2 SAMUEL 9 - BIBEL JAMITA NA DENGGAN

Si Daud dohot si Mefiboset

¹ Sanoli marsapa ma si Daud, “Adong dope ulaning jolma na mangolu sian bagas ni si Saul? Sugari adong dope, por do rohangku nian mambaen na denggan tu halahi hara ni si Jonatan.”

² Adong do parkobas di bagas ni si Saul na margoar si Ziba, jana disuru ma ro mangadop tu si Daud. Disapai raja i ma, “Ho do tehe si Ziba?” “Olo rajanami,” ning ia mangalusi.

³ Dung i disapai raja i ma, “Adong dope he jolma na mangolu sian bagas ni si Saul? Por rohangku mambaen na denggan tu halahi nian, songon na dung hujanjihon tu Debata.” Dialusi si Ziba ma, “Adong dope sahalak nari anak ni si Jonatan. Na matimpang do i.”

⁴ “Di dia bayo i?” ning raja i manyapai. “Di Lodebar do, di bagas ni si Makir anak ni si Amiel,” ning si Ziba mangalusi.

⁵ Jadi disuru Raja Daud ma mamiohon anak ni si Jonatan i.

⁶ Si Mefiboset do goar ni anak ni si Jonatan i. Di na ro ia, manungkap ma ia pasangap si Daud. Dipangkulingkon si Daud ma ia mandok, “Mefiboset,” jana dialusi ia ma, “Olo rajanami.”

⁷ Didok si Daud ma, “Ulang mabiar ho. Haburjuon do na giot baenonku tu ho marningot si Jonatan, amangmi. Hupaulak ma tu ho sude tano ni ompungmu si Saul, jana mangan di bagas godang noma ho torus.”

⁸ Manungkap si Mefiboset mangulahi mandok, “Aha ma nian argangku, suman songon anjing na mate do au, rajanami! Biasi pola songon i denggan ni raja i tu au?”

⁹ Dung i dipio raja i ma si Ziba parkobas ni si Saul i jana didok ia ma, “Sandok na nitinggalkon ni si Saul dohot dongan sabagasnia, hulehen ma i di pahompu ni tuanmon.

¹⁰ Angkon karejohononmu dohot angka dakdanakmu do tano i baen di pangisi ni bagas ni si Saul tuanmi jana lehen ma pandapotan ni tanona i tu halahi laho manggohi haporluan ni balanjona. Tapi anggo si Mefiboset tongtong noma mangan di bagas godang.” (Adong do lima bolas halak anak ni si Ziba dohot dua pulu halak naposonia.)

¹¹ Dialusi si Ziba ma tu raja i, “Hupatulus ma sude na niparentahon ni raja i.” Jadi mangan di bagas godang ma si Mefiboset, songon anak ni raja i sandiri.

¹² Adong do anak ni si Mefiboset na margoar si Mika. Sudena pangisi ni bagas ni si Ziba gabe naposo ni si Mefiboset.

¹³ Songon i ma dalanna si Mefiboset na pengkor i patna na dua i gabe maringanan di Jerusalem jana sai tongtong ma ia mangan di bagas godang.