” ning si Bileam mangalusi.

³¹ Dung i dipatidahon Tuhan ma tu si Bileam Surusuruan na manyintak podang jongjong disi. Gabe tungkap ma si Bileam tu tano manyomba.

³² Disapai Surusuruan Ni Tuhan i ma, “Biasi dipukul ho halodemu pola tolu noli? Madung ro Au laho mangolat ho, angke na so tola hian do ho kehe.

³³ Tuani ma diida halodemi Au gabe manyimbil ia pola tolu noli. Sugari nada, songon i, mate ma ho Hubunu tapi anggo halodemi malua.”

³⁴ Didok si Bileam ma, “Madung mardosa au. Nada huboto na jongjong do Ho di tonga dalan laho mangambat au. Jadi saonnari pe, muda sala do hutoruskon pardalananku mangihutkon pandapotMu, mulak pe au.”

³⁵ Didok Surusuruan Ni Tuhan i ma, “Ihutkon sajo ma angka jolma i. Tapi hum na Husuru do tola dohononmu.” Dung i ditoruskon si Bileam ma dalanna rap dohot suruan ni si Balak i.

Raja Balak mangalo-alo si Bileam

³⁶ Dung dibege si Balak na ro si Bileam, kehe ma ia mangalo-alo si Bileam tu kota ni halak Moab, sada kota di topi ni Batang aek Arnon di parbalohan ni Luat Moab.

³⁷ Ninna si Balak ma tusia, “Biasi nada ro ho di na hupio parjolo i? Ninna rohamu nada sanggup au mangalehen upamu?”

³⁸ Dialusi si Bileam ma, “Nada he madung ro au, atehe? Tapi nada adong kuaso di au mandok barang aha asing sian na nisuru ni Tuhan dohononku.”

³⁹ Dung i kehe ma si Bileam dohot si Balak tu kota Husot.

⁴⁰ Disambol si Balak ma disi lombu dohot biri-biri. Deba sian juhut i dilehen ia di si Bileam dohot di angka pamimpin na rap dohot ia.

Panurirangon parjolo ni si Bileam

⁴¹ Ancogotna i dioban si Balak ma si Bileam manangkok tu tor Bamot Baal. Sian inganan i diida si Bileam ma deba halak Israel.