2 SAMUEL 22 - BIBEL JAMITA NA DENGGAN

Ende hamonangan ni si Daud

¹ Dung dipalua Tuhan si Daud sian si Saul dohot sian sude musunia na asing i, diendehon si Daud ma ende on di Tuhan:

² Tuhan i do panjagongku, benteng na togu do di au.

³ Tu Debata do au marsilaung jana sonang do au marlindung. Songon parince do Debata manutup au, sonang ma au, dibaen Ia do mangondingi au. Tuhan i do Sipalua di au sian na mangasa gogo gabe malua au.

⁴ Pio-pio au tu Tuhan sian musungku au marhaluaan. Puji jana hamogahon ma Tuhan i!

⁵ Dihaliangi gogo ni hamatean au, galumbang ni parmaraan mangalingkup au.

⁶ Manaon jorgongna hamatean i tu au, ngangang tanoman di jolongku.

⁷ Di na tarsosak au hupiohon Tuhan, marsurak au mangido tolongan. Tangi do Ia sian Bagas Ni Debata umbege na tangis au mangido urupanNa.

⁸ Humuntal tano jana humutur, ojahan ni langit pe humusor jana marputar dibaen topet hatiha muruk Debata marpiar-piar parmurukNa.

⁹ Marbual timus sian lubang ni igungNa, api na manyurbu na milas gara-gara mamincar tu ruar sian pamanganNa, ihut margurasa banggar na gara.

¹⁰ Mabola langit i dibaenSa lalu mijur Ia, marhite ombun di toru ni patNia.

¹¹ Kareta banua ginjang do tenggetonNia, marhabong alogo di awang-awang habang Ia.

¹² Martutupkon hagolapan na dokdok Ia, maruloskon ombun na golap.

¹³ Sian sondang ni hilap di joloNia ruar ma banggar na gara-gara.

¹⁴ Mangaronggur ma Tuhan sian langit an, patubegehon soraNa ma Debata Na Markuasoan.

¹⁵ Dipalua Ia angka anak ni siorNia, musuNa pe masarsar, marlojongi be di na ro hilap sumiksak.

¹⁶ Dung i haidaan ma tandolan ni laut i jana mungkap ma ojahan ni portibi, di na mangogar Tuhan tu musuNa jana manggora tu halahi dohot rimasNa.

¹⁷ Dijata Tuhan au jana dijomput sian ginjang lalu ditarikSa au sian aek na bagas.

¹⁸ Sian musu na gogo au dipalua Ia dohot sian na magigi mida au, harana magogotu do halahi sian au.

¹⁹ Mangaroro halahi mangalo taran di hasusaanku, hape dilehen Tuhan parondingan di au.

²⁰ Ditolong Ia au haruar sian mara dibaen tu au naposoNa, holong ni rohaNia.

²¹ Marupa au dibaen Tuhan, angke tigor na hubaen, hara ni ate-ate na ias, pasupasu tu au dilehen.

²² Huoloi do parenta ni Tuhanku, jana na so unjung marbalik au sian Debatangku.

²³ Sude do uhumNia hudalankon parentaNia pe nada adong na huparnayangkon.

²⁴ Diboto Ia do au na so mardosa na mandao sian pangalaho na targora.

²⁵ Dapotan upa au sian Tuhan, angke tigor nipambaenan nada au marsala, jana torang do i diSia.

²⁶ Laing burju do Ho, tu halak na tigor tu halak na sanggam, ibo ni rohaMu pe laing sanggam ma.

²⁷ Tu halak na ias, laing ias do Ho, hape anggo parjahat dialo Ho do.

²⁸ Ingkon do sai ditolong Tuhan halak na patoruk rohana, tapi dipatoruk Ia do halak siginjang roha.

²⁹ O Tuhan, Ho do sinondangku Ho do na paorot hagolapanku.

³⁰ Mardongankon Ho puluk do au mandege panggaori, rap dohot Ho, hurumbakkon benteng ni musungki.

³¹ Sanggam do pambaenan ni Debata, haposan do sude janjiNa. Songon panapik ni sinjata do Tuhan i di halak na maporus tuSia sandiri.

³² Harana, ise ma he Debata asing ni Tuhan? Asing ni Debata, ise dope di hita parondingan?

³³ Debata do benteng na togu di au, na mambaen sonang dalananku.

³⁴ Songon pat ni ursa dibaen Ia togu patku, gabe sonang di partoran pardalananku.

³⁵ Diajar Ia au marporang, anso malo au salang manangging sior na sian tumbaga.

³⁶ Tuhan, malua do au muda Ho parondinganku. gabe sangap do au hara ni pangurupiMu.

³⁷ Dijagohon Ho do anso laing togu pangalangkangku, diparorot Ho gabe nada unjung tinggang au.

³⁸ Hukojar musungki jana hutaluhon halahi, nada mulak au painte so humatehon sudena i.

³⁹ Hutombomkon halahi lopus nada lobassa jongjong be, di jolo ni patku tinggang halahi gale sude.

⁴⁰ Dilehen Ho gogo di au marporang, dipatunduk Ho musungku lopus au monang.

⁴¹ Maporus sian au dibaen Ho musungku, huabiskon sude na manghagigihon au.

⁴² Marsurak halahi, hape soada na manolong. Pio-pio tu Tuhan, hape laing manghohom Ia.

⁴³ Huropuk halahi lamot songon abu marhabangan, hulonca-lonca halahi songon bustak di dalan-dalan.

⁴⁴ Dipalua Ho do au sian dongan sabangso na durako, dibaen Ho do au gabe parkuaso ni angka bangso. Bangso na so hutanda hian hatiha i, saonnari gabe hatoban di au halahi.

⁴⁵ Tunduk jana mangunduk bangso na asing tu au, unduk halahi muda dibege parentangku.

⁴⁶ Mago sude habaranion ni halahi, jana humitir ruar be sian bentengna i.

⁴⁷ O Tuhan ni hangoluan! Nipuji ma Ho na mangampuni au! Pasangap ma Debata na gumogo, sipaluangku!

⁴⁸ Ia do na mamolus hajahatan ni musungku, jana na manaluhon angka bangso di jolongku.

⁴⁹ Dipalua Ho do au sian musungku dohot sian halak na jahat. Dilehen Ho hamonangan di au maradopkon alongku.

⁵⁰ Hara ni i, hupuji do Tuhan di tonga-tonga ni angka bangso. Huendehon ende dohot masmur di Na Markuaso.

⁵¹ Mulahulak dilehen Debata hamonangan na marlobian tu raja. Manongtong do holong ni rohaNa tu raja na nipiliNia, tu si Daud maradu pomparanna sapanjangna.