ANDUNG 5 - BIBEL JAMITA NA DENGGAN

Tangiang mangido ibo ni roha

¹ Ingot ma, ale Tuhan, sude na tarjadi tu hami. Tatap ma hami jana ligi ma habileannami.

² Madabu tu tangan ni halak sileban do tean-teanannami, diingani halak na asing angka bagasnami.

³ Madung gabe tinggal menek hami, na so marama; inanami pe madung songon angka ina na mambalu.

⁴ Aek inumon dohot soban angkon dohot noma tobusan.

⁵ Songon dorbia, dipaksa hami karejo na borat, loja hami, hape nada tola maradian.

⁶ Kehe hami tu Mesir laho mangido sipanganon, tu Asur pe kehe hami anso ulang tangkuraparon.

⁷ Mardosa ompunami, saonnari nada adong be halahi; jana hami on ma angkon manaonsa, angka dosa na nibaenna.

⁸ Diparenta angka hatoban noma hami nada adong na margogo palua hami sian halahi.

⁹ Marmara do hami manjalahi sipanganon; harana dihaliangi pamunu do luatnami.

¹⁰ Marun pamatangnami hara ni na malean, milas huling-hulingnami songon na di parapian.

¹¹ Angka ina-ina di Sion diparroha-roha, angka bujing-bujing dipaksa marmainan di angka huta ni Juda.

¹² Ditangkupi angka pamimpinami jana digantungi, jana simatobangnami dipalayas halahi.

¹³ Doli-dolinami dipaksa karejo di kilangan, angka dakdanak halaklahi didondoni hayu boban lopus tarhatos.

¹⁴ Nada be marlagut angka na tobang-tobang di horbangan ni kota, musik pe nada tarbege be di tonga-tonga ni na poso.

¹⁵ Ma pola mago hatuaannami; muba do tortor gabe siluluton di hami.

¹⁶ Madung madabu tuku sian ulunami, ma pola mago hami hara ni na mardosa.

¹⁷ Hara ni i gabe magopu rohanami jana hara ni i ma gabe rambon parniidaannami.

¹⁸ Madung sego jana lungun Dolok Sion; sorigala disi mardalan-dalan.

¹⁹ Tapi anggo Ho, ale Tuhan, marhabangsa do Ho salolot ni lolotna; nada na ra marujung kuasoMu sian sundut tu sundut.

²⁰ Malolottu do antong ditadingkon Ho hami! LupahononMu sapanjangna noma ulaning hami?

²¹ Ale Tuhan, oban ma hami mulak tu Ho; giot mulak do hami tu Ho! Pasuang ma hami songon di hatiha najolo.

²² Adong he na dung diambungkon Ho do hami songon i? Na so marbolat dehe murukMu tu hami?