BILANGAN 12 - BIBEL JAMITA NA DENGGAN

Hona uhum si Miryam dibaen Tuhan

¹ Dung i dibuat si Musa ma sada dadaboru halak Kus gabe dadaborunia, gabe digorahon si Miryam dohot si Harun ma i.

² Ninna halahi ma, “Hum markite-hite si Musa noma he mangkobari Tuhan i? Markite-hite hita pe nada he mangkobari Ia?” Dibege Tuhan do hata ni halahi i. (

³ Sada halak na toruk roha do si Musa, tumoruk do rohania sian sude jolma na adong di ginjang tano on.)

⁴ Dung i tompu ma didok Tuhan tu si Musa, si Harun dohot si Miryam, “Au mandok anso ro hamu na tolu tu Bandar ParmiananKu.” Halahi pe kehe ma tusi,

⁵ dung i mijur ma Tuhan di bagasan sada ombun na ginjang songon tiang. Jongjong ma Tuhan i di pintu ni Bandar Parmianan pio-pio, “Harun! Miryam!” Manigor mangalangka ma halahi na dua tu jolo,

⁶ didok Tuhan i ma, “Tangihon hamu ma sanga aha na giot dohononKu! Muda adong angka panurirang di tonga-tongamunu, giot Hupatidahon diringKu tu halahi di bagasan parnidaan, jana mangkatai Au dohot halahi markite-hite nipi.

⁷ Tapi nada songon i muda mangkatai Au dohot si Musa pangoloingKi. Madung Hupasahat tusia karejo mamimpin bangsongKu Israel.

⁸ Jadi mangkatai Au dohot ia paadop-adop bohi be, tangkas nada markuling-kulingan. Salang tompangKu pe madung diida ia! Biasi puluk dope hamu mangalo ia?”

⁹ Dung i dimuruhi Tuhan ma halahi na dua, jana dung kehe Tuhan i,

¹⁰ ditinggalkon ombun i ma Bandar Parmianan Ni Tuhan, gabe tompu ma hona nyae kusta na jorbut si Miryam. Bontar huling-kulingnia songon hapas. Hatiha manaili si Harun tu si Miryam diida ia ma na dung hona kusta si Miryam.

¹¹ Didok ia ma tu si Musa, “Urupi hami tuan, ulang paloas hami diparkanciti hara ni dosa na hami baen di bagasan haotoonnami.

¹² Ulang padiar ia gabe songon dakdanak na sorang dung jolo mate, na marjuhut na manggum.”

¹³ Dung i dipangido si Musa ma tu Tuhan i, “Ale Debata, pamalum ma ia.”

¹⁴ Dialusi Tuhan i ma, “Sugari ma ditijuri amangnia bohinia, manaon layas ma ia di bagasan pitu ari. Antong padao ma ia sian parbandaran i pitu ari honokna, dung i pe anso tola ia masuk mangulahi.”

¹⁵ Dung i diparuar halahi ma si Miryam sian parbandaran i pitu ari honokna, salolot so dioban halahi mulak ibana, nada morot bangso i sian i.

¹⁶ Dung i ditinggalkon halahi ma Haserot, marbandar ma halahi di Parhorsihan Paran.