2 SAMUEL 6 - BIBEL JAMITA NA DENGGAN

Poti Parjanjian dioban tu Jerusalem

¹ Dung i dipiohon si Daud ma anso marlagut sude tentara na dumenggan di Israel, tolu pulu ribu bahatna.

² Dioban ia ma halahi tu Baale-Juda laho mangalap sian i Poti Parjanjian na digoari marhite goar ni Tuhan Na Markuaso na marhabangsa di ginjang ni angka kerub.

³ Dibuat ma Poti Parjanjian i sian bagas ni si Abinadab na di ginjang tor i jana dipamasuk ma tu kareta na imbaru. Dung i diihutkon si Usa dohot si Ahio anak ni si Abinadab i ma kareta i. Si Usa ma di lambung ni kareta i,

⁴ jana si Ahio ma mardalan di jolo.

⁵ Si Daud dohot halak Israel i sude mardalan di jolo ni Poti i manortori lalu marendei sagogo-gogona laho pasangapkon Tuhan. Marhasapi, margondang, marnungneng dohot marhesek-hesek.

⁶ Dung lalu halahi di pardegean ni gandum na di Nakon, tartuktuk ma lombu na manarik kareta i, jana disurduhon si Usa ma tangannia laho maniop Poti Parjanjian i.

⁷ Jadi manigor muruk ma Tuhan Debata tu si Usa jana dimatehon ma ia hara ni hipas ni tangannia i. Mate di inganan i do si Usa di lambung ni Poti Parjanjian i.

⁸ Jadi mamungka sian i, digoari ma inganan i Perez-Usa. Muruk ma si Daud hara ni borat ni uhuman na nibaen ni Tuhan tu si Usa.

⁹ Tapi laing mabiar do si Daud tu Tuhan jana didok ia ma, “Bia noma saonnari baenonku maroban Poti Parjanjian i?”

¹⁰ Jadi gabe diputuskon noma na so obanon be Poti i tu Jerusalem, tapi dipasimpan noma di bagas ni si Obed-Edom, halak na lolot maringanan di kota Gat.

¹¹ Tolu bulan honokna disi Poti Parjanjian i, jana dipasupasu Tuhan do si Obed-Edom dohot dongan sabagasnia.

¹² Tarbege ma tu si Daud na dipasupasu Tuhan do si Obed-Edom dohot sude sinadongannia hara ni Poti Parjanjian i. Jadi kehe ma ia tu bagas ni si Obed-Edom jana dipaimbar ia ma Poti i tu Jerusalem mardongan horja godang.

¹³ Jadi dung mangalangka angka jolma na maroban Poti Parjanjian i onom langka, disuru si Daud ma halahi maradian. Dung i dihaulkon ia ma tu Tuhan haul lombu jantan dohot anak ni lombu na dipamokmok.

¹⁴ Dung i marsitutu ma si Daud manortori laho pasangapkon Tuhan. Pakeannia di hatiha i, i ma baju efod na sian abit linen.

¹⁵ Songon i ma pangalahona si Daud dohot rayat Israel sudena mamindahon Poti Parjanjian i tu Jerusalem mardongan surak-surak dohot sora ni sarune.

¹⁶ Dompak na maroban Poti i masuk ma tu bagasan kota i, manungkir ma si Mikal boru ni si Saul i sian jandela, diida ia ma Raja Daud marhujingjang dohot manortori laho pasangapkon Tuhan, jana gigi ma roha ni si Mikal mida si Daud.

¹⁷ Dioban ma Poti Parjanjian i masuk jana dipayakkon ma di ingananna di bagasan bandar na dung dipajongjong si Daud inganan ni Poti i. Dung i dihaulkon si Daud ma tu Tuhan haul na nitutung dohot haul haluaan.

¹⁸ Dung sidung sudena i, dipasupasu ia ma halak Israel mangasahon goar ni Tuhan Na Markuaso i,

¹⁹ lalu dibagi-bagihon ia ma panganon tu halahi sude. Sandok halaklahi dohot dadaboru na adong disi dilehen ma sada be roti, santanggo be juhut na ditutung dohot kue na hiang saotik be. Dung sidung i, marmulahan ma halahi sude tu bagasna be.

²⁰ Di na mulak si Daud tu bagas godang laho manjalangi isi ni bagasnia, ruar ma si Mikal mandapotkon ia jana didok ma, “Anggo sadari on antong tutu ma na marsangap raja ni Israel i dibaen ia sandiri! Jabat do antong marsaemara ia songon halak na bodo di jolo ni angka hatoban dadaboru dohot angka pagawe bagas godang i!”

²¹ Dialusi si Daud ma, “Manortor pe au na laho pasangapkon Tuhan do, i ma na dung manulak amanta ho maradu koum sisolkotna lalu mamili au gabe pamimpin ni Israel, bangsoNa i. Jadi hara ni i angkon torus do au manortor laho pasangapkon Tuhan i.

²² Lobi sian i pe bilena dibaen tu au nada pola. Giotmu ma laho palayaskon au, tapi angka dadaboru na nidokmi, argahononna do au!”

²³ Nada mardakdanak anggo si Mikal boru ni si Saul i salolot ngolunia.