2 SAMUEL 3 - BIBEL JAMITA NA DENGGAN

¹ Sai torus do mardalan parporangan antara ni parangan na mampartahankon horong ni si Saul dohot parangan na manyokong si Daud. Mur margogo ma si Daud, tapi mur gale ma anggo alonia i.

Angka anak ni si Daud

² Angka on ma anak ni si Daud na sorang di Hebron mangihutkon parjojor ni hasosorangna: Si Amnon, Inangna si Ahinoam na sian Jisreel.

³ Si Kileab. Inangna si Abigail tading-tadingan ni si Nabal na sian Karmel. Si Absalom. Inangna si Maaka boru ni Raja Talmai sian Gesur.

⁴ Si Adonia. Inangna si Hagit. Si Sefaca. Inangna si Abital.

⁵ Si Jitram. Inangna si Egla. Di Hebron do sorang anakna na onom i.

Marsada si Abner dohot si Daud

⁶ Di hatiha na sai torus mardalan porang i antara ni parangan ni si Daud dohot parangan na burju tu horong ni si Saul, marusaho ma si Abner anso ditangihon hatania di tonga-tonga ni na mamihak tu si Saul.

⁷ Jadi sanoli dituhas si Isboset anak ni si Saul i ma na marcampur si Abner dohot sada rading ni si Saul na margoar si Rispa boru ni si Aya.

⁸ Jadi gabe gilap ma si Abner jana didok ia ma, “Adong he na didok roha ni tuan i do marbalik au sian si Saul jana mamihak au tu Juda lakna? Sian mulana do au unduk tu si Saul, amangmu, dohot tu kahanggina maradu angka donganna. Madung huurupi tuan i gabe nada ditaluhon si Daud. Hum songon i hapengani laing digorahon tuan i dope hum hara ni dadaboru sajo!

⁹ Sai dimatehon Debata ma au, jana lumobi sian i, anggo so hudalankon janji ni Debata na tu si Daud i,

¹⁰ i ma papindahon harajaon sian horong ni si Saul jana pajongjongkon harajaan ni si Daud di Israel dohot di Juda sian Dan lopus tu Berseba.”

¹¹ Sada hata pe nada adong be taralusi si Isboset, angke mabiar do ia mida si Abner.

¹² Dung i disuru si Abner ma utusan tu si Daud na topet di Hebron di hatiha i, palalu tona songon on, “Ise do na giot markuaso di tano on? Baen ma janjimu tu au, jadi urupanku ma tuan i anso mamihak tu tuan i sude bangso Israel.”

¹³ Dialusi si Daud ma, “Denggan! Antong palalu ma tona on tu si Abner: Ra do au mambaen parjanjian dohot ho, tapi adong sada saratna: Angkon obanonmu do si Mikal boru ni si Saul i tu au muda ro ho mangadop tu au.”

¹⁴ Dung salpu i disuru si Daud muse ma utusannia tu si Isboset maroban tona, “Paulak ma antong tu au si Mikal dadaborungki. Na dung hugarari do i dohot saratus sibur-sibur ni halak Pilistin.”

¹⁵ Dung i disuru si Isboset ma utusannia mambuat si Mikal sian halaklahina, i ma si Paltiel anak ni si Lais.

¹⁶ Tapi sai torus ma si Paltiel mangihutkon si Mikal sai tangis. Di na lalu halahi di kota Bahurim, didok si Abner ma tusia, “Tuk ma i, mulak ma ho!” Dung i mulak ma si Paltiel.

¹⁷ Dung i martahi ma si Abner dohot angka hatobangon ni Israel, “Sian najolo do dihagioti hamu si Daud gabe rajamunu.

¹⁸ Antong aha dope, saonnari ma hatihana di hamu. Ingot hamu ma, na dung marjanji do Tuhan tu si Daud bahaso si Daud do na giot pakeonNia laho paluahon bangsoNa Israel sian halak Pilistin dohot sian sude musuna na asing i.”

¹⁹ Laing martahi muse ma si Abner tu angka halak Benyamin, dung i kehe ma ia muse tu Hebron laho paboahon tu si Daud na dung satahi halak Benyamin i dohot halak Israel i.

²⁰ Di na mangadop i si Abner dohot dua pulu halak parangannia tu si Daud di Hebron, dibaen si Daud ma pesta di halahi.

