BILANGAN 20 - BIBEL JAMITA NA DENGGAN

Angka na masa di Kades

¹ Di bulan parjolo bolkas ma halak Israel sudena tu Halongonan Zin jana marbandar ma halahi di Kades. Marujung ma ngolu ni si Miryam jana dikuburkon disi.

² Di inganan parbandaran ni halahi i, nada adong aek, dung i dirongomi halak na bahat i ma si Musa dohot si Harun

³ lalu marungut-ungut, “Dengganna i antong sugari mate hami di jolo ni Bandar Parmianan Ni Tuhan, rap dohot dongannami sabangso.

⁴ Biasi obanonmu hami tu parhorsihan on? Adong he, anso mate dison hami rap dohot pahan-pahanannami i?

⁵ Aha dehe gunana dioban ho hami sian Mesir tu inganan parkancitan tu tano na so tarsuan bagi aha on? So adong gandum dison, so adong hayu ara, so adong anggur dohot dalimo pe so adong.”

⁶ Kehe ma si Musa dohot si Harun mandao sian halahi asa jongjong ma halahi donok tu pintu Parmianan Ni Tuhan. Marsomba ma halahi disi, gabe disondangi sinondang ni Tuhan i ma halahi.

⁷ Didokkon Tuhan ma tu si Musa,

⁸ “Buat ma tungkot na di Poti Parjanjian i, dung i rap ma ho dohot si Harun palagutkon sude bangso i. Mangkatai ma ho di jolo ni halahi sude tu batu na godang na disi, dung i gabe mamancur ma aek haruar sian batu i. Marhite i gabe tarparuar ho aek sian batu na godang i anso minum sude halahi dohot pahan-pahanan ni halahi.”

⁹ Dung i kehe ma si Musa mambuat tungkot i songon na nidok ni Tuhan i.

¹⁰ Dung i rap ma ia dohot si Harun palagutkon sude jolma i donok tu batu na godang i. Dung i didok si Musa ma, “Tangihon hamu ma angka na jogal roha. Angkon paroonnami aek sian batu na godang on di hamu.”

¹¹ Dung i dilipatkon si Musa ma tungkot i tu batu na godang i pola dua noli. Manigor kaluar ma aek na doras sian batu i gabe minum halahi sude dohot pahan-pahanan ni halahi.

¹² Dung i mangkuling ma Tuhan tu si Musa dohot tu si Harun, ninna ma, “Hara ni naso porsaya hamu di hatangKu jana ganggu hamu patidahon kuasongKu na badia i di jolo ni halak Israel, gabe nada hamu be maroban halahi tu tano na Hujanjihon tu halahi.”

¹³ Masa do i di Meriba. Di inganan i ma halak Israel marungut-ungut tu Tuhan, jana disi muse ma dipatidahon Tuhan habadiaanNia tu bangso i.

Nada diloas raja ni halak Edom halak Israel mamolus

¹⁴ Disuru si Musa ma angka suruanna sian Kades manopot raja ni Edom. Ninna halahi ma, “On ma barita na hami oban sian halak Israel kahanggi ni raja i. Diboto raja i do angka hasusaan na hami taon.

¹⁵ Na kehe do ompunami tu tano Mesir jana maringanan disi martaon-taon honokna. Nada denggan pambaenan ni halak Mesir i tu ompunami dohot tu hami pe,

¹⁶ gabe pio-pio hami tu Tuhan mangido pangurupion. Ditangihon Tuhan do pangidoannami gabe disuru Ia sahalak surusuruan. Surusuruan i do maroban hami haruar sian tano Mesir. Saonnari maradian di Kades do hami, i ma sada kota di parbandaran ni tano ni raja i.

¹⁷ Pangidoannami anso diloas raja i hami mamolus sian luat on. Nada pola manyirpang hami dohot pahan-pahanannami sian dalan sanga masuk tu ladang sanga kobun anggur ni raja i. Nada pola inumonnami aek sian sumur ni raja i. Dalan godang i pe hami bolus tongtong lopus haruar hami sian tano ni raja i.”

¹⁸ Tapi dialusi angka halak Edom i ma, “Nada hami paloas bolusonmunu tanonami. Muda laing dibolus hamu, ro ma hami mamorangi hamu.”

¹⁹ Didok halak Israel i ma, “Sian dalan na godang i pe hami tongtong, muda adong sian hami sanga pahan-pahanannami minum aekmunu i hami garari pe. Hum mamolus sajo pe hami.”

²⁰ Didok halak Edom i muse, “Nada tola!” Lalu kehe halahi dohot angka tentara na gogo laho mamorangi bangso Israel.

²¹ Dibaen nada diloas halak Edom boluson ni halak Israel tano ni halahi, halak Israel i pe marulak kehe ma manjalahi dalan na asing.

Mate si Harun

²² Kehe ma sude halak Israel, ditinggalkon halahi ma Kades, jana bolkas ma halahi tu Dolok Hor,

²³ na di parbalohan ni Edom. Didok Tuhan ma disi tu si Musa dohot tu si Harun,

²⁴ “Nada dohot be si Harun masuk tu tano na dung Hujanjihon tu halak Israel, angkon mate noma ia, dibaen dialo hamu na dua parentangKu di Meriba.

²⁵ Oban ma si Harun dohot si Eleasar anaknia i tu Dolok Hor.

²⁶ Buka ma disi pakean malim ni si Harun jana papakehon ma tu si Eleasar. Di inganan i do marujung ngolu ni si Harun.”

²⁷ Dipatulus si Musa do sude na nidok ni Tuhan i. Manangkok ma si Musa, si Harun dohot si Eleasar tu Dolok Hor, diida sude halak na bahat i.

²⁸ Dibuka si Musa ma pakean dinas ni si Harun, jana dipamasuk ia tu si Eleasar. Disi ma di puncut ni dolok i mate si Harun, dung i mulak ma si Musa dohot si Eleasar.

²⁹ Dibege sude halak na bahat ma na dung mate si Harun, gabe ditangisi halahi ma ia, tolu pulu ari honokna.