BILANGAN 16 - BIBEL JAMITA NA DENGGAN

Hagaoron na binaen ni si Korah, si Datan dohot si Abiram

^1-2 Si Korah anak ni si Jisar sian horong ni si Kehat sian Marga Levi, na barani giot mangalo tu si Musa. Adong tolu halak sian Marga Ruben mangurupi ia, i ma si Datan dohot si Abiram, anak ni si Eliab dohot si On anak ni si Palat – dohot 250 halak na asing dope, i ma angka pamimpin na tarbarita na nipili ni rayat i.

³ Rap kehe ma halahi mandapotkon si Musa dohot si Harun lalu didok halahi, “Musa, tangihon jolo: Ganop jolma di bangso Israel na dung hapunjungan ni Tuhan do i. Jana di tonga-tonga ni hita sude do Tuhan i. Hape biasi dietong ho gumincat ho sian sude halak ni Tuhan i? Sude na binaenmu madung manyalpui aturan.”

⁴ Hum dibege si Musa songon i tungkap ma ia tu tano martangiang tu Tuhan.

⁵ Dung i didok ia ma tu si Korah dohot donganna i, “Ancogot manyogot i patidahonon ni Tuhan ma tu hita sanga ise sian hita na dung mardohonan di Tuhan. Halak na dung mardohonan di Tuhan i, patuduhonon ni Tuhan sandiri do i mandongani Tuhan i di langgatan i.

^6-7 Ancogot manyogot i, ho dohot donganmu angkon mambuat inganan ni api, dung i baen ma banggar dohot hamonyan tu bagasan dung i oban ma tu langgatan. Dung i taida ma disi sanga ise do sian hita na nipili ni Tuhan. Hamu halak Levi i do na dung manyalpui aturan!”

⁸ Ninna si Musa ma muse tu si Korah, “Tangihon, ale hamu halak Levi!

⁹ Ninna rohamunu pangalaho na menek dehe na dung dipili Debata ni Israel hamu sian halak Israel na asing i, anso tarbaen hamu donok tuSia laho markarejo di Bandar ParmiananNia, jana markarejo di halak Israel laho mangoloi halahi?

¹⁰ Ho Korah dohot halak Levi madung dapotan sangap sian Tuhan, hape saonnari mangalului anso hamu gabe malim.

¹¹ Muda marungut-ungut ho Korah dohot angka donganmi laho mangalo si Harun, Tuhan do na nialomunu!”

¹² Dung i disuru pio si Musa muse ma si Datan dohot si Abiram, anak ni si Eliab, tapi ninna halahi do, “Nada ra hami ro!

¹³ Madung tuk ho maroban hami haruar sian Mesir na napu i laho mamunu hami di parhorsihan on. Saonnari ho muse dope markuaso tu hami?

¹⁴ Madung tangkas, nada na giot obanonmu hami tu tano na napu, sanga pe mangalehen di hami angka ladang dohot kobun anggur gabe nampunanami, hape saonnari ditipu ho hami, nada ra hami ro!”

¹⁵ Muruk sajo ma si Musa gabe ning ia ma tu Tuhan, “Tuhan, ulang jagit angka silehen-lehen na nihaulkon ni halak on. Nada jungada hurugii sada halak pe sian halahi, sanga halode pe nada jungada hubuat sian halahi.”

¹⁶ Didok si Musa ma tu si Korah, “Ro ma ho ancogot tu Bandar Parmianan Ni Tuhan rap dohot donganmu i. Si Harun pe disi do ia.

¹⁷ Oban hamu be ma inganan ni apimunu jana baen hamu hamonyan di bagasan, dung i pasahat hamu ma i di ginjang ni langgatan.”

¹⁸ Jadi ganop halahi marsioban inganan ni apina be lalu mambaen lima kibung banggar ni api dohot hamonyan tu bagasan, dung i jongjong di pintu ni Bandar Parmianan rap dohot si Musa dohot si Harun.

¹⁹ Dung i dipalagut si Korah ma sude na bahat i, dung i jongjong ma halahi paadop-adop dohot si Musa dohot si Harun di pintu ni Bandar Parmianan Ni Tuhan. Tompu ma tarida di sude na bahat i sinondang haroro ni Tuhan Debata manyirlak-nyirlak mambaen silo.

²⁰ Dung i didok Tuhan i ma tu si Musa dohot si Harun.

²¹ “Sumurut ma hamu sian halahi, anso Hubunu halahi saonnari.”

²² Tapi dipaunduk si Musa dohot si Harun ma manyomba lalu didok halahi, “Ale Debata, Ho do na mangalehen hangoluan tu sude na mangolu. Muda mardosa sahalak, sude dehe halak na bahat on muruhanMu?”

²³ Didok Tuhan i ma tu si Musa,

²⁴ “Suru ma halahi dumao sian bandar ni si Korah, si Datan dohot si Abiram.”

²⁵ Dung i kehe ma si Musa dohot angka pamimpin ni Israel i tu inganan ni si Datan dohot si Abiram.

²⁶ Didok si Musa ma tu halak Israel, “Mandao ma hamu sian bandar ni halak na jahat on jana ulang dais hamu sanga tu aha pe arta ni halahi. Muda nada dioloi hamu pusaon ma hamu rap dohot halahi hara ni dosa ni halahi.”

²⁷ Dung i kehe ma halak na bahat i dao sian bandar ni si Korah, si Datan dohot si Abiram, hatiha jongjong halahi di pintu ni bandar ni halahi be rap dohot anak ni halahi dohot dadaboru ni halahi.

²⁸ Didok si Musa ma tu bangso i, “Songon on ma pangalahona anso diboto hamu, Tuhan i do marsuru au laho patuluskon sudena i nada hara ni giotku sajo.

²⁹ Muda songon hasomalan do parmate ni halak on, nada uhum sian Debata, jadi nada na nisuru ni Tuhan au.

³⁰ Tapi muda dibaen Tuhan i na so jungada dibege hamu taran so on, jana muda mabola tano i mamondut halahi rap dohot sude na adong di halahi lopus tehe ngolu-ngolu halahi tu inganan ni halak na mate, botoonmunu ma na mangalo Tuhan do halak on.”

³¹ Hum salpu si Musa mangkatai, mabola jana ngangang ma tano na di toru ni si Datan dohot si Abiram,

³² lalu mamondut halahi rap dohot keluarga ni halahi dohot sude na mangihutkon si Korah dohot arta ni halahi.

³³ Dung i masuk ma halahi mangolu-olu di inganan ni halak na mate dohot sude arta ni halahi. Tano i pe martutup mangulahi di ginjang ni halahi, mago ma halahi.

³⁴ Sude halak Israel na marnida i mangaluahon dirina umbege angguk ni halahi. Didok halak Israel i ma, “Maporus ma hita, ulang-ulang dibondut tano i muse hita.”

³⁵ Diparo Tuhan i muse ma api na marjembur laho manutung na 250 halak na manutung hamonyan i.

Inganan ni api

³⁶ Dung i didok Tuhan ma tu si Musa,

³⁷ “Suru ma si Eleasar anak ni si Harun i, pasisihon inganan ni api tumbaga i sian jolma na mosok na tinggal i dope. Saburkon ma arang sian inganan ni api di inganan na asing, angke na badia do inganan ni api i.

³⁸ Madung badia barang-barang i hatiha na nipasahat di ginjang langgatan ni Tuhan. Dung i buat ma inganan ni api ni halak na hona uhum hara ni dosa ni halahi i. Angkon topaon barang-barang i gabe nipis-nipis, jana baen ma sian na dung nipis i gabe tutup ni langgatan. Gabe parningotan ma i di bangso Israel.”

³⁹ Dung i dibuat si Eleasar ma angka inganan ni api i jadi dipatopahon ia gabe nipis-nipis giot mambaen tutup ni langgatan.

⁴⁰ Gabe parningotan di bangso Israel, bahaso asing sian pomparan ni si Harun, sahalak pe nada tola ro tu langgatan laho manutung hamonyan di Tuhan i. Halak na mangalanggar aturan on angkon dibunu songon si Korah dohot donganna. Jadi sudena i dipatulus do i songon na dung diparentahon Tuhan tu si Eleasar marhite si Musa.

Dipalua si Harun bangso Israel

⁴¹ Ancogotna i, marungut-ungut ma sude halahi tu si Musa dohot tu si Harun. Ninna halahi ma, “Madung dibunu hamu deba sian halak ni Tuhan i.”

⁴² Dung rap dialo halahi si Musa dohot si Harun, manaili ma halahi tu Bandar Parmianan Ni Tuhan. Diida halahi ma ombun manutup Bandar Parmianan jana tarida ma sinondang haroro ni Tuhan manyirlak-nyirlak pola gabe silo.

⁴³ Kehe ma si Musa dohot si Harun tu jolo ni Bandar Parmianan,

⁴⁴ dung i didok Tuhan ma tu si Musa,

⁴⁵ “Sumurut ma hamu sian halahi giot bunuonKu halahi di inganan i!” Unduk ma halahi na dua manyomba,

⁴⁶ didok si Musa ma tu si Harun, “Buat ma inganan ni apimi, pamasuk tusi lima kamata banggar na gara sian langgatan jana baen saotik hamonyan tu banggar i. Sigop ma oban tu halak na bahat i jana baen upacara hasesaan ni dosa di halahi. Sigop ma! Madung mardalan muruk ni Tuhan, madung mamungka ro nyae na mangalangkoti.”

⁴⁷ Dibaen si Harun ma sude na nidok ni si Musa i. Dibuat ia inganan ni apinia lalu marlojong ia tu tonga-tonga ni halak na bahat na topet marlagut disi. Dung diida ia na dung mamungka bala i, dibaen ia ma hamonyan tu banggar ni api i, lalu dibaen ia upacara hasesaan ni dosa ni na bahat i.

⁴⁸ Maradian ma bala i, dung haidaan si Harun jongjong ditonga-tonga ni halak na mangolu dohot halak na dung mate.

⁴⁹ Na mate di hatiha i 14.700 halak. So padohot na mate hara ni si Korah na mangalo i.

⁵⁰ Dung maradian bala i, mulak ma si Harun mandapotkon si Musa di pintu ni Bandar Parmianan Ni Tuhan.