²¹ Dung i parmisi ma si Abner laho kehe didok ia ma, “Paloas ma au kehe laho mangarahon sude halak Israel anso marsada dohot tuan i. Jagiton ni halahi do tuan i gabe raja jana muda songon i gabe mamarenta ma tuan i di sude luat hombar tu hagiot ni tuan i.” Dung i dipaloas si Daud ma si Abner kehe jana dijamin ma ia aman.

Hona bunu si Abner

²² Dung kehe si Abner, mulak ma si Joab rap dohot parangan ni si Daud na deba nari sian na mamorangi jana dioban halahi do bahat barang na dirampas.

²³ Dipaboa ma tu si Joab na dung mangadop si Abner tu Raja Daud jana na dung dipaloas kehe, boti dijamin aman pardalanannia.

²⁴ Dung i mangadop ma si Joab tu raja i, didok ia ma, “Na bia dehe pambaen ni raja i? Ma ro si Abner mangadop tu raja i. Biasi dipaloas raja i ia kehe boti sajo?

²⁵ Pasti diboto raja i do, anggo haroro ni si Abner i hum na giot mangakali raja i do i dohot laho umboto pangalaho maradu sude pambaenan ni raja i.”

²⁶ Dung kehe ia sian si Daud, disuru si Joab ma utusannia laho marpio si Abner. Dikojar halahi ma ia lalu tu sumur Sira, lalu dioban halahi ma mulak. Sudena na masa i sian na so pamotoan ni si Daud do.

²⁷ Disi lalu si Abner di Hebron, dipiohon si Joab ma ia tu lambungnia, tu lambung ni pintu horbangan i tarsongon na giot mangkobari sada rahasia. Dung i ditiham si Joab ma butuha ni si Abner i lalu mate. Songon i ma si Abner hona bunu dibaen si Joab laho mambaloskon pamunuon tu si Asael angginia i.

²⁸ Di na tarbege tu si Daud barita i, didok ia ma, “Diboto Tuhan do na so marsala au dohot rayatku di pamunuon maradopkon si Abner i.

²⁹ Sai hona uhum ma nian si Joab dohot isi ni bagasnia hara ni pambaenanna i. Sai tongtong nian adong di bagas ni si Joab marsundut-sundut na marnyae na hodar sanga na marnyae hulit na jorbut, sanga halaklahi na marpangalaho dadaboru, sanga na mate di porang sanga na hurang sipanganon!”

³⁰ Songon i ma dibaen si Joab dohot anggina si Abisai palalu hosomna tu si Abner hara ni na nibununia si Asael anggi ni halahi i di parporangan na di Gibeon.

Dikuburkon ma si Abner

³¹ Dung i diparentahon si Daud ma tu si Joab dohot parangan i anso disibakkon halahi pakeanna be jana mamake abit siluluton mangandungi si Abner. Jana di na manguburkon i, mardalan di pudi ni poti ni na mate i ma anggo si Daud sandiri.

³² Di Hebron do dikuburkon si Abner, jana tangis ma raja i dohot rayat i sude mangangguhi di jolo ni kuburanna i.

³³ Dung i ditangisi si Daud ma si Abner, ning ia ma,

³⁴ “Angkon mate songon halak na bodo ma hape si Abner na so hona tambat tangannia dohot patna pe so sirantean? Na mate hona tiham ma ia dibaen halak na jahat boti na kejam.” Dung i ditangisi rayat i ma si Abner mangulahi.

³⁵ Sadari i sai disosoi rayat i ma si Daud anso mangan saotik, tapi disumpahon ia do, “Sai dibunu Debata ma au muda mangan au painte so lusut mataniari.”

³⁶ Umbege i, gabe sumonang ma pangkilaan ni rayat i. Nian, sanga aha pe na nibaen ni Raja Daud, matua na pasonangkon do di roha ni halahi.

³⁷ Di ari i mangarti ma sude rayat ni si Daud dohot sude bangso Israel, na so dihagioti raja i do pamunuon na tu si Abner i.

³⁸ Didok raja i ma tu angka donganna na mangihutkon ia, “Na so diboto hamu do na marujung ngolu ni sada halak na godang pamimpin di Israel di ari sadari on.

³⁹ Haru pe au on raja na nipili ni Debata, gale do pangkilalaanku sadari on. Makejamtu do angka anak ni si Zeruya on. Inda tuk gogongku mangatasi halahi. Sai Tuhan ma na manguhumi angka parjahat on, marguru tu pambaenan ni halahi i!